“გურია ნიუსის” ვებგვერდზე განთავსებულია ვიდეომასალა, სადაც ჩანს, რომ ავადმყოფ შვილიშვილთან მიმავალ მოქალაქეს მხოლოს იმიტომ ჩამოართვეს მანქანა, რომ “ქართული ოცნების” გაზეთი გამოართვა ოცნების წევრებს.
„გურია ნიუსი“ ბახმაროში განვითარებულ მოვლენებთან დაკავშირებით, კომენტარისთვის უწყებათაშორისი კომისიის წევრს, თამარ კინწურაშვილს დაუკავშირდა.
_ ქალბატონო თამარ, “გურია ნიუსი” დღეს მთელი დღის განმავლობაში მუშაობდა ბახმაროში და ჩვენს ვებგვერდზე არაერთი მასალა გავრცელდა, მათ შორის ვიდეოკადრებიც, სადაც კარგად ჩანს, როგორ არ უშვებდნენ ბახმაროში ადამიანებს პოლიტიკური ნიშნით, საუბარია “ქართული ოცნების” მხარდამჭერებზე. ამასთან დაკავშირებით რა კომენტარს გააკეთებს უწყებათაშორისი კომისია?
_ პოლიტიკური ნიშნით არშეშვებაზე არ იყო, რამდენადაც ჩემთვის არის ცნობილი. პრევენცია რომ მომხდარიყო კონფრონტაციის სხვადასხვა პოლიტიკურ ძალებს შორის, ამიტომ არ უშვებდნენ. ირიდებდნენ თავიდან კონფრონტაციას. ჩვენ შევთავაზეთ პოლიტიკურ პარტიებს, თუ გვაცნობებენ თავიანთი დაგეგმილი ღონისძიებების შესახებ, მედიაციას გავწევთ, რომ რაღაცნაირად არ მოხდეს თანხვედრა დროში.
_ დღეს რომელიმე პოლიტიკური პარტიის აქცია არ ყოფილა ბახმაროში, საუბარია სახალხო დღესასწაულზე, სადაც ნებისმიერ ადამიანს აქვს მისვლის უფლება.
_ კი, ერთის მხრივ, საუბარია სახალხო დღესასწაულზე და ნებისმიერს შეუძლია მისვლა, მაგრამ როდესაც საარჩევნო კამპანიის პროცესია და ასეთი დაძაბული კამპანია მომდინარეობს, სასურველია, მოხდეს პრევენცია. აქედან გამომდინარე, პოლიცია ცდილობდა, თავიდან აეცილებინა კონფლიქტური სიტუაცია. იქ რომ მისულიყო ადრე “ქართული ოცნება”, მათი ღონისძიება ჩატარდებოდა, ბუნებრივია და “ნაციონალური მოძრაობის” წარმომადგენლებს არ შეუშვებდნენ იქ, სადაც მათი ხალხმრავალი თავყრილობა იქნებოდა.
_ ქალბატონო თამარ, ძალიან უცნაური ტენდენცია ხომ არ არის, რომ სახალხო დღესასწაულებზე რომელი პოლიტიკური ძალაც დაასწრებს, იმან დაიკავოს ის ადგილი? თანაც, ამასაც რომ თავი დავანებოთ, ბახმაროში არც ჟურნალისტებს უშვებდნენ და არც რიგით მოქალაქეებს.
_ ჟურნალისტებს რაც შეეხება, მე თქვენთან დაკავშირებით (გულისხმობს “გურია ნიუსს”ავტ.) დამიკავშირდა “სამართლიანი არჩევნების” წარმომადგენელი, შემდეგ ვესაუბრე ირმას და მითხრა, რომ თქვენ აკრედიტაცია არ აგიღიათ მიუხედავად იმისა, რომ ივნისში ჩვენთან გაიმართა შეხვედრა და იყო შეთანხმება, რომ თქვენ აკრედიტაციას გაივლიდით. ღონისძიებაზე დასასწრებად, სავალდებულოა აკრედიტაციის გავლა და გონივრული ვადა იყო იმისთვის, რომ ეს მოგეხერხებინათ.
_ “გურია ნიუსის” თითქმის ყველა ჟურნალისტმა შეავსო აკრედიტაციის გასავლელად საჭირო ელექტრონული ფორმა, მაგრამ ჩვენთვის პასუხი არავის მოუწერი და არც აკრედიტაციის დამზადების შესახებ შეუტყობინებიათ, როგორც ეს ხდება ხოლმე სხვა სტრუქტურებში.
ესეც რომ არ იყოს, ჩვენ პრეზიდენტის ვიზიტზე კი არა, სახალხო დღესასწაულზე მივდიოდით და აკრედიტაციები რატომ იყო საჭირო? დოღი ტრადიციული ქართული დღესასწაულია, რომელზე დასწრების უფლება ნებისმიერს აქვს და მათ შორის, ჩვენც.
_ მესმის, რომ ტრადიციული დღესასწაულია, მაგრამ როცა იქ ტარდება პრეზიდენტის ღონისძიება, უსაფრთხოების ზომებიდან გამომდინარე, სადაც მიდის პრეზიდენტი, ყოველთვის არის აკრედიტაციის მოთხოვნის უფლება და შემოწმების ვალდებულება, იმიტომ, რომ ასე ხდება ყველგან. მეც რომ მივდივარ იმ ღონისძიებაზე, სადაც პრეზიდენტია, მეც გავდივარ შემოწმებას.
თუ თქვენს შემთხვევაში შეფერხება იყო აკრედიტაციასთან დაკავშირებით, ამასაც მოვიკითხავ აუცილებლად. თუ რაიმე ტექნიკური შეფერხება იყო, გავარკვევ. არავის შექმნია პრობლემა, არც “მაესტროს”, არც “კავკასიას” და არა მგონია, თქვენ შეგქმნოდათ.
_ ქალბატონო თამარ, ისევ ბახმაროს თემას მინდა დავუბრუნდეთ, თქვენს მიერ ნახსენები პრევენცია რამდენად შეიძლება შეეხოს რიგით მოქალაქეებს, იმ დამსვენებლებს, რომლებიც რაღაც დროით იყვნენ იქედან გამოსულები და ისევ უკან ბრუნდებოდნენ?
_ კონკრეტული შემთხვევები არ არის ცნობილი, მაგრამ ამოცანა იყო ის, რომ არ მომხდარიყო რამე კონფლიქტური სიტუაცია.
_ “გურია ნიუსის” ვებგვერდზე შეგიძლიათ ნახოთ კადრები, სადაც ავადმყოფი ბავშვის ბაბუა იხვეწებოდა, შეეშვათ ბახმაროს ტერიტორიაზე, რათა ბავშვი გამოეყვანა იქედან. პოლიციას თხოვდა, უხსნიდა ამ ყველაფერს და მაინც არ შეუშვეს. აქ რომელ პრევენციაზე შეიძლება იყოს საუბარი?
_ შევისწავლით მაგ მასალას.
_ პრევენცია, რომელსაც სამართალდამცავები ახორციელებენ, რატომ არ ხდება იმ შეხვედრების დროს, რომელსაც ოპოზიციური პოლიტიკური პარტიები ატარებენ? მაგალითად, კარალეთში, ხურვალეთში, მერეთში, „ქართული ოცნების“ მიერ გამართულ შეხვედრებზე რატომ არ ჰქონდა ადგილი ასეთ პრევენციულ მიდგომას?
_ კარალეთში, ხურვალეთსა და მერეთში არ ყოფილა წინასწარ დაანონსებული შეხვედრები. რაც შეეხება იმ შეხვედრებს, რომელთა შესახებ “ქართული ოცნების” წევრები წინასწარ გვაწოდებდნენ ინფორმაციებს, ჩვენ ვატყობინებდით როგორც პოლიციას, ასევე ადგილობრივი თვითმმართველობის წარმომადგენლებს და იქ არსად ინციდენტი არ ყოფილა. ჩვენ გამოვყავით შინაგან საქმეთა სამინისტროდან და მომავალშიც გამოვყოფთ საკონტაქტო პირს და წარმომადგენლებს შეუძლიათ მას დაუკავშირდნენ წინასწარ.
ამიტომ იმის თქმა, რომ ასეულობით შეხვედრიდან და ათეულობით მიტინგიდან თუ სამ შემთხვევაში იყო რაღაც ინციდენტი, ეს იყო სპეციფიურ რეგიონებში, ოკუპაციის მიმდებარე მხარესთან და იძულებით გადაადგილებულ პირთა დასახლებაში, სადაც გარკვეული უკმაყოფილება გამოიწვია შეფასებებმა. რა თქმა უნდა, ამას არ აქვს გამართლება, მაგრამ კონტექსტიც არის გასათვალისწინებული.
ცხადია, არის შემთხვევები, როდესაც ცალკეული აქტივისტები გამოთქვამენ განსხვავებულ შეხედულებებს და ნებისმიერს აქვს უფლება, გამოხატოს თავისი აზრი, ოღონდ ის არ უნდა იყოს ორგანიზებული პარალელური აქციებით, როგორც ეს რამდენიმე შემთხვევაში მოხდა.
_ ჩვენ ბევრი რელიგიური დღესასწაული გვაქვს და ასეთი კითხვა გამიჩნდა, _ ვინც პირველი დაასწრებს მისვლას ამ დღესასწაულზე, “ქართული ოცნება” თუ “ნაციონალური მოძრაობა”, ეს დღესასწაული იმისი იყოს და იმან აღნიშნოს?
_ არა, მე მგონი, რელიგიურ დღესასწაულებზე არ იყო პრობლემა და არაერთი ასეთი დღესასწაული იყო, რომელსაც სხვადასხვა პარტიების წარმომადგენლები ერთად ესწრებოდნენ.
_არ ვიცი, ძალიან მალე, მარიამობა უნდა აღვნიშნოთ, ერთ-ერთი დიდი რელიგიური დღესასწაული და საინტერესოა, რომელიმე პოლიტიკური ძალა ხომ არ აპირებდა წინასწარ მის მითვისებას…
_ არა, მათი ქცევის წესები, ეკლესიაში ცოტა განსხვავებულია…
პ. ს „ქართული ოცნების“ შეფასებას ამ განმარტებებთან დაკავშირებით „გურია ნიუსი“ მალე შემოგთავაზებთ.
