არეშიძე არ გამორიცხავს, რომ ადგილი “მოდელირებული ქრონიკის” ვარიანტსაც ჰქონდეს.
_ ბატონო მამუკა, კეთდება განცხადებები, რომ ლაფანყურში მიმდინარე მოვლენები ხელისუფლების დაწერილი სცენარია…
_ ასე ცალსახად ამის თქმა არ შეიძლება. ეს ვერსია შეიძლება იყოს, მაგრამ მაინც, ახლა, სამი დაღუპულის თაობაზე ვრცელდება ინფორმაცია. აქედან გამომდინარე, ნებისმიერ ჩამოყალიბებულ და მკაცრ ვერსიასაც ჰქონდეს ბზარი. მე, რასაკვირველია ხელისუფლების დადგმული სცენარისა და ერთგვარი მოდელირებული ქრონიკის ტიპს ვუშვებ, მაგრამ მაინც ვფიქრობ, რომ რაღაც ელემენტები სიმართლისა, იყო ამ ამბავში, რომელიც შემდეგში გაბუქდა. ამაზე მიმანიშნებს რამდენიმე ასეული სამხედრო მოსამსახურის იქ ყოფნა, შუაღამეში ვერტმფრენების ფრენის ფაქტი, რომელიც არაფრის მომტანი არ არის და საერთოდ, ამ ამბის გარშემო მთელი ეს ატეხილი აჟიოტაჟი.
_ თემურ შაშიაშვილი ამ ამბავს ბიძინა ივანიშვილის საგანგებო განცხადებას უკავშირებს, რომელიც ხვალ უნდა გაკეთდეს. თქვენ როგორ ფიქრობთ, რამდენად შეიძლება იყოს ეს რეალობასთან ახლოს?
_ შესაძლებელია ეს ყოფილიყო. უბრალოდ, 30-ში კეთდება აღნიშნული განცხადება და მაშინ ეს ამბავი დაიწყებოდა არა გუშინ, არამედ დღეს, რომ გადაეფარათ მთლიანად ეს განცხადება. თუმცა, შეეცდებიან მაინც გამოიყენონ დღევანდელი სიტუაცია და გაწელონ ეს ამბავი 2 დღის განმავლობაში. ჩემთვის ამ ეპიზოდში გარკვეული მონაცემი, განსაკუთრებით დაღუპულებთან დაკავშირებით, რეალობასთან ახლოა, მაგრამ თავისთავად მოდელირებულ ქრონიკას მაინც არ გამოვრიცხავ. სამი ვერსია მაქვს _ ერთი ის, რომ მართლაც შემოვიდა დაღესტნიდან გადმოსული სალაჰიტების რაზმი _ ეს ყველაზე უწყინარი ვერსიაა. მეორე ვერსია ის არის, რომ რუსეთმა მოსინჯა ქართული ჯარის და ქართველი მესაზღვრეების პოზიციები და მესამეა, რომ ყველაფერი ეს არის ბლეფი. ასეთი ტიპის ვერსიები ვრცელდება ხალხში და შესაბამისად, სამივე ტიპის ვერსიას პასუხი უნდა გაეცეს. ყველაზე უწყინარი და ნაკლებ დანაკარგიანი შეიძლება იყოს პირველი ვერსია _ შემთხვევითობის ელემენტები, რისიც მე თვითონაც არ მჯერა. სიმართლე გითხრათ, ვიხრები იმისკენ, რომ რაღაც რეალურად მოხდა, მაგრამ შემდეგ ხელისუფლება შეეცადა სათავისოდ გამოეყენებინა ეს ამბავი და მსხვერპლიც ამის შედეგია თუ მართლა მსხვერპლი იყო და ღმერთმა ქნას ამაში არ მოვტყუვდეთ. ეს ყველაზე ნაკლები ტყუილი იქნება იქნება, რადგან ადამიანის დაღუპვაზეა საუბარი.
_ ვარაუდობთ, რომ შესაძლოა მსხვერპლი არ იყოს?
_ არ ვვარაუდობ, მაგრამ არ მინდა რომ იყოს მსხვერპლი. ძალიან საინტერესოა რა შედეგი გვექნება, იმიტომ რომ 20 კაციანი რაზმი რომ გადმოვიდა სად იყვნენ ჩვენი მესაზღვეები, რა უნდოდა იქ ვერტმფრენებს, რად უნდოდათ ამდენი სამხედრო მოსამსახურე, რა ამბავი ავტეხეთ საერთოდ და უამრავი სხვა საკითხია. ლენტა.რუ-ს ინფორმაციას იმის თაობაზე, რომ თავდასხმა დაიწყო რუსეთის მხრიდან ძალიან მკაცრად გამოეხმაურა ინტერფაქსი. ასეთი რამ არც მახსოვს, რომ ლენტა.რუ-ზე კომენტარი ინტერფაქსს ეკეთებინოს. ლენტა.რუ ასახელებდა სამხედრო ნაწილს, საიდანაც შეიძლება ყოფილიყო დაგეგმილი ეს ოპერაცია. შემდგომში ინტერფაქსმა კატეგორიული უარი განაცხადა, თქვა რომ ეს სისულელეა და ასეთი დანაყოფი სულ არ არის რუსეთის ფედერაციის ტერიტორიაზეო. მოკლედ, ერთმანეთსაც კი გადაეკიდნენ ამის გამო. მე ისეთი შთაბეჭდილება მრჩება, რომ ვიღაცამ დაუკვეთა ლენტა. რუ-ს შესაბამისი აქტივობები.
_ რა ინფორმაცია გაქვთ დაღესტნიდან, იქ რა ხდება?
_ დაღესტნიდან მაქვს უამრავი ინფორმაცია, სხვადასხვა ტიპის, მაგრამ აი ამ თემასთან დაკავშირებით, იქ ვრცელდება ინფორმაცია მხოლოდ ქართულ წყაროებზე დაყრდნობით. ერთადერთი გამონაკლისი იყო ლენტა.რუ, რომელიც ჩააჩუმეს. მე, უბრალოდ, ის მინდა გითხრათ, რომ ბევრი საეჭვო კითხვა ისმება, რომელზეც პასუხი არავის აქვს ჯერჯერობით და მოდით, ასე ვქნათ _ შევინარჩუნოთ ჯერჯერობით შთაბეჭდილება, რომ აქ შეიძლება ბევრი ნაწილი სიმართლე იყოს, მაგრამ დიდი ნაწილი – ტყუილი და შემდგომში გავაგრძელოთ ინფორმაციის მოპოვება. მე არ მიყვარს ჰაერზე ლაპარაკი თუ სიმართლის მარცვალი არ დავინახე.
