დღეს, ლანჩხუთის მუნიციპალიტეტის გამგეობაში ჩატარებულ საკრებულოს სხდომაზე, დღის წესრიგში 12 საკითხი იდგა. სხდომაზე განცხადება გააკეთეს მუზეუმის ხელმძღვანელმა მაია ჩხაიძემ და საკრებულოს ერთ-ერთმა დეპუტატმა ლევან ჩხაიძემ _ მათ აცანაში სტიქიით დაზარალებულთა და სოფელ გვიმბალაურის წყლის პრობლემებთან დაკავშირებით ისაუბრეს.
საკრებულოს დეპუტატმა ლევან ჩხაიძემ სხდომას სოფელ გვიმბალაურის მოსახლეობის თხოვნა გადასცა: “არჩევნებამდე სასწრაფოდ მოგვარებული წყლის პრობლემა დღესაც პრობლემად რჩება. იქნებ, ახალმა ხელისუფლებამ დააყენოს ეს საკითხი ერთ-ერთ სხდომაზე და საბოლოოდ გადავწყვიტოთ,” _ თქვა ლევან ჩხაიძემ.
მუზეუმის ხელმძღვანელი, მაია ჩხაიძე, სხდომის დასასრულს გამოვიდა სიტყვით და მანაც სოფელ აცანაში სტიქიით დაზარალებული მოსახლეობისთვის დახმარება ითხოვა: “მაშინ როცა, ფეხბურთის აღორძინებისთვის ნახევარი მილიონი გამოყო, იქნებ ყურადღება მიგვექცია ამ პრობლემისთვისაც?” _ განაცხადა მაია ჩხაიძემ.
სხდომაზე ახალი პროექტების შესახებაც ისაუბრეს: “სულ მალე ლანჩხუთი-სამტრედიის ავტობანის მშენებლობა დაიწყება. გამოყოფილია 157 მილიონი ლარი, ასევე გაგრძელდება ლანჩხუთი-აცანა-მამათის გზის მშენებლობაც, სადაც ადგილობრივები დასაქმდებიან”, _ თქვა სხდომაზე ამირან გიგინეიშვილმა.
ზემო აღნიშნულ საკითხებთან დაკავშირებით “გურია ნიუსი” ამირან გიგინეიშვილს ესაუბრა.
ამირან გიგინეიშვილი: “გაგრძელდება შარშანდელი პროექტები _ მოხდება ქალაქის წყლის სისტემის რეაბილიტაცია და დაფინანსდება სოფლის პროექტები იმავე რაოდენობით, რაც შარშან იყო. ველოდებით უამრავ ინფრასტრუქტურულ პროექტებს, რომლის ინიცირებას ახლა ვაპირებთ ცენტრალურ ხელისუფლებაში. ამ წლის პრიორიტეტებად კვლავ რჩება წყლის სისტემის რეაბილიტაცია სოფლებში, ნაპირსამაგრი სამუშაოები, შიდა გზები და ხიდები.
რაც შეეხება სტიქიით დაზარალებული აცანელების პრობლემას, ეს საკითხი ცენტრალურ ხელისუფლებასთან კონსულტაციის გარეშე ვერ გადაწყდება, ვინაიდან ამ პრობლემის მოგვარება დიდ ხარჯებთანაა დაკავშირებული და მსგავს საკითხს მუნიციპალიტეტის ბიუჯეტი ვერ შეწვდება”.
ასე რომ, კითხვა, როდის მოგვარდება სტიქიით დაზარალებულთა პრობლემა, ისევ უპასუხოდ დარჩა.
