გარემოს დაცვის მინისტრმა ხათუნა გოგალაძემ “გურია ნიუსთან” განაცხადა:
“მადნეულთან დაკავშირებით შემიძლია გითხრათ, რომ ეს საკითხი პრობლემურია. მდინარე “კაზრეთულა” საკმაოდ დაბინძურებულია, მაგრამ, ჩვენ არ ვუყურებთ ამ პრობლემაც ისე, თითქოს ჩვენ მოვედით და ახლა უნდა დავხუროთ. გამომდინარე იქედან, რომ ერთ დღეში ამის გამოსწორება არ შეიძლება, ჩვენ ვმუშაობთ მათთან. მაგრამ არის მეორე მხარე, გარემოს ზიანი არ უნდა მიადგეს. ბოლო შეხვედრაზე შეგვპირდნენ რომ წარმოგვიდგენდნენ გაწერილ გეგმას პერიოდებში და თანხებში რა უნდა გააკეთონ იმისთვის, რომ გარემოს დაცვის კუთხით გამოსწორდეს მდგომარეობა. ჩვენ მივესალმებით ასეთი გეგმის არსებობას. ამის შემდეგ, მოხდება ამ გეგმის მონიტორინგი. ყველაფერი ჩარჩოში უნდა მოექცეს. ასე არ შეიძლება,რაც მოუნდებათ ყველაფერს აბინძურებდნენ”.
მინისტრის თქმით, იგივე სახის მოლაპარაკება მიმდინარეობს ზესტაფონის “ფეროსთან”. “პრინციპში ეს არის ორი ცხელი წერტილი. იგივე სახის მოლაპარაკება მიმდინარეობს ზესტაფონთან. ასევე ცხელი წერტილი გვაქვს ჭიათურაში.”
იგეგმება თუ არა ქვეყანაში ახალი მძლავრი საწარმოს მშენებლობა, რომელმა შესაძლებელია გარემოს დაბინძურება გამოიწვიოს, მინისტრ გოგალაძის განმარტებით:
“ახლა რომ ახალი საწარმო შენდებოდეს, ამას მხოლოდ მივესალმებით, რადგან მშენებლობის საწყის ეტაპზე შეიძლება ყველაფერი იმის გათვალისწინება, როგორ გააკეთოს, რა ტექნოლოგიაა იმისთვის რომ გარემო დავიცვათ. ეს ადვილია როცა თავიდანვე საფუძველს უდებ, რადგან, თვითონაც იცის რა თანხებთან არის ეს დაკავშირებული და რა მოთხოვნებია. დაგეგმვის ეტაპზე ეს უფრო მარტივია. როცა ეს ფუნქციონირებს და საუბარი მაქვს ფეროსთან დაკავშირებით. მივესალმები ყველა ახლი პროექტის დაწყებას. ქვეყნის და ეკონომიკის განვითარებისთვის. ძალიან კარგად გვესმის რომ ქვეყანას სჭირდება განვითარება.”
გარემოც დაცვის მინისტრმა “გურია ნიუსის” კითხვაზე: გამოიწვევს თუ არა ჰესების მშენებლობა მაღალმთიან რეგიონებში ეკოლოგიურ კატასტროფას, განაცხადა:
“მე ადრე ვთქვი და ახლაც გავიმეორებ, ძალიან კარგია როდესაც ქვეყანას აქვს ასეთი მიდგომა, უნდა არსებობდეს ერთიანი სტრატეგიული შეფასება. ანუ სტრატეგიული გარემოს დაცვითი შეფასება. დავუშვათ, ჰიდროენერგეტიკის პოტენციალის განვითარება საქართველოში რა გარემოს დაცვით პრობლემებს გამოიწვევს. ეს ნიშნავს, რომ მთელი საქართველოს მასშტაბით, ან გარკვეული რეგიონის მასშტაბით რა პოტენციალი არსებობს, რა გარემოს დაცვითი პრობლემები შეიძლება იყოს პოტენციურ ადგილებზე. რა ადგილზე შეიძლება ეს მოხდეს. წესით ასეთი კვლევები უნდა არსებობდეს.
სამწუხაროდ, ჩვენთან ასეთ კვლევები არ არის გაკეთებული და არც არასდროს გაკეთებულა. არც ჰიდროელექტროენერგიასთან და არც არაფერ სხვა მიმართულებასთან დაკავშირებით. ეს უნდა გაკეთდეს. ახლა ვართ ისეთ სიტუაციაში რომ, სათითაოდ შემოდის ჰესების მონაცემები. ვიხილავთ თითოეულს, იმ მონაცემებიდან გამომდინარე, რაც არსებობს.”
