“ძალიან ინტენსიურად მიმდინარეობს სტრასბურგის საქმებთან დაკავშირებით მომჩივან მხარესთან მორიგებაზე მუშაობა. ამ დროისათვის, იუტიციის სამინისტროს მიმართა დაახლოებით 30-მდე მომჩივანმა, მაგრამ არიან მომჩივნები რომლებიც უშუალოდ სტრასბურგის სასამართლოს მიმართავენ მორიგების მოთხოვნით. მჯერა,რომ ყველაზე დიდი საქმეები, იქნება ეს დასხივებულების ცნობილი საქმე, სადაც სახელმწიფო უკვე რამდენიმე წელია ალოდინებს ძალიან სერიოზულად დაზიანებულ ადამიანებს და არ უხდის თანხას, რაც ეკუთვნით, ამ საქმიდან დაწყებული და რამდენიმე პატიმრის საქმით დამთავრებული, დასრულდება მორიგებით.” _ განაცხადა წულუკიანმა.
წულუკიანის თქმით, მორიგება უკვე გაფორმდა c ჰეპატიტით დაავადებულ პატიმრებთან, რომლებმაც ციხეში მათ მიმართ არასათანადო მოპყრობა სტრასბურგის სასამართლოში გაასაჩივრეს.
“ჩვენ ვმუშაობთ ამ საქმეებზე, რამდენიმე მორიგება უკვე მიღწეულია, ეს ეხება ჰეპატიტით დაავადებულ პატიმრებს,მსადაც მორიგება უკვე გავაფორმეთ. ხოლო იქ, სადაც არ იქნება მორიგება, სახელმწიფო ანუ დავის მხარე მიიჩნევს რომ საქმე მაინც უნდა დასრულდეს და დავადგებით ცალმხრივი დეკლარაციების გზას” _ განაცხადა წულუკიანმა.
იუსტიციის მინისტრმა სტრასბურგის სასამართლოდან ქართული საქმების წარმოების ინიციატივა გასული წლის ნოემბერში გააჟღერა.
“დღეს სასამართლოს აქვს 700 დასაბუთებული ქართული საქმე. ამდენივეა ერთი შეხედვით დაუსაბუთებელი საქმეებიც. 700 დასაბუთებული საქმე არის ძალიან ბევრი საქართველოსთვის. მაგალითისთვის, საფრანგეთს აქვს 60 დასაბუთებული საქმე. ჩვენი მიზანია, განვტვირთოთ ევროპული სასამართლო ქართული საჩივრებისგან და კულტურად დავამკვიდროთ ის, რომ ადამიანის უფლებები გვარდებოდეს ქვეყნის შიგნით და ადამიანებს არ უწევდეთ საზღვარგარეთ ამტკიცონ საკუთარი სიმართლე,” _ განაცხადა ნოემბერში სტრასბურგიდან დაბრუნებულმა იუსტიციის მინისტრმა.
მისი თქმით, ქართული მხარის ინიციატივას სასამართლო ხალისით შეხვდა და მხარეებს შორის შეთანხმებაც შედგა: “700 მიმდინარე საქმეზე, რომელიც არის დასაბუთებული, ადრე თუ გვიან დადგება დარღვევის გადაწყვეტილება და ბიუჯეტიდან ძალიან დიდი თანხა გვექნება გადასახდელი. ამიტომაც, პირველადი შეთანხმების თანახმად, მიმდინარე საქმეებზე, როგორც კი მათ შესახებ ინდივიდუალურად შეგვატყობინებს სტრასბურგის სასამართლო, ჩვენ მომჩივან მხარესთან დავიწყებთ მოლაპარაკებას მორიგების თაობაზე. რაც შეეხება პოტენციურ საქმეებს (ადამიანის უფლებათა დაცვის მხრივ 4 კვირაში ვერ მოგვარდებოდა სიტუაცია), რომლებიც მომავალში შევა ევროპის სასამართლოში, ჩვენ შევეცდებით, რომ სისტემური პრობლემები, რომელთა იდენტიფიკაციაც პრაქტიკულად მომხდარია, მოვაგვაროთ ქვეყნის შიგნით მანამდე, სანამ ის წავა სატრასბურგის სასამართლოში,” _ განაცხადა მინისტრმა.
იუსტიციის სამინისტრომ მიმართა ყველა იმ ადამიანს, ვისაც სტრასბურგის სასამართლოში საჩივარი აქვს შეტანილი, დაიწყონ მოლაპარაკება ხელისუფლებასთან: “თუკი მათ მიაჩნიათ, რომ ხელისუფლების ცვლილების შემდეგ გაჩნდა შანსი, მათი საქმე მოგვარდეს ქვეყნის შიგნით, არ დაელოდონ სტრასბურგის სასამართლოს გადაწყვეტილებას, რასაც ხშირად 4-5 წელი ჭიანურდება. ჩვენ ვართ სახელმწიფო და ვართ იმისათვის, რომ ადამიანის უფლებებთან დაკავშირებული მათი პრობლემა მოვაგვაროთ,” _ განაცხადა წულუკიანმა.
