პირველი განხილვა 6 მარტს გაიმართა. წინასწარ დაანონსებულ შეხვედრას, იმ სოფლის მოსახლეობა, სადაც ჰესი შენდება, არ დასწრებია.
ოზურგეთის მუნიციპალიტეტში, მდ. ბახვისწყალზე 6,5 მვტ სიმძლავრის “ბახვი ჰესი 3”-ის მშენებლობის და ექსპლუატაციის პროექტის გზშ-ს ანგარიში თავდაპირველად შემუშავებული 2010 წელს არის.
შესაბამისი პროცედურების გავლის შემდგომ, შპს “ბახვი ჰაიდრო პაუერ”-მა ჰიდროელექტროსადგურის სამშენებლო სამუშაოები დაიწყო 2011 წლიდან. თუმცა, დეტალური კვლევის შედეგად, თავდაპირველ პროექტში შევიდა გარკვეული ცვლილებები, კერძოდ, შეიცვალა კაშხლის სიმაღლე, წყლის ხარჯი, სადერივაციო არხისა და სადაწნეო მილსადენის სიგრძეები, ჰიდროაგრეგატების რაოდენობა და ა.შ. შესაბამისად, ჰესის დადგმული სიმძლავრე გაიზარდა 9,8 მვტ-მდე.
პროექტში შეტანილი ცვლილებების გათვალისწინებით, საქართველოს გარემოსდაცვითი კანონმდებლობის მიხედვით (თანახმად „გარემოზე ზემოქმედების ნებართვის შესახებ“ საქართველოს კანონის მე-4 მუხლის, მეორე პუნქტისა), შპს “ჯორჯიან ჰაიდრო ფაუერი”-ს დაკვეთით 2012 წელს შემუშავდა 9.8 მვტ სიმძლავრის ჰესის მშენებლობის და ექსპლუატაციის პროექტის გზშ-ს ანგარიში. დამკვეთის მიერ არ იქნა მოწონებული აღნიშნული დოკუმენტი და მიღებული იქნა გადაწყვეტილება ანგარიშის ახალი ვერსიის მომზადების თაობაზე, რისთვისაც ხელშეკრულება გააფორმა შპს “გამა კონსალტინგთან”. შპს “გამა კონსალტინგის” სპეციალისტების მიერ დეტალურად იქნა შესწავლილი პროექტი, ჩატარდა დამატებითი კვლევები, მოძიებული იქნა ლიტერატურული და საფონდო მასალები.
“ბახვი 3 ჰესის”-ის მთავარი სამანქანე დანადგარების შენობის გახსნა 2012 წელს, საარჩევნოდ იგეგმებოდა და მას საქართველოს პრეზიდენტი მიხეილ სააკაშვილი უნდა დასწრებოდა, მაგრამ ეს იმის გამო არ მოხდა, რომ სამანქანე დანადგარების შენობა ზვავმა შეიწირა, რის შემდეგ ახალი შენობის მშენებლობა არის დაწყებული.
რაც შეეხება მეორე შეხვედრას, ის 16 მარტს ოზურგეთის დემოკრატიული ჩართულობის ცენტრში შედგა.
შპს “ქეი ჯი ენერჯის” დირექტორის ვახტანგ ღონღაძის თქმით, ისინი ცდილობენ, რომ რაც შეიძლება მეტ ადამიანს შეხვდნენ და გააცნონ ახალი გეგმები. შეხვედრას სოფელ მთისპირიდან ხუთი ადამიანი ესწრებოდა. შეხვედრამდე კი სოფელ მთისპირში საპროტესტო აქცია ჩატარდა და ადგილობრივებმა გზა გადაკეტეს, რის გამოც რამდენიმე დღით შეჩერდა ჰესის მშენებლობა.
ადგილობრივების თქმით, რაც ეს ჰესის მშენებლობა დაიწყო სოფელთან დამაკავშირებელი გზა დაინგრა. ისინი ითხოვენ, რომ კომპანიამ თავისი წვლილი შეიტანონ გზის მშენებლობაშიც. სოფლის ახალდანიშნულის რწმუნებულის თქმით, როდესაც სოფელში მიმდინარეობს სხვადასხვა სახის სამუშაოები, აუცილებელია დასაქმდეს ადგილობრივი კადრი.
შპს “ქეი ჯი ენერჯის” დირექტორმა ვახტანგ ღონღაძემ განაცხადა, რომ სოფელ მთისპირში სხვა კომპანიებიც არიან და მხოლოდ ჰესის მშენებლობა არ არის.
_ მზად ვართ, რომ ერთი შეხვედრა შედგეს და მოვილაპარაკოთ. ყველა უნდა ჩაერთოს ამ საქმეში. ჩვენ გზის ამოვსება და გასწორება ერთხელ მოვახერხეთ. ბალასტის გამოყოფისთვის სამთავრობო სხდომაზე იყო საუბარი და იქ გადაწყდა. თუ ეს ახლაც იქნება საჭირო, ჩვენ მზად ვართ, რომ ამ პრობლემის მოგვარება თქვენთან ერთად დავიწყოთ, – უთხრა მთისპირლებს ვახტანგ ღონღაძემ.
