“გურია ნიუსის” ინფორმაციით, მინისტრი პირადად გაესაუბრება სამხედრო მოსამსახურეებს და მათ შენაერთში უკანასკნელ წლებში არსებული დარღვევებით და მეთაურების საქმიანობით დაინტერესდება.
წყაროების ინფორმაციით, ჯარისკაცებისა და სერჟანტების ფიზიკური და სიტყვიერი შეურაცხყოფა წლების განმავლობაში თავდაცვის მინისტრის მიერ წახალისებულ ქმედებას წარმოადგენდა. ბრიგადებისა და ბატალიონების მეთაურები დასჯის ახალი და ორიგინალური მეთოდების გამოგონებაშიც კი ეჯიბრებოდნენ ერთმანეთს.
“გურია ნიუსი” უკვე წერდა გორის მე-5 ქვეით ბრიგადაში არსებული მდგომარეობის შესახებ, რამაც 51-ე ბატალიონის რიგითი კობა მახარაშვილი თვითმკვლელობამდე მიიყვანა: “სერჟანტები დასჯილ ჯარისკაცს აიძულებდნენ, ხელში დიდი ლოდი აეღო და სამზარეულოსკენ მიმავალი ნაწილის გარშემო ერბინა იქამდე, სანამ ნაწილი სამზარეულომდე არ მიაღწევდა. ჯარისკაცებს წელზემოთ აშიშვლებდნენ, რიყის ქვებზე აწვენდნენ და აიძულებდნენ, ზურგით ეხოხა და ცურვის იმიტაცია გაეკეთებინა. ხშირად ყოფილა, როდესაც სამხედრო მოსამსახურეეები ჩაცუცქულები მიუყვანიათ სასადილომდე. ჯარისკაცებს შეუბრალებლად სცემდნენ. მახსენდება ორი შემთხვევა, როდესაც სამხედროებმა ცემას და წამებას ვერ გაუძლეს და თვითმკვლელობის მიზნით ფანჯრებიდან გადმოხტნენ. საბედნიეროდ, ისინი გადარჩნენ,” _ აცხადებს გიორგი “გურია ნიუსთან” საუბარში ერთ-ერთი სერჟანტი. ის მზად არის ამის შესახებ ხმამაღლა განაცხადოს, თუ ბრიგადაში არსებული მდგომარეობის შესწავლით პროკურატურა დაინტერესდება.
“ერთ საღამოს ნაწილში დავბრუნდი და ვხედავ, მთელი შენობა ზანზარებს და გრიალებს. ასობით ჯარისკაცს აღჭურვილობა ზურგზე აქვს მოკიდებული და სართულებზე არბის და ჩარბის. თურმე, ერთ-ერთ სამხედრო მოსამსახურეს განაწესში ჩასძინებია და ამის გამო მთელი ასეული ისჯებოდა. ბოლოს ერთი ჯარისკაცი ცუდად გახდა და ამით მათი წამებაც დასრულდა,” _ ამბობს “გურია ნიუსთან” საუბარში ერთ-ერთი სერჟანტი.
მთავარმა პროკურორმა არჩილ კბილაშვილმა არ გამორიცხა, რომ გამოძიება სხვა სამხედრო მოსამსახურეების საქმიანობის შესწავლითაც დაინტერესდება. მაღალი ალბათობით, პროკურატურაში, პირველ რიგში, სამხედრო პოლიციის მაღალჩინოსნებს დაიბარებენ, რომლებიც ცემა-წამებაში არაერთმა სამხედრო მოსამსახურემ ამხილა. განსასჯელის სკამზე ოპერატიულ-ტექნიკური დეპარტამენტის იმ თანამშრომლებსაც ვიხილავთ, რომლებიც სამხედრო მოსამსახურეებს უკანონოდ უსმენდნენ და ხშირ შემთხვევაში მათ კონკრეტული პოლიტიკური პირების ფარულ ჩაწერას აიძულებდნენ. “გურია ნიუსის” კითხვას, აპირებს თუ არა აღნიშნული დეპარტამენტის გაუქმებას, თავდაცვის მინისტრმა ასე უპასუხა: “გამორიცხულია ახალი ხელისუფლების მოსვლის პირობებში უკანონო მიყურადება და უკანონო თვალთვალი პოლიტიკური ნიშნით. ყველა შესაძლო სამძებრო თუ ოპერატიულ-ტექნიკური ღონისძიება გახორციელდება მხოლოდ და მხოლოდ კანონის ფარგლებში.”
ალასანიამ “ძალიან სამწუხარო მოვლენა” უწოდა გაერთიანებული შტაბის უფროს გიგი კალანდაძის დაკავებას. სავარაუდოდ, დაკავების და გათავისუფლების სერია თავდაცვის სამინისტროში გაგრძელდება და პირველ ეტაპზე სამსახურის დატოვება მოუწევთ კალანდაძის მოადგილეებს მერაბ კიკაბიძესა და ივერი სუბელიანს. გამორიცხული არ არის გამოძიება მათი საქმიანობითაც დაინტერესდეს.
“გურია ნიუსი” წერდა, რომ ივერი სუბელიანმა პირადად შეარჩია პოლკოვნიკები და წარმომავლობის მიხედვით სხვადასხვა რეგიონებში არჩევნების გასაყალბებლად გაგზავნა. მაღალი რანგის ოფიცრები სამი თვის მანძილზე სამსახურში არ ცხადდებოდნენ და “ნაციონალური მოძრაობის” მაჟორიტარი კანდიდატების წინასაარჩევნო კამპანიაში იყვნენ ჩაბმულნი.
