“გურია ნიუსი”, სტრასბურგში”, ქართული ოცნების” მხარდამჭერი საინიციატივო ჯგუფის ხელმძღვანელს, ზურაბ მალაზონიას ესაუბრა
ზურაბ მალაზონიას 2011 წელს, მისივე თხოვნის საფუძველზე, საფრანგეთის მთავრობამ პოლიტიკურად დევნილის სტატუსი მიანიჭა.
_ბატონო ზურაბ, ზოგადად, როგორი განწყობაა ქართველ ემიგრანტებში საქართველოში მიმდინარე მოვლენებზე?
_ განწყობა, რა თქმა უნდა, არის კრიტიკული, ემიგრანტთა აბსოლუტური უმრავლესობა გმობს და ეწინააღმდეგება იმას, რასაც საქართველოს დღევანდელი ხელისუფლება სჩადის. არ შეიძლება, 21-ე საუკუნეში ანტენებს უხსნიდნენ ხალხს და ელემენტარულად ინფორმაციის მიღების საშუალებას არ აძლევდნენ. არ შეიძლება, ხალხი ასე დაშინებული ჰყავდეს ხელისუფლებას. ასეთი ტერორი, ალბათ, თვით ყველაზე დიდ დიქტატორებსაც კი გააკვირვებდა!
_რა აქცია იმართება და ვისგან გაქვთ ნებართვა აღებული?
_ ეს აქცია იმართება ჩემი და ჩემი მეგობრების ინიციატივით. ჩვენ არ ვართ რომელიმე პარტიის წევრები. გამომდინარე დღევანდელი საქართველოს უკიდურესად მძიმე პოლიტიკური და ეკონომიკური სიტუაციიდან, ჩავთვალეთ საჭიროდ, რომ ჩვენ _ ემიგრაციაში მყოფმა ქართველებმა გამოვხატოთ მხარდაჭერა ბიძინა ივანიშვილის და მის მიერ დაფუძნებული კოალიციის მიმართ.
5 აგვისტოს, გვინდა ვუთხრათ მთელ საქართველოს, რომ გვერდით ვუდგავართ, ასევე ვგმობთ მედიაზე ტერორს. კერძოდ, “მაესტროს” სატელიტური თეფშების დაყადაღებას და მოვითხოვთ, მოგვეცეს საშუალება, მონაწილეობა მივიღოთ 2012 წლის საპარლამენტო არჩევნებში. აქცია გაიმართება ევროპარლამენტის წინ, რაც შეთანხმებულია ადგილობრივ ხელისუფლებასთან.
_ფიქრობთ, რომ ქართველ ემიგრანტებს არ მიაღებინებენ არჩევნებში მონაწილეობას?
_არა თუ ვფიქრობთ და ეჭვი გვაქვს, საფრანგეთში მცხოვრები ქართველებისთვის, თითქმის წარმოუდგენელია არჩევნებში მონაწილეობის მიღება, რადგან დოკუმენტაცია, რომელიც ჩვენი საგარეო საქმეთა მინისტრის ბრძანების მიხედვით, სავალდებულოა რეგისტრაციისთვის, საფრანგეთში არ გაიცემა. ეს არის ცნობა საცხოვრებელი ადგილიდან. პრობლემა ასევე მდგომარეობს იმაში, რომ ემიგრანტთა 80 პროცენტი ცხოვრობს არალეგალურად, ყოველგვარი საცხოვრებელი ადგილისა და მისამართის გარეშე, რაც ძალიან კარგად იცის საქართველოს ხელისუფლებამ და ამიტომაც მიიღეს ასეთი გადაწყვეტილება!
_ დაახლოებით, რამდენკაციანი აქცია იქნება?
_ რაც შეეხება მონაწილეთა რაოდენობას, ზუსტად ვერ გეტყვით, რადგან ჩვენ აქციის მოწყობის გადაწყვეტილება მივიღეთ რამდენიმე დღის წინ და დიდი დრო არ დაგვრჩა 5 აგვისტომდე. ვფიქრობთ, რომ აქცია იქნება ეფექტური და შთამბეჭდავი.
ჩვენ, სტრასბურგში მცხოვრები ემიგრანტები ვგეგმავთ პერმანენტულ აქციებს ევრო პარლამენტის, ევროსაბჭოსა და ევროსასამართლოს მიმდებარე ტერიტორიებზე, რათა გადავცეთ და გავაგებინოთ ყველა საერთაშორისო ორგანიზაციას ის, რაც საქართველოში ხდება. მადლობას გიხდით, რომ შემეხმიანეთ და იმედს ვიტოვებ, მალე შევხვდებით სამართლიან და გაბრწყინებულ საქართველოში.
