“მე ვფიქრობ, რომ დამახინჯებულია ინტერპრეტაცია მეჩეთის აშენებასთან დაკავშირებით. დღევანდელმა მთავრობამ და საგარეო საქმეთა სამინისტრომ დაადასტურა, რომ მსგავსი შინაარსის პოლიტიკური შეთანხმება არ არსებობს. სიტყვა-სიტყვით წერია, არავითარი ნაცვალგება არ იქნება. ძალიან მისასალმებელია, ის ფაქტი, რომ იშხანი და ოშკი გადარჩება. ანუ თურქეთის სახელმწიფომ აღიარა, რომ ის კულტურული მემკვიდრეობის ძეგლი არა მარტო ქართველთა ინტერესში შედის, არამედ ეს მსოფლიო კულტურული მემკვიდრეობის ძეგლიცაა და თურქეთის სახემწიფოსაც უნდა აწყობდეს, რომ ეს უმნიშვნელოვანესი ძეგლი გადარჩეს” – ამბობს დუმბაძე.
მურმან დუმბაძე ამბობს, რომ ბათუმში მეჩეთის აშენების საკითხი დიდი ხანია დგას და ხელისუფლება ამის წინააღმდეგი არ არის.
“მეჩეთის მშენებლობის საკითხი საკმაოდ დიდი ხანია დგას ბათუმში. საქართველოს მთავრობას, რეგიონის მთავრობას მუსლიმანთა ნაწილმა წერილობით მიმართა მეჩეთის აშენებასთან დაკავშირებით. რეგიონის მთავრობა და ქალაქის მთავრობა არ არის წინააღმდეგი აშენდეს მეჩეთი, იმიტომ რომ თუ მრევლი გაიზარდა და მეჩეთი არ ყოფნით, მეჩეთი უნდა აშენდეს. ამის წინააღმდეგი არავინ არ არის. ჟურნალისტები ხშირად მეკითხებიან, თქვენ მეჩეთის აშენების წინააღმდეგები ხართო. მე არ ვარ მეჩეთის აშენების წინააღმდეგი. უფრო მეტიც ის მეჩეთი, რომელიც ბათუმში ფუნქციონირებს, მის რესტავრაციაში 90-იან წლებში პირადად მე მაქვს მონაწილეობა მიღებული.” – განაცხადა დუმბაძემ – ” საბოლოოდ უნდა ჩამოვყალიბდეთ, იმაზე რომ ბათუმში მეჩეთის აშენება არის შესაძლებელი თუ ამას მოისურვებს ქართველი მუსლიმანი მრევლი”.
მურმან დუმბაძე ასევე ამბობს, რომ სულთან აზიზის სახელობის მეჩეთის აშენება არც იგეგმებოდა და არც ახლა იგეგმება. მისი თქმით ეს ქართველების მხრიდან პროვოცირებული თემა იყო.
“აზიზიეს მეჩეთის მშენებლობა საქართველოს და თურქეთის სახელმწიფოების მოლაპარაკების შედეგად არ იგეგმება. მას შემდეგ რაც მე გავხდი საჯარო მოხელე, ვესაუბრე თურქეთის კონსულს, გენერალურ კონსულს და მე მითხრეს და დამიდასტურეს ნამდვილად, რომ თურქეთის მხარე ამ საკითხს არც არასოდეს აყენებდა. აზიზიეს მეჩეთის საკითხი შეგდებული იყო ასე ვთქვათ და პროვოცირებული იყო ქართული მხარის მიერ. ანუ ნაცვალგების პრინციპით უნდოდათ ოშკისა და იშხანის გადარჩენა აზიზიეს მეჩეთის აშენების სანაცვლოდ” – ამბობს დუმბაძე.
საზოგადოებას მურმან დუმბაძის მიერ მეჩეთის აშენების წინააღმდეგ გაკეთებული განცხადებები კარგად ახსოვს. ეს მისი წინასაარჩევნო კამპანიის ერთ-ერთი ნაწილი იყო. მურმან დუმბაძე სწორეს მეჩეთის აშენების შესახებ გაკეთებული განცხადებები გამო გარიცხეს “რესპუბლიკური” პარტიიდან.
