საკანონმდებლო ცვლილებების მოლოდინში, რაც მანდატურის უფლებებს მნიშვნელოვნად ზღუდავს, ისინი ძალიან ფრთხილობენ და როგორც 53-ე სკოლის ერთ-ერთი მასწავლებელი ამბობს, საერთოდ აღარ გამოდიან მათთვის გამოყოფილი ოთახიდან. შესაბამისად, სკოლებში დისციპლინამ მოისუსტა, ”შატალოზე” წასვლის ტრადიცია დაბრუნდა და მე-6 გაკვეთილს 4-5 მოსწავლეზე მეტი არ ესწრება.
ნაციონალი დეპუტატი სერგო რატიანი რაღაც სტატისტიკას იშველიებს, რომლის მიხედვითაც უკანასკნელ პერიოდში სკოლებში 300%-ით მოიმატა დარღვევების მაჩვენებელმა.
ელისო ჩაფიძე ამ სტატისტიკას უნდობლად უყურებს და ამბობს, რომ სტატისტიკის გაყალბება “ნაციონალური მოძრაობის” მრავალგზის ნაცადი მეთოდია.
განათლების სამინისტრო მანდატურის ინსტიტუტზე უარს არ ამბობს, თუმცა, ინიცირებული კანონპროექტით, მათი უფლებები მნიშვნელოვნად იზღუდება. საპარლამენტო უმცირესობა ზოგადად მიესალმება სამინისტროს გადაწყვეტილებას სკოლებში მანდატურის შენარჩუნების შესახებ და მოქმედი კანონმდებლობის ნაკლოვანებებზე თავადაც მიუთითებს.
მაგალითად, ნაციონალი ლევან ბეჟაშვილი ფიქრობს, რომ მანდატურისთვის გათვალისწინებული ასაკობრივი ცენზი _ 20 წელი, სასურველია, გაიზარდოს და მას ქართული ენის ცოდნის გარდა ბავშვებთან მუშაობის გამოცდილებაც მოეთხოვოს.
მთავრობის საპარლამენტო მდივნის შალვა თადუმაძის თქმით, ასაკობრივი ცენზის გაზრდა, ბევრ მანდატურს სამსახურს დააკარგინებს. გარდა ამისა, წყალში ჩაიყრება სახელმწიფოს მიერ მათ დატრენინგებაზე გაწეული ხარჯები.
განათლების სამინისტროს მიერ ინიცირებულ კანონპროექტში ცვლილება პარლამენტის განათლების, მეცნიერების და კულტურის კომიტეტსაც შეაქვს.
მანდატურის დანიშვნა-გათავისუფლება სკოლის დირექტორის პრეროგატივაა _ ეს ინიციატივა კომიტეტის თავმჯდომარე ივანე კიღურაძეს ეკუთვნის: ”მანდატურს უნდა ნიშნავდეს და ათავისუფლებდეს სკოლის დირექტორი. ის არ უნდა ინიშნებოდეს გარედან და მოსწავლეების და პედაგოგების გასაკონტოლებლად სკოლაში საგანგებოდ არ უნდა იყოს მივლენილი. მანდატური უნდა გახდეს სკოლის თანამშრომელი. ამ საკითხზე კომიტეტსა და განათლების სამინისტროს შორის კონსენსუსი მიღწეულია,” _ ამბობს კიღურაძე.
კომიტეტის წევრი სერგო რატიანი მიიჩნევს, რომ სკოლის უსაფრთხოებაზე პასუხისმგებლობა განათლების სამინისტრომ უნდა აიღოს თავის თავზე და არა სკოლის დირექტორმა, თუმცა, ის წინააღმდეგი არ არის მანდატურის მიღება-გათავისუფლების საკითხი დირექტორმა გადაწყვიტოს.
დღეს პარლამენტში აღნიშნული საკანონმდებლო ცვლილებათა პროექტის მეორე მოსმენა გაიმართა.
კანონპროექტის თანახმად, ზუსტდება ტერმინი _ “პირადი გასინჯვა” და მასთან დაკავშირებული პროცედურები, მანდატურის მიერ ფიზიკური ძალისა და სპეციალური საშუალებების გამოყენების წესი, ასევე, ზუსტდება მანდატურის სამსახურში დანიშვნისათვის დადგენილი მოთხოვნები და მისი უფლება-მოვალეობები.
