“პასუხისმგებლობა და თავისუფლება ერთმანეთისგან განუხრელია. უნდა ვისწავლოთ თავისუფლებაში ცხოვრება ჩვენს სოფელსა და ქალაქზე. უნდა ვისწავლოთ ჩვენს ქვეყანაზე პასუხისმგებლობის აღება. უნდა გავიაზროთ ის, თუ რას ნიშნავს თავისუფლება. თავისუფალი ჰქვია იმას, ვინც თავის გადაწყვეილებას ემორჩილება. იმას ვინც არ გაექცევა თავის არჩევანს. ანუ პასუხისმგებლობას იღებს თავის გადაწყვეტილებებზე. ეს არის ქვეყნის დემოკრატიული მმართველობა. ასეთია ევროპული ქვეყნების ცხოვრების წესი და ჩვენც სწორედ აქეთკენ უნდა მივისწრაფოდეთ.
ჩვენი ქვეყნის სწრაფვა ევროპისკენ არავის კუთვნილება არ არის. გაიხსენეთ ჩვენი ისტორია. საქართველოს, საუკუნეების განმავლობაში, ყოველთვის ევროპისკენ ეჭირა თვალი. ევროპა საქართველოსთვის მხოლოდ პოლიტიკური არჩევანი არ იყო. ამას მოწმობს ჩვენი სარწმუნოება, კულტურა, ქართველი კაცის მსოფმხედველობა. სულხან-საბას, ილიას და ვაჟას ქვეყანაში ვერავინ დაიჩემებს ვერც “ნაციონალური მოძრაობა” და ვერც “ქართული ოცნება”, რომ ევროპული გეზი მისი კუთვნილებაა. ტყუილია! ტყუილია, რომ ევროპული არჩევანი “ნაციონალური მოძრაობის” კუთვნილებაა, რასაც იჩემებენ რატომღაც დაჟინებით. ტყუილია, რომ ვინემ აპირებს ამ გზიდან გადახვევას. იცით, რომ ახალ კონსტიტუციაში უნდათ შეიტანონ ასეთი ჩანაწერი: რომ არასდროს არ გადავუხვევთ ევროპის გეზისაკენ და ჩვენ აუცილებლად გავხდებით ნატოს წევრი. ღია კარებს ამტვრევენ. ფიქრობენ, რომ ეს მათ მოიგონეს და ეხლა როგორმე უნდათ ჩანაწერი გააკეთონ, რომ ჩვენ ხიფათს არ გადავეყაროთ და “ქართული ოცნება” გზიდან არ აცდეს. მე მგონი, ცოტა სასაცილოა. ის ხალხი, რომელიც ასეთ კანონს იტოვებს კონსტიტუციაში, თანაც დააკანონეს და ისეთი უფლებამოსილება მისცეს პრეზიდენტს, პრაქტიკულად დიქტატორული, აი ეს ხალხი გვედავება ჩვენ დღეს, რომ კონსტიტუციაში შევიტანოთ ისეთი ჩანაწერი, რამეთუ თურმე ჩვენ საშიშნი ვართ.
ეს არჩევანი ქართველმა ხალხმა დიდი ხანია გააკეთა. თქვენ კარგად იცით ჩვენი ისტორია და რატომღაც, ეს ხალხი ისტორიასაც მიიწერდნენ, თთქოსდა მათი მოსვლით დაიწო და ახლა უნდათ მიისაკუთრონ, რომ თურმე ევროპული გეზი სააკაშვილმა მოიგონა და ჩვენ, ჩვენს წინაპარს ამაში არავითარი დამსახურება არ აქვს. რა თქმა უნდა, ეს ანეკდოტური და აბსურდულია. სწორედ ამ ისტორიული მიზნის მისაღწევად არის საჭირო ევროკავშირსა და ნატოში გაწევრიანება. ამ გზას ჩვენი ხელისუფლება უპირობოდ ადგას. ამ გზაზე, ყველაზე მეტად, ჩვენი სტარტეგიული პარტნიორი ქვეყანა ამერიკის შეეერთებული შტატები გვეხმარება და ამისთვის კიდევ ერთხელ მინდა მადლობა გადავუხადო მათ.” _ განაცხადა ივანიშვილმა.
