_ ბატონო სოზარ, ქუთაისის ციხის უფროსის დავით ცირეკიძის თემა, ვფიქრობთ, კარგად უნდა იყოს თქვენთვის ცნობილი _ მას პატიმარი ყაჩაღობის შეთავაზებაში ადანაშაულებს. თუმცა, ეს არ არის მის მიმართ ერთადერთი ბრალდება. რატომ ხდება, რომ ადამიანები, რომლებიც მუშაობდნენ სააკაშვილის ხელისუფლების დროს და რომელთა მიმართაც ძალიან ბევრი შეკითხვა არსებობს, დღეს, თქვენს ხელისუფლებაში საკმაოდ მნიშვნელოვან თანამდებობებზე არიან…
_ პირველი _ თუ წამოხვალთ ჩემ სამინისტროში, სამსახურს მოგიძებნით. სერიოზულად გთავაზობთ.
_ არა, გმადლობთ. მე უკეთეს საქმეს ვაკეთებ. ეს შემოთავაზება ნიშნავს, რომ კადრების დეფიციტია?
_ კადრების დეფიციტი არ არის. ზოგადად არის, რა თქმა უნდა, კადრების დეფიციტი. მეორეც _ არის გამოცდილი კადრები. მესამე _ არავის არ სჭირდება დამნაშავე კადრი, რაც არ უნდა გამოცდილი იყოს. როდესაც ლაპარაკია დანაშაულზე, შესაძლო დანაშაულზე, შესაძლო ქმედებაზე, რომელიც ჩვენს სისტემაში არის ჩადენილი, ცხადია, ჩვენ ვსწავლობთ, ვიკვლევთ, შეიძლება საგამოძიებო ჩაერთოს და შემდეგ გადავუგზავნოთ პროკურატურას, თუ რაიმე გამოიკვეთა. თუ ლაპარაკია სხვაგან ჩადენილზე, არსებობს უწყებები, რომლებიც ამას გამოიძიებენ, და თან დიდი სიამოვნებით. არავინ არავის ხელს არ დააფარებს. ცირეკიძე დამხვდა სისტემაში, ყველაზე რთულ ციხეს, პირველ საპყრობილეს ხელმძღვანელობდა, რომელიც ახლა დავხურეთ. ქუთაისში გადავიყვანეთ იმ ნიშნით, რომ იცნობს იქაურობას, იქ ნამუშევარია და სიტუაცია იცის.
_ და იქ ძალიან ბევრი უკმაყოფილო ადამიანი ჰყავს გამოუძიებელი დანაშაულობების გამო. თუკი ვისაუბრებთ იმაზე, რომ სიამოვნებით გამოიძიებენ, ისიც ვთქვათ _ ვინ უნდა გამოიძიოს, იმ ადამიანებმა, რომლებიც მასთან ერთად მუშაობდნენ და შესაძლო დანაშაულს ერთად ჩადიოდნენ?
_ გასულ კვირას თანამდებობიდან გადადგა მე-15 დაწესებულების დირექტორი ნუკრი ხუხუა იმის გამო, რომ იმ ციხეში მოხდა პატიმრის ცემის და წამების ფაქტი. თავიდან, ხუხუას დანიშვნას აპროტესტებდა ათეულობით პატიმარი და რაღაც გაფიცვა და მიტინგებიც კი მოაწყვეს ციხესთან. ახლა, ხუხუას გათავისუფლების გამო, რამდენიმე ადამიანმა ვენები გადაიჭრა, რამდენიმე ადამიანმა თავი დაისახიჩრა იმის გამო, რომ ხუხუა არ გაგვეშვა. რა ვქნათ ახლა? ყოველთვის იქნება ასეთი რამ პატიმრებს შორის _ ვიღაცის მოსვლა არ უნდათ, ვიღაცის წასვლა არ უნდათ. მათ შეხედულებებზე ციხის დირექტორებს ვერც მოვხსნით და ვერც დავნიშნავთ. თუ ადამიანს დანაშაული აქვს ჩადენილი, ეს გამოძიებამ უნდა დაადგინოს. თუ ადამიანი ვერ მართავს უწყებას, ეს შეიძლება გახდეს მისი გათავისუფლების საფუძველი ან ყველას შეუძლია თავისი ნებით დატოვოს სამსახური, თუ ის ჩათვლის ამას საჭიროდ. სხვა კრიტერიუმები არ არსებობს. როცა ლაპარაკია ყოფილ პოლიციის უფროსზე, ცხადია, რომ ყველა ციხეში მას შეიძლება დახვდეს ადამიანი, რომელიც მისი დაჭერილია და ეს ადამიანი ამით ბედნიერი არ იქნება. ისევ და ისევ ვიმეორებ _ თუ მას რაიმე დანაშაული აქვს ჩადენილი, გამოძიება არსებობს და დაადგენს.
_ ამ გამომძიებლების მიმართაც არსებობს უნდობლობა იქიდან გამომდინარე, რომ ეს ადამიანები, როგორც უკვე აღვნიშნე, რამდენიმე თვის წინ ერთად მუშაობდნენ…
_ ზოგი იგივეა, ზოგი _ სულ სხვა.
_ ყოველ შემთხვევაში დასავლეთ საქართველოში ცვლილება არ არის. ეს შეგვიძლია დაზუსტებით გითხრათ…
_ მაშინ გამოიძიებს მთავარი პროკურატურა და აღმოსავლეთ საქართველო, თუ რაიმე სერიოზული არ არსებობს ახლა. ჩემი პირადი განცდა თუ გაინტერესებთ, ძალიან ძნელია თქვა, ადამიანმა ჩაიდინა თუ არა დანაშაული, როცა არ იცი ამის შესახებ. შეიძლება დავიჯერო, რომ პოლიციის უფროსმა ვიღაცას იარაღი ჩაუდო, ნარკოტიკი ჩაუდო, ფიზიკური ძალა გამოიყენა, მაგრამ, როცა მეუბნებიან, რომ პოლიციის უფროსი ვიღაცას აიძულებდა ყაჩაღობას, ძალიან ძნელად ვიჯერებ ასეთ რამეს _ რა ვქნა.
_ ცემაშიც ადანაშაულებდნენ ცირეკიძეს…
_ გამოძიება არსებობს.
_ რუსთავის მეჩვიდმეტე დაწესებულების დირექტორი, ალეკო ბირთველიშვილია, ადამიანი, რომელიც ცირეკიძის მოადგილე იყო და რომელსაც ბრალს იარაღის ჩადებაში და სხვა ქმედებებში დებენ. თქვენ პირადად რამდენად გაქვთ სურვილი, მოიკვლიოთ იმ ადამიანების წარსული, რომლებიც დღეს თქვენ სისტემაში მუშაობენ და რომელთა მიმართაც საზოგადოების განწყობა ძალიან ცუდია?
_ ბირთველიშვილი 4 თვეა მუშაობს და ძალიან კარგად. მანამდე რა აქვს გაკეთებული, ისევ და ისვე გამოძიებამ უნდა დაადგინოს. საზოგადოების უკმაყოფილებას რაც შეეხება, მე მსგავსი ფაქტი არ მსმენია. არ ვიცოდი, გურიაში თუ მუშაობდა. ვიცოდი, რომ ქვემო ქართლში მუშაობდა და იქ, მის მიმართ მსგავსი დამოკიდებულება არ არსებობს. ისევ ვიმეორებ _ ნებისმიერი პოლიციელი, რომელიც ვინმეს დააკავებს, რაც არ უნდა სამართლიანად დააკავოს, მის მიმართ უკმაყოფილება იარსებებს, მინიმუმ, ერთი ადამიანის მხრიდან მაინც. შეიძლება, იმ დაკავებულის ოჯახი კმაყოფილი იყოს, რომ ეს მოგვაშორეთო, თუმცა, ის ერთი ადამიანი მაინც იქნება უკმაყოფილო. ეს ყველაფერი უნდა აიწონოს _ რა არის სამართლიანი, რა არ არის და შემდეგ გაკეთდეს შეფასებები.
