ოზურგეთის მუნიციპალიტეტის გამგეობის პრესასთან და საზოგადოებასთან ურთიერთობის სამსახურის უფროსის, ნინო სალუქვაძის თქმით, გამგეობისა და საკრებულოს თანამშრომლები ჩვეულებრივ მიიღებენ ოქტომბრის თვის კუთვნილ ანაზღაურებას.
რაც შეეხება მეორე საკითხს, რომელიც ერთჯერად დახმარებების გაცემას ეხება, სალუქვაძე ამბობს, რომ დამატებითი შემოსავლების მობილიზების შემთხვევაში, შეჭირვებულ მოქალაქეთა ერთჯერადი სოციალური დახმარების პროგრამა განახლდება.
ოზურგეთის მუნიციპალიტეტის საკრებულოს ოპოზიციონერი დეპუტატის კახა ღლონტის მოსაზრებით, ადგილობრივ ბიუჯეტთან დაკავშირებით რომ არასახარბიელო სურათი არის, ამას დიდი კამათი და არგუმენტების მოყვანა არ სჭირდება.
_ ასევე რაც შეეხება სოციალური და ჯანდაცვის პროგრამების დაფინანსებას, უმეტესი პროგრამების თანხები ჯერ კიდევ არჩევნებამდე იქნა ამოწურული. მინდა გავამახვილო ყურადღება, რომ ბიუჯეტი იგეგმება სამეურნეო წელზე, რომელშიც 12 თვე შედის, თანხები კი ამოიწურა 8-9 თვის ჩათვლით. რბილად რომ ვთქვათ, ბიუჯეტის დამტკიცების დროს არასწორად იქნა გათვალისწინებული სოციალურ-ჯანდაცვითი პროგრამების დაფინანსება. ჩვენ, ,,ქრისტიან-დემოკრატები” ვითხოვდით, სოციალური დახმარების სხვადასხვა პროგრამის დაფინანსება გაზრდილიყო. თუმცა, ამას ხელისუფლება არ თვლიდა საჭიროდ.
ალბათ, როგორც ყოველთვის, ხელისუფლების არგუმენტები იქნება ის, რომ ბიუჯეტი ცოცხალი ორგანიზმია და მასში ცვლილებების შეტანა, თან სოციალური და ჯანდაცვითი პროგრამების გაზრდის კუთხით, ნებისმიერ მოქალაქეს უნდა ეამაყებოდეს. მეორე საკითხია, თუ რამდენად პარტიული თვალთახედვით მიმდინარეობდა სოციალურად გაჭირვებული მოსახლეობის განცხადებების დაკმაყოფილება.
რაც შეეხება მოსაზრებას, რომ ოქტომბრის თვის ხელფასების გაცემა, შეიძლება, შეფერხებით მოხდეს, ნათელი სურათი ოქტომბრის თვის ნახევარში იქნება. ვიმედოვნებ, რომ ეს მხოლოდ ვარაუდად დარჩება და საჯარო მოხელეები, რომელთა სახელფასო ანაზღაურება ადგილობრივ ბიუჯეტზე არის დამოკიდებული, შეუფერხებლად მიიღებენ თავის კუთვნილ ხელფასებს, _ გვითხრა კახა ღლონტმა.
ოზურგეთის მუნიციპალიტეტის საკრებულოს თავმჯდომარე, ალეკო მამეშვილი წერილობით გვპასუხობს, რომ სახელფასო ფონდი გაწერილია მუნიციპალიტეტის 2012 წლის ბიუჯეტით და ამ მხრივ არავითარი პრობლემა, არც ოქტომბრის და არც მომდევნო თვეებში არ არსებობს. დღევანდელი მონაცემებით, ოზურგეთის მუნიციპალიტეტის ბიუჯეტი შესრულებულია 79%-ით, რაც საკმაოდ კარგი მაჩვენებელია. ვფიქრობთ, რომ ნოემბერში ბიუჯეტი ასი პროცენტით შესრულდება.
ის, ასევე, ერთჯერად დახმარებებზეც პასუხობს: _ სოციალური დახმარებებისთვის განკუთვნილი თანხები დაიხარჯა ყველა იმ პროგრამის დასაფინანსებლად, რასაც ითვალისწინებდა ბიუჯეტი. გამომდინარე საარჩევნო პერიოდიდან, ჩვენ არ გვქონდა შესაძლებლობა ბიუჯეტში ცვლილებების გახორციელებისა. როდესაც კანონმდებლობით ბიუჯეტის ცვლილებები უკვე შესაძლებელი გახდება, სოციალურ პაკეტს დაემატება თანხები და შესაბამისად გაგძელდება სოციალური დახმარებების გაცემა, – გვითხრა ალეკო მამეშვილმა.
საკრებულოს ოპოზიციონერი დეპუტატი, ლელა ნაცვალაძე ამბობს, რომ ბიუჯეტის პროექტის შემოტანის დროს, არაერთხელ ითქვა წლის ბოლოსათვის მოსალოდნელ საბიუჯეტო კრიზისის შესახებ:
_ საბიუჯეტო ორგანიზაციების უმეტესობას არ აქვს მითითებული თანხები, რომელიც მათ წლის განმავლობაში ესაჭიროებათ. როცა კითხვებს ვსვამდი, უმრავლესობა მპასუხობდა – შემდეგ დავუმატებთო?! ამ მდგომარეობას ისიც დაემატა, რომ საარჩევნო წელი გახლდათ და ასობით გაიზარდა აღნიშნულ ორგანიზაციებში საშტატო ერთეული, რაც ბუნებრივია, ბიუჯეტში მათი სახელფასო სარგოს არქონაზე მიუთითებს. სწორედ ამიტომ, დასაბუთებით შემიძლია ვთქვა, რომ ნოემბერ-დეკემბრის ხელფასების დარიგება ხელისუფლებას გაუჭირდება. გარდა ამისა, მაქვს ინფორმაცია, რომ წინასაარჩევნოდ, რადგან ბიუჯეტში ცვლილება კანონმდებლობით ვერ მოხდებოდა, ზემოაღნიშნული ორგანიზაციებიდან ”ისესხა” ადგილობრივმა ხელისუფლებამ, “მერე დაგიბრუნებთ” პრინციპით, რაც კანონით დაუშვებელია, _ ამბობს ლელა ნაცვალაძე.
მისივე თქმით, ამ ეტაპზე შეჩერებულია სოციალურად დაუცველ მოქალაქეთა ერთჯერადი დახმარებების გაცემა. მოქალაქეებს, რომლებსაც თვეების წინ აქვთ დაწერილი განცხადებები, პასუხობენ, რომ ბიუჯეტში თანხები არ არის და ვერ დაგაკმაყოფილებთ, სანამ ცვლილებები არ მოხდებაო.
