„ადმინისტრაციული წარმოების შედეგად, ფინანსური მონიტორინგის სამსახურმა მიიღო გადაწყვეტილება „ერთიანი ნაციონალური მოძრაობის” ხუთი შემომწირველი პირის სამართალდამრღვევად ცნობის თაობაზე. შესაბამისად, მათ მიერ პოლიტიკური გაერთიანებისთვის შეწირული თანხები ჩაითვალა უკანონო შემოწირულობად და სამართალდარღვევისათვის გათვალისწინებული სანქციის (1.575.000 ლარის) ფარგლებში ყადაღა დაედო მათ ქონებას,“ _ ვკითხულობთ ამავე განცხადების ტექსტში.
რამდენჯერაც არ უნდა გადაიკითხოთ ეს ტექსტი, ამ იდუმალი შემომწირველების ვინაობას ვერსად შეხვდებით. „ნაციონალური მოძრაობის“ დაჯარიმებული შემომწირველებს აუდიტის სამსახური მკაცრად ასაიდუმლოებს.
„გურია ნიუსი“ მათი დაჯარიმების დღიდან ცდილობს, როგორმე დაადგინოს, ვინ და რატომ „გაწირა“ აუდიტის სამსახურმა, მაგრამ უშედეგოდ. არაფერი თქმულა სასამართლოს მიერ გამოტანილ გადაწყვეტილებაზეც და საერთოდ, ჩნდება კითხვა _ დააჯარიმეს კი ვინმე?!
სახელმწიფო აუდიტის სამსახურის პრესსამსახურის უფროსს, ფატი მამიაშვილს სწორედ იმის გასარკვევად დავუკავშირდით, როდის იყო ჩანიშნული 5 დაჯარიმებული შემომწირველის სასამართლო პროცესი და ვინ იყვნენ ისინი.
_ ქალბატონო ფატი, „ნაციონალური მოძრაობის“ 5 შემომწირველი რომ დააჯარიმეთ, მათი სასამართლო პროცესი როდის არის?
_ არ ვიცი, არ ვიცი, ვერ გეტყვით, უნდა ვიკითხო…
_ მათი სახელები და გვარები გვაინტერესებს.
_ არ ვიცი, ინფორმაცია არ იყო ამის შესახებ საიტზე დადებული, მხოლოდ რაოდენობა იყო დაწერილი და ვერ გეტყვით ვერაფერს. გავარკვევ, როდის არის სასამართლო პროცესი ჩანიშნული.
რა თქმა უნდა, არ დავიზარეთ და ფატი მამიაშვილთან კიდევ ერთხელ გადავრეკეთ.
_ ისევ „გურია ნიუსიდან“ გაწუხებთ, ხომ არ გაგირკვევიათ, სასამართლო პროცესი როდის არის ჩანიშნული?
_ ვერ გავარკვიე სასამართლო პროცესი როდის არის და სასამართლოს რომ მიმართოთ მაგის შესახებ, როდისაა ჩანიშნული?
_ გვარები რატომ არ დევს? სასამართლოს რომ მივმართოთ, ხომ უნდა ვუთხრათ, ვისი პროცესი გვაინტერესებს?
_ იცით რა არის…. ეს პირადი ინფორმაცია იყო და მაგიტომ არ განთავსდა… ვერ გეტყვით ზუსტად… სასამართლოს მიმართეთ.
_ „ქართული ოცნების“ შემომწირველების ინფორმაციები რომ განთავსდა და მათი ვინაობა ჩამოთვლილი იყო, ის არ იყო პირადი ინფორმაცია?
_ ვერ გეტყვით…
ფატი მამიაშვილს რომ სათქმელი არაფერი აქვს, გასაგებია. რადგან ის, რაც პერსონალურ ინფორმაციად ითვლება „ნაციონალური მოძრაობისთვის“, „ქართული ოცნების“ შემთხვევაში, სრულ გასაჯაროებას ექვემდებარება. ნიმუშად მხოლოდ ერთ მაგალითს მოვიყვანთ აუდიტის სამსახურის ვებგვერდზე გამოქვეყნებული განცხადებიდან:
„მონიტორინგის პროცესში დადგინდა, რომ ფიზიკური პირები სხვადასხვა მომსახურების შესყიდვისა და პარტიის ვალდებულებების შესრულებისათვის ფულად თანხებს პირადი სახსრებიდან იხდიან, თუმცა ამის მიუხედავად როგორც ელექტრონული პროგრამაში ისე ოფიციალურ დოკუმენტაციაში ამას ადეკლარირებენ როგორც არაფულად შემოწირულებას. კანონით დადგენილი წესების დარღვევით კოალიცია „ქართული ოცნების” სასარგებლოდ შემოწირულებები განახორციელეს ფიზიკურმა პირებმა, – ნოდარ ხადურმა, თამარ გიორგაძემ, რომან ცხონდიამ, თინა ხიდაშელმა და ბესო ჯოჯუამ…“
კიდევ ერთხელ შეგახსენებთ, რომ თურმე „ნაციონალური მოძრაობის“ დაჯარიმებული შემომწირველების ვინაობას აუდიტის სამსახური იმიტომ არ ასახელებს, რომ პერსონალური ინფორმაციაა…
