_ ჯერ გამგეობის წინ მდებარე სკვერს მოუნგრიეს ღობეები და ჭიშკარი, დღეს კი აჯანყებული გურულის კვარცხლბეკი დაანგრიეს. შეგახსენებთ, რომ ქანდაკება უგზოუკვლოდ გადაკარგეს ლანჩხუთიდან. მუშები ამბობენ, რომ ამ ადგილზე გამგეობა ახალი სკვერის მოწყობას გეგმავს.
გამგეობის წინ მდებარე სკვერი წინა არჩევნების დროს გააკეთეს. 4 წლის შემდეგ რატომ გახდა აუცილებელი მისი დანგრევა და ხელახლა აშენება, გაურკვეველია.
საკრებულოს თავმჯდომარემ რევაზ ჩიტიძემ ერთ-ერთ სხდომაზე განაცხადა, რომ ქალაქის აღმშენებლობისთვის 300 ათასი ლარია გამოყოფილი: _ ამ ფულით ინფრასტრუქტურულ პროექტებს დავაფინანსებთ, _ აღნიშნა ჩიტიძემ.
როგორც ლანჩხუთის მუნიციპალიტეტის გამგეობის პრესცენტრის უფროსი ეთერ ჭყონია განმარტავს, გამგეობის მიერ გამოცხადებულ ელექტრონულ ტენდერში ინდმეწარმე ოთარ ჯაშმა გაიმარჯვა და ის ასრულებს პარკის რეაბილიტაციის სამუშაოებს. თუმცა, რატომ იყრება ფული უკვე გაკეთებული პროექტების ხელახლა გაკეთებაში, გაუგებარია. ჩვენ შევეცადეთ ამ კითხვის პასუხი თავად საკრებულოს თავმჯდომარისგან მიგვეღო, მაგრამ მისი ტელეფონი მთელი დღის განმავლობაში გამორთულია.
