სამართალდამცველების თქმით, დამნაშავეები სათანადოდ დაისჯებიან. თუმცა, ჯერჯერობით, უცნობია, ვინ გააკეთა ეს.
საზოგადოები ერთი ნაწილი ფიქრობს, რომ ეს ფაქტი სტალინის ძეგლის შეღებვის სერიებს უკავშირდება და ვიღაცას დოდო აბაშიძის ძეგლი სწორედ სტალინის ძეგლში აერია. მეორე ნაწილის თქმით, შეუძლებელია საქართველოშ მცხოვრებმა არ იცოდეს, ვინ არის დოდო აბაშიძე და ვინმეში აერიოს.
როგორი იყო დოდო აბაშიძე და რას ფიქრობენ ამ ფაქტის გარშემო ქართველი ხელოვანები? “გურია ნიუსმა” სწორედ ამ კითხვით მიმართა იმ ადამიანებს, რომლებიც უშუალოდ იცნობდნენ დიდ ქართველ მსახიობ დოდო აბაშიძეს.
მანანა ორბელიანი, რეჟისორი: “მე მგონი, დოდოს ძეგლი მართლაც აერიათ სტალინის ძეგლში და იმიტომ შელახეს. სხვანაირად გამორიცხულია. მე ბატონ დოდოსთან მიმუშავია ჩემ პირველივე ფილმზე, სადაც ასისტენტი ვიყავი. იმხელა სითბო მახსოვს ამ ადამიანისგან, ვერ წარმომიდგენია, რომ ვინმესთვის ეწყენინებინოს. ახლანდელ ახალგაზრდები, ხომ იცით, თუ თბილისელი არაა, არ თვლის თავს ვალდებულად, იცოდეს, ვინ დააარსა თბილისი. აქედან გამომდინარე, არ გამიკვირდება, რომ არც კი იცოდნენ, ვის ძეგლს ასხამდნენ საღებავს. ალბათ, აუცილებელია, ახალგაზრდებმა იცოდნენ სახელოვანი წინაპრების წარსული და პატივი სცენ მათ, ამისთვის კი ჩვენ უნდა გავაკეთოთ ყველაფერი და საქართველოს წარსული მომავალ თაობას გადავცეთ.”
რამაზ იოსელიანი, მსახიობი: _ სამწუხაროდ, ერთად არ გვითამაშია, ისე კი ვიცნობდი. დოდო აბაშიძე იყო რაინდი მთელი თავისი არსით. სამწუხაროდ, ცუდ დროს მოუწია მოღვაწეობა. მსგავსი რანგის კინო ვარსკვლავი ბევრი არ მეგულება მსოფლიოში… ფანტასტიური პიროვნება იყო _ კეთილი, მეგობრული, გაჭირვების ტალკვესი და, რაც მთავარია, ყველას იმედი. რაც შეეხება იმ უბედურებს, ძეგლს საღებავი რომ გადაასხეს, რა უნდა ვუთხრა? ღმერთმა უკვე დასაჯა და საღი აზროვნების უნარი წაართვა _ ნორმალური ამას არ იზამდა.
_ როგორ ფიქრობთ, შესაძლებელია მართლა შეეშალათ სტალინის ძეგლში?
_ არ ვიცი.
მერაბ გენელიძე, მუსიკოსი: “დოდო აბაშიძეს, როგორც დიდ მსახიობს, ვიცნობდი, მაგრამ ისე ახლოს არ ვყოფილვარ, რომ მემეგობროს, თუმცა, შემიძლია ერთი ისტორია გავიხსენო _ ზუსტად არ მახსოვს რომელი წელი იყო, წყალტუბოს რაიონის სოფელ მაღლაკში იღებდნენ ფილმს, მე მგონი, “ფედია“. არ ვიცი, გამოვიდა თუ არა ეკრანზე. იმ დროს მქონდა შესაძლებლობა, პური გვეჭამა იმ სოფლის მკვიდრი დიდებული კაცის _ იუზა ჭოლაძის ოჯახში. დიდებული პიროვნება იყო _ მომლხენი, მოსიყვარულე. სუფრა ნამდვილ ქართულ აკადემიას ჰგავდა. ფიზიკურად ამხელა კაცს ბავშვივით ჩვილი გული ჰქონდა. სტალინის ძეგლში არევა გამორიცხულია. ჩემის აზრით, ეს ვანდალიზმი ჩაიდინეს ისეთმა პიროვნებებმა, რომლებსაც საქართველოს ისტორია კი არა, საერთოდ არაფერი გაეგებათ ქართული კულტურის. ეს იმის ბრალია, რომ დღეს არ ასწავლიან ბავშვებს ისეთი ადამიანების მოკლე ბიოგრაფიასაც კი, რომლებმაც დიდი წვლილი შეიტანეს საქართველოს სახელის ქვეყნის გარეთ გატანაში. მე ვგულისხმობ კარგ სახელს, თორემ გუშინ მიშამაც “გვასახელა” _ მსოფლიომ გაიგო, რომ საქართველოს პრეზიდენტი თურქეთში ვიზიტის დროს ველოსიპედით შეეჯახა ტრაილერს, სატირალი არ არის?! თემას არ გადავუხვევ და გეტყვით _ დოდო აბაშიძის ფილმებზე თაობები გაიზარდა და კიდევ იზრდებიან. ფილმი “ფესვები“ ყველას ნანახი აქვს და მეეჭვება, მისი სახე არ ჩარჩენოდათ მეხსიერებაში.”
ის, რომ დოდო აბაშიძის ძეგლი სტალინის ძეგლში აერიათ, არ სჯერა მის ვაჟს, ზაზა აბაშიძეს, რომელიც ამბობს, რომ ეს არის სრული იდიოტიზმი: “რანაირად შეიძლება დოდო აბაშიძე აერიოთ სტალინში?! მამაჩემის ბიუსტს დიდი ასოებით აწერია _ დოდო აბაშიძე.”
დოდო აბაშიძის შემოქმედების თაყვანისმცემლები იმედოვნებენ, რომ ფაქტი გამოძიებული იქნება და დამნაშავეები სათანადოდ დაისჯებიან, რათა მომავალში ასეთი სამარცხვინო ფაქტი საქართველოში აღარ განმეორდეს.
