რაში დაიხარჯა მილიონობით თანხა?
IDFI წლების განმავლობაში ცდილობდა მოეპოვებინა ინფორმაცია საქართველოს კულტურისა და ძეგლთა დაცვის სამინისტროს მიერ ღონისძიებებზე გაწეული ხარჯების შესახებ. ორგანიზაციამ მხოლოდ ხელისუფლების ცვლილების შემდეგ მიიღო საჯარო ინფორმაცია – იმ სოციალური და კულტურული ღონისძიებების ჩამონათვალი და დაფინანსების ოდენობა, რომლებიც 2012 წლის განმავლობაში განახორციელა სამინისტრომ.
მიუზიკლი “ქეთო და კოტე“ – 385 500 ლარი
სამინისტროდან მიწოდებული ინფორმაციიდან ჩანს, რომ 2012 წლის თებერვლის თვეში, კულტურისა და ძეგლთა დაცვის სამინისტროს ბიუჯეტიდან ყველაზე მსხვილი თანხები გამოიყო მიუზიკლის “ქეთო და კოტე” ორგანიზებისთვის (385 500 ლარი); ბათუმში ლუჩია და ლამერმურის ოპერის დადგმისთვის (412 800 ლარი) და ქ. ბათუმში ჯაზ-ფესტივალის ჩატარებისთვის (460 000 ევრო). საინტერესოა, აგრეთვე, ის ფაქტი, რომ საჩხერეში 13 იანვარს გამართულ საახალწლო კონცერტთან დაკავშირებული ხარჯების (76 058 ლარი) ანაზღაურება მოხდა თითქმის ერთი თვის შემდგომ, 7 თებერვალს გაფორმებული ხელშეკრულების საფუძველზე.
2012 წლის მარტი – ნინო ანანიაშვილის და ვახტანგ კიკაბიძის კონცერტები
მარტის თვეში 310 000 ლარით დაფინანსდა ნინო ანანიაშვილის “30 წლის აღსანიშნავი” ღონისძიება და აგრეთვე 180 000 ლარით – მომღერალ ვახტანგ (ბუბა) კიკაბიძის საკონცერტო ტურნე პოლონეთსა და იტალიაში.
2012 წლის მაისი – ისევ “ქეთო და კოტე“
მაისის თვეში, კულტურისა და ძეგლთა დაცვის სამინისტროს ბიუჯეტიდან ყველაზე დიდი ოდენობით თანხა (564 972 ლარი და 207 298 აშშ დოლარი) გამოიყო 26 მაისს ქუთაისში საზეიმო კონცერტის გამართვისთვის.
500 000 ლარით დაფინანსდა საერთაშორისო ფესტივალი Tbilisi Open Air Altervision. 298 705 ლარი გამოიყო მიუზიკლის “ქეთო და კოტე” ორგანიზებისთვის, 30 575 ლარით დაფინანსებული იქნა მომღერლის მერაბ სეფაშვილის კონცერტი.
2012 წლის ივნისი _ შარლ აზნავურის კონცერტი
ივნისის თვეში, ყველაზე დიდი თანხა, 1 356 800 ლარი გამოყოფილი იქნა ქ. ახალციხეში კონცერტის ჩატარებისთვის. აღნიშნული ღონისძიება მიეძღვნა რაბათის კომპლექსის გახსნას: “16 აგვისტოს ახალციხეში, განახლებული რაბათის ციხის გახსნისადმი მიძღვნილი ზეიმის ფარგლებში, კონცერტი გამართა სომხური წარმოშობის ფრანგმა მომღერალმა და მსახიობმა შარლ აზნავურმა, რომელიც წარმომავლობით ახალციხიდანაა. გახსნის ცერემონიას და კონცერტს დაესწრნენ საქართველოს ხელისუფლების წარმომადგენლები, საქართველოს პრეზიდენტი მიხეილ სააკაშვილი და მისი მეუღლე სანდრა რულოვსი.”
ამავე პერიოდში, 480 000 ლარით დაფინანსდა პროექტი “მე მიყვარს საქართველო”, რომელიც საქართველოს რეგიონებს მოიცავდა და პატრიოტული სიმღერების ავტორებისა და მათი კომპოზიციების აღმოჩენით იყო დაკავებული.
2012 წლის ივლისი – მიუზიკლი “ვერის უბნის მელოდიები“
ივლისის თვე გამორჩეული იყო სხვადასხვა ღონისძიებებისა და მსხვილი პროექტების დაფინანსების კუთხით. თბილისსა და ოზურგეთში მიუზიკლის “ვერის უბნის მელოდიების” დადგმისთვის გამოიყო 1 716 985 ლარი. მოცეკვავე ხოაკინ კორტესის კონცერტი ქ. ბათუმში დაჯდა 550 000 ლარი.
შედარებით “მოკრძალებული” თანხები გამოიყო ცნობილი მუსიკოსის გორან ბრეგოვიჩისა (79 223 ლარი) და ანაკლიაში ჯგუფ “33 ა”-ს (104 229 ლარი) კონცერტების ორგანიზებისთვის.
2012 წლის აგვისტო ლექს-სენის კლიპები
აგვისტოს თვეში ყველაზე მსხვილი დაფინანსება (698 399 ლარი) მიიღო პროექტმა “მეამაყება საქARTველო” (საქართველოს რეგიონებში კონცერტების გამართვა ახალგაზრდების მონაწილეობით). 208 004 ლარი გამოიყო მომღერალ ლექსო ქავთარაძის (ლექს-სენის) სამი მუსიკალური კლიპის გადაღების, ორი ახალი სიმღერის ჩაწერისა და 2012 წლის 26 აგვისტოს ქ. ბათუმში 2 საათიანი კონცერტის ჩატარებისათვის.
