სოფლის მეურნეობის მინისტრის დავით კირვალიძის განცხადებით, შეღავათიანი აგროკრედიტის დეტალებზე მუშაობა მიმდინარეობს და მალე დასრულდება. პროექტის ფარგლებში 3 სახის საკრედიტო პროდუქტი მომზადდება.
„შეღავათიანი აგროკრედიტის პროექტის“ ფარგლებში მცირე ფერმერებს შეეძლებათ საწარმოო სეზონის დასაწყისში 5 000 ლარამდე უპროცენტო სასაქონლო კრედიტი უზრუნველყოფის გარეშე მიიღონ. საწარმოო სეზონის დასრულების შემდეგ კი ისინი კრედიტის გაცემის მომენტისთვის დაფიქსირებულ საცალო ფასს, დამატებითი პროცენტის დარიცხვის გარეშე გადაიხდიან.
„მიკრო საფინანსო ორგანიზაციებთან შეხვედრა გვქონდა. მათი განმარტებით, მცირე ფერმერების წლიური მოთხოვნა სესხზე 5000 ლარს არ აღემატება. მცირე ფერმერებისთვის შეღავათიანი აგროკრედიტი თანხის გაცემას არ გულისხმობს, არამედ არის სასაქონლო განვადება, რომელსაც გასწევენ დისტრიბუტორ-დილერები და საფინანსო ინსტიტუტები. მოგეხსენებათ, რომ ჩვენ მცირე ფერმერებს გადავცემთ სასოფლო-სამეურნეო ბარათებს, რომლითაც სასოფლო-სამეურნეო დანიშნულების საქონელისა და ინვენტარის ყიდვა შეეძლებათ, მაგრამ თუ კი მცირე ფერმერისთვის ეს საკმარისი არ იქნება, საშუალებას ვაძლევთ სპეციალურად რეგისტრირებულ მაღაზიაში გააფორმეოს სასაქონლო განვადება, გაიტანოს საჭირო პროდუქცია და წლის ბოლოს ყოველგვარი საპროცენტო დანამატის გარეშე მხოლოდ პროდუქციის ღირებულება გადაიხადოს. პროცენტსის დაფარვა კი ფონდიდან მოხდება,“ – აცხადებს დავით კირვალიძე.
მეორე საკრედიტო პროდუქტი საშუალო და დიდი ფერმერებისთვისაა მომზადებული. მათ საბრუნავი კაპიტალის დასაფინანსებლად წლის მანძილზე 5 ათასიდან 100ათას ლარამდე თანხა სჭირდებათ.სოფლის მეურნეობის მინისტრის განცხადებით, კრედიტის ვადა ერთ წლამდეა. რაც შეეხება წლიურ საპროცენტო განაკვეთს, ის 7-8%-ზე მაღალი არ იქნება.
„საშუალო და დიდი ფერმერების წლიური მოთხოვნა 5 ათასიდან 100 ათას ლარამდე მერყეობს. მათ საოპერაციო სასაქონლო თანხა ესაჭიროებოდათ, რისთვისაც ძალიან მაღალი საპროცენტო განაკვეთის გადახდა უწევდათ. ეს ხშირად 30 პროცენტს სცდებოდა. ახლა საშუალო და დიდი ფერმერები საოპერაციო თანხას 7-8 პროცენტის ფარგლებში მიიღებენ. 50 ათას ლარამდე თანხას მიკროსაფინანსო ორგანიზაციები გასცემენ. 50 ათასის ზემოთ კი ეს ბანკების სეგმენტია,“ – აღნიშნა სოფლის მეურნეობის მინისტრმა.
მესამე სახის საკრედიტო პროდუქტი გულისხმობს სასოფლო-სამეურნეო საწარმოების დაფინანსებას გრძელვადიანი და შეღავათიანი კრედიტით. მოთხოვნილი თანხა 1 მლნ ლარს არ უნდა აღემატებოდეს. საშუალოდ წლიური განაკვეთი კი 3% იქნება.
,,დაფინანსდება სასოფლო-სამეურნეო საწარმოები, კერძოდ: სასაწყობე, დამფასოებელი, სამაცივრე მეურნეობები და გადამამუშავებელი საწარმოები, ასევე თანამედროვე ფერმები, სასათბურე მეურნეობები და სხვა. მათთვის ხელმისაწვდომი გახდება იაფი და გრძელვადიანი ფულადი რესურსი. 2013 წელს ამ სქემით მხარდაჭერილი იქნება მინიმუმ 60-მდე საწარმო. ყველა იმ ბიზნესმდგრად განაცხადს, რომელიც ბანკის მიერ სასესხო პორთფელში იქნება აღებული, ფონდის მხრიდან მხარდაჭერა აღმოუჩნდება. საპროცენტო განაკვეთი 3 პროცენტზე მაღალი არ იქნება. თავად ფონდი არც სესხს გასცემს და არც აფინანსებს, რომ საბანკო სექტორს ხელი არ შეუშალოს. დამფინანსებელი საბანკო სექტორია, ხოლო ფონდი მხარს უჭერს საპროცენტო განაკვეთის დაწევაზე და ასევე გრძელვადიანი კრედიტის აღების შესაძლებლობის მისაღებად,“ – განაცხადა სოფლის მეურნეობის მინისტრმა დავით კირვალიძემ.
