“ქართული ოცნების” პრესსამსახურის ინფორმაციით, “პარტიის ახალგაზრდული ფრთის წარმომადგენლებს, რომლებიც ქუჩაში გაზეთებსა და მოსაწვევებს არიგებდნენ თავს დაესხა ნაჭყებია, გაზეთები და მოსაწვევები დაუხია და გოგონებს აგინა”.
პრესსამსახურის ინფორმაციით, “ქართული ოცნების” აქტივისტებმა პროვოკატორს თავი აარიდეს და გზა განაგრძეს. მათ აედევნა შავი ფერის ჯიპი “ტოიოტა პრადო” სახელმწიფო ნომრით CJC-251, რომელიც ეკუთვნის შინაგან საქმეთა სამინისტროს კონსტიტუციური უსაფრთხოების დეპარტამენტს. მანქანებში მსხდომებმა, “ქართული ოცნების” ახალგაზრდული ფრთის წარმომადგენლებს სიტყვიერი შეურაცხყოფა მიაყენეს, რის შემდეგაც იქაურობას გაეცალნენ”.
“გურია ნიუსი“ დაუკავშირდა ქართული ოცნების მაჟორიტარობის კანდიდატს ფოთში, ეკა ბესელიას, რომელმაც განაცხადა, რომ ჩადენილია სისხლის სამართლის დანაშაული და ამის შესახებ კოალიციამ უკვე მიმართა შესაბამის ორგანოებს.
“6 აგვისტოს დაგეგმილია ჩემი ყველაზე დიდი შეხვედრა ფოთელ ამომრჩეველთან. სწორედ ამ შეხვედრის წინ, ჩვენი ახალგაზრდები არიგებდნენ გაზეთებსა და მოსაწვევებს, როდესაც მათ მიუახლოვდა ადგილობრივი უშიშროების სამსახურის თანამშრომელი, გაზეთები წაართვა, დახია და სახეში მიაყარა ახალგაზრდებს. სახეზეა საარჩვენო კამპანიისთვის ხელის შეშლა და სამსახურებრივი უფლებამოსილების ბოროტად გამოყენება, რაც სისხლის სამართლის კოდექსით დასჯადი ქმედებებია”, _ განაცხადა ეკა ბესელიამ “გურია ნიუსთან” საუბარში.
ბესელიას განცხადებით, შესაბამის ორგანოებს არ უნდა გაუჭირდეთ დამნაშავე სამართლადამცავის იდენტიფიცირება, რადგან “ქართული ოცნების“აქტივისტებმა ამ უკანასკნელის ავტომანქანის ნომრის ჩაწერა მოასწრეს”.
“მსგავსი ქმედებებით, “ნაციონალური მოძრაობა” თვითონ მოდის წინააღმდეგობაში მათ მიერ ინიცირებულ 4 პუნქტიან გეგმასთან წინასაარჩევნოდ ეთიკის დაცვის შესახებ,” _ ნათქვამია კოალიცია “ქართული ოცნების” პრესსამსახურის მიერ გავრცელებულ განცხადებაში.
დღესვე, “ქართული ოცნების” ფოთის მაჟორიტარი დეპუტატობის კანდიდატმა ეკა ბესელიამ იუსტიციის სამინისტროს სამოქალაქო რეესტრის ფოთის სამმართველოს განცხადებით მიმართა ფოთის მცხოვრებლად დარეგისტრირების თაობაზე.
ფოთელმა ილია ჯანჯღავამ სამოქალაქო რეესტრში საკუთარი ხელმოწერით დაადასტურა მის კუთვნილ საცხოვრებელ მისამართზე იერუსალიმის ქუჩა #37 “ქართული ოცნების” მაჟორიტარი კანდიდატის ეკა ბესელიას დარეგისტრირებაზე თანხმობა.
