პრეზენტაციაზე, მინისტრმა ირაკლი ღრიბაშვილმა განაცხადა, რომ კოდექსი გამოხატავს შსს სისტემის ყველა თანამშრომლის ნებას – სანიმუშოდ ემსახუროს საზოგადოებას. ასევე, ქცევის წესების და მოთხოვნების დარღვევის შემთხვევაში, პოლიციელს დაეკისრება დისციპლინური პასუხისმგებლობა.
“ჩემი აზრით, ეს არის ძალიან მნიშვნელოვანი პრეზენტაცია. ერთ-ერთი მნიშვნელოვანი დაპირება, რითაც ჩვენ ხელისუფლებაში მოვედით, იყო ის, რომ სისტემა გახდებოდა დეპოლიტიზირებული, თითოეული თანამშრომელი ჩადგებოდა საზოგადოების სამსახურში. აღნიშნული დაპირების შესრულების მიზნით, აუცილებელი იყო პოლიციელის საქმიანობაში იმ ეთიკური ნორმების განსაზღვრა, რომელთა გახორციელება საზოგადოებაში პოლიციისადმი ნდობის განმტკიცების საწინდარი იქნება.
პირველ რიგში, თავად პოლიციელს უნდა ჰქონდეს გააზრებული, რომ ის სამართლიანი და მიუკერძოებელი სახელმწიფოს წევრი და წარმომადგენელი, საზოგადოების თითოეული წევრის მეგობარი და დამხმარეა. ვაცნობიერებთ რა, იმას რომ, პროფესიონალიზმი და ეთიკური ქმედება პოლიციელის საზოგადოებაში ნდობის მოპოვების მთავარი საფუძველია, პოლიციელებისთვის შევიმუშავეთ ეთიკის კოდექსი. კოდექსში პოლიციელის საქმიანობის პრინციპებთან ერთად, დეტალურად არის გაწერილი პოლიციელის მიუკერძოებლობის ნორმები, რეგლამინიტირებულია მისი კოლეგებთან ურთიერთობა, დაკავებულ პირთა მიმართ დამოკიდებულება, სამსახურის გარეთ მოქცევა, ძალისა და ცეცხლსასროლი იარაღის გამოყენება, გამოძიების სტადიაზე სტანდარტული ქმედებები და სხვა.
პოლიციელის პირადი პასუხისმგებლობის და კანონიერების განმტკიცების მიზნით, კოდექსში მოცემულია ისეთი ნორმა, რომლის თანახმად, წინასწარი შეცნობით პოლიციელის მიერ მართლსაწინააღმდეგო ბრძანების შესრულება სასტიკად აკრძალულია. კოდექსში განმტკიცებული ნორმების დაცვით, პოლიციელი პატივს მიაგებს თავის პროფესიულ ღირსებას, საზოგადებას და სამინისტროს. კოდექსი გამოხატავს შსს სისტემის ყველა თანამშრომლის ნებას, სანიმუშოდ ემსახუროს საზოგადოებას.
პოლიციელის ეთიკის კოდექსით განსაზღვრული ქცევის წესების და მოთხოვნების დარღვევის შემთხვევაში, პოლიციელს დაეკისრება დისციპლინური პასუხისმგებლობა საქართველოს მოქმედი შესაბამისი კანომდებლობით და საქართველოს შინაგან საქმეთა მინისტრის ბრძანებით განსაზღვრული წესით. აქვე მინდა აღვნიშნო, რომ ახლო მომავალში, საზოგადოებას გავაცნობთ პოლიციის შესახებ კანონპროექტს, რომელზეც საფუძვლიანად ვმუშაობთ,“- განაცხადა ირაკლი ღარიბაშვილმა.
მინისტრის თქმით, ახალ ეთიკურ კოდექსს სამინისტროს ყველა თანამშრომელი უერთდება, თუმცა, ამავე პრეზენტაციაზე სამწუხარო მაგალითი დაფიქსირდა: ღონისძიების გასაშუქებლად სასტუმრო ,,რედისონ ბლუ ივარიაში” მისულ სტუმრებს, მათ შორის მედიის წარმომადგენლებს, ქართულ-ინგლისურ ენაზე დაბეჭდილი “საქართველოს პოლიციის ეთიკის კოდექსის” სამუშაო ვარიანტი დახვდათ. სრულყოფილი გაშუქებისა და საზოგადოების ინფორმირებისთვის, დოკუმენტის ხელთ ქონა, რომ აუცილებელია, ეჭვს არ უნდა იწვევდეს, თუმცა, შსს სამინისტროს საზოგადოებასთან ურთიერთობის სამსახურის უფროსი, ნინო გიორგობიანი, როგორც ჩანს, ასე არ ფიქრობს – მან ჟურნალისტებს განგვიცხადა, რომ პოლიციის ეთიკის კოდექსის ბეჭდური ვერსია მხოლოდ სტუმრებისთვის იყო განკუთვნილი და ჟურნალისტებს ხელიდან ააცალა დოკუმენტი!
