ისინი კატეგორიულად ითხოვდნენ უკანონოდ წართმეული კუთვნილი მიწის ფართობების უკან დაბრუნებას და დაკანონებას, რაშიც ხელს დღემდე უშლიან, მათივე თქმით, “თვითმარქვია ინვესტორი და ადგილობრივი ხელისუფლების წარმომადგენლები“.
აღნიშნულის შესახებ, “გურია ნიუსი“ რამდენჯერმე წერდა, თუმცა, მას შემდეგ პრობლემა კიდევ უფრო დამძიმდა.
15 თებერვალს, ოზურგეთის მუნიციპალიტეტის დაბა ლაითურის მოსახლეობა ოზურგეთის მუნიციპალიტეტის გამგეობის წინ კიდე ერთხელ შეიკრიბა, თუმცა ამჯერად სხვა პრობლემების მოგვარების მიზნით.
მძიმე სოციალური ფონი, უსახსრობა, წყალი, გაზი, გზა, დასაქმება_ ეს ის პრობლემებია, რის მოგვარებასაც დაბა ლაითურის მცხოვრებლები ოზურგეთის მუნიციპალიტეტის გამგებელს კოტე შარაშენიძეს სთხოვდნენ. მათი განცხადებით, დაბა ლაითურში უკანონოდ იჩეხება ქარსაფარი ზოლი. როგორც ისინი აცხადებდნენ, ხელისუფლების შეცვლის შემდეგ, ეს პრობლემები კვალავ გადაუჭრელია.
_დღეს ძალაუფლება მაინც “ნაციონალების” ხელშია და მართავენ ყველაფერს. ჩამოგვართვეს საძოვრები, დაგვიტოვეს მარტო გზა, მიწები წაგვართვეს, წყალი არ გვაქვს, გზა საშინელ მდგომარეობაშია, რამდენიმე სოფლის დამაკავშირებელი ხიდი დანგრეულია და როდის გააკეთებენ ესეც არ ვიცით, _ აცხადებდნენ გამგეობის წინ შეკრებილნი.
მოსახლეობას ოზურგეთის მუნიციპალიტეტის გამგებელი კოტე შარაშენიძე შეხვდა და გაესაუბრა. ის მათ ადგილზე ჩასვლას და პრობლემების შესწავლას დაპირდა.
_ მეექვსე რაიონში ჭრიან ნაძვებს, ჩვენ არავინ არაფერს გევკითხება, ვის აქვს ამის უფლება? ყველანაირად გაგვანადგურეს, საქონლის საძოვრები წაგვართვეს, იგორ ასკაროვი პირდაპირ შეურაცხყოფაზე გადადის. მოკვდა 11 შვილის დედა და ვითხოვეთ ერთი ძირი ნაძვი კონახისთვის. არ შეიძლებაო, გვითხრეს. უცხოელისთვის მთელი ქარსაფარი ზოლის განადგურება შეიძლება? დაგვეხმარეთ ამ პრობლემის მოგვარებაში _ მიმართეს შარაშენიძეს ლაითურის მცხოვრებლებმა.
ოზურგეთის მუნიციპალიტეტის გამგებლის მოვალეობის შემსრულებელი კოტე შარაშენიძე:
ადგილზე გავუშვი შესაბამისი სამსახურების წარმომადგენლები, რომლებიც აღნიშნულ საკითხ,ს ქარსაფარ ზოლთან დაკავშირებით, სამართლებრივად შეისწავლიან და შესაბამის რეაგირებასაც მოვახდენთ, რა თქმა უნდა. როგორც მე ვიცი, მოხდა კიდეც ამ ადამიანის დაჯარიმება და მიმდინარეობს საქმის ძიება, რაც შეეხება დაბა ლაითურში ხიდის აღდგენას, მე ამ პრობლემას ჩემს თავზე ვიღებ, რომ მისი რეაბილიტაცია, რაც შეიძლება, მალე მოხდეს, ინფრასტრუქტურის პრობლემებიც ეტაპობრივად გადაიჭრება.
