რთულია სიტყვებით გადმოვცეთ ის გასაჭირი, რაც იმ ოჯახში ტრიალებს, მაგრამ შევეცდებით, მკითხველს ოდნავ მაინც წარმოდგენა შევუქმნათ იმ სიდუხჭირეზე, რაც შაინიძეების ოჯახში ტრიალებს.
აგურით ნაშენი კედლები და ორი პატარა ოთახი. ოთახი, რომლის სახურავი თითქმის ყველა კუთხეში დახეთქილია და წვიმის დროს, როგორც ოჯახის დიასახლისმა გვითხრა, წყალი ჩამოდის; ორი საწოლი, შეშის ღუმელი და ტანსაცმლის კარადა _ ეს არის ოჯახის მთელ ავლადიდება; შეულესავი კედლები, საიდანაც ქარი თავისუფლად მოძრაობს ოთახში.
ამ ყველაფრის მეპატრონე ერთი ქალბატონი, ნაზიბროლა ჯაიანეა, რომელსაც ორი მცირეწლოვანი და ორიც სკოლის ასაკში მყოფი შვილები ყავს. ოჯახის უფროსი, ლევან შაინიძე, როგორც მისმა მეუღლემ გვითხრა, 100 ლარის ღირებულების მავთულის ქურდობისთვის გეგუთის ციხეში სასჯელს იხდის. მას 4 წლითა და 6 თვით პატიმრობა ჰქონდა მისჯილი, შეწყალების შედეგად ერთი წელი მოაკლდა და ახლა 1 წელი და 6 თვე დარჩა მოსახდელი.
თვალცრემლიანი დედა მეოთხე მცირეწლოვანი შვილით ხელში და შველის მოლოდინით მომზირალ შვილებთან ერთად, საკუთარ გასაჭირზე გვესაუბრება:
“ჩემი მეუღლე, მეზობელთან ერთად, მუშაობდა შემოღობვით სამუშაოებზე. სამუშაოს დასრულების შემდეგ ხელფასი არ მისცეს და სამაგიეროდ, დღისით, წამოიღო 100 ლარის ღირებულების მავთული _ მომცემენ ხელფასს და მავთულსაც დავაბრუნებო, _ ამბობდა. ამის შემდეგ მეზობელთან უკმაყოფილება მოგვივიდა. ის დაგვემუქრა, რომ ჩემ მეუღლეს ამ მავთულის გამო უჩივლებდა და დააჭერინებდა. ასეც მოხდა _ მისი საჩივრის საფუძველზე ჩემს მეუღლეს დადეს ბრალი, რომ მან ღამით მოიპარა მავთულები. 600 ლარი ქონდა ასაღები და ასი ლარის გულისთვის 4 წელი და 6 თვე მიუსაჯეს.
მას შემდეგ, მთელი ოჯახის ტვირთი კისერზე მე ერთს დამაწვა. დამხმარე არავინ არ გამაჩნია, ერთი მაზლი მყავს, რომელიც თავადაც ავადმყოფობს. ჩემი ძმაც ასევე ავადმყოფობს და არ შეუძლია ჩემი დახმარება. დავრჩი 4 შვილის ამარა. მაქვს სოციალური დახმარება _ 126 ლარი, მაგრამ რას მეყოფა? 4 შვილს ძალიან ბევრი უნდა. ბავშვები სწავლის პროცესს ჩამორჩნენ. ფეხზე და ტანზე არ აცვიათ, რომ სკოლაში იარონ. ამას წინათ ტყეში “ეკალა” მოვკრიფე, გავყიდე, 10 ლარი ვიშოვნე და ბავშვს ფეხსაცმელი იმით ვუყიდე. ჩასაცმელს ვინ ამბობს, ბავშვები თითქმის სულ მშივრები მყავს, არ მინდა, მეც იმ ბათუმელი ქალბატონივით, შვილები შიმშილით დამეხოცნონ! სრულიად უპატრონოდ ვართ. მინდა მივმართო სოზარ სუბარს, ეკა ბესელიას, თეა წულუკიანს _ გადახედონ ჩემი მეუღლის საქმეს და გაათავისუფლონ, მანამდე კი მომხედონ, სანამ ბავშვები შიმშილით არ დამეხოცება. მხოლოდ ის იყო ჩვენი მარჩენალი. არ ვითხოვ არანაირ ერთჯერად დახმარება _ მაინც არაფერს მიშველის, მინდა ჩემი ქმარი გამოუშვან და მხოლოდ ამის შემდეგ შევძლებთ თვის გატანას. პატარას ბავშვების შემხედვარე სასოფლო სამეურნეო საქმესაც ვერ ვაკეთებ. რა ვქნა, რა გზას ვეწიო? ლანჩხუთის გამგეობას მივმართე თხოვნით, რომ შუამდგომლობა გამიწიონ და მათი დახმარებით შევძლო დავუკავშირდე ზემდგომ ორგანოებს. თუ ამ პრობლემას არ მომიგვარებენ და ოჯახის ერთადერთ მარჩენალს ციხიდან არ გამოუშვებენ, ჩავალ პარლამენტთან, დავდგები ჩემი შვილებით და ვიშიმშილებ, თუმცა, მაინც მშივრები ვართ,” _ თვალცრემლიანი ამბობს ქალბატონი ნაზიბროლა.
ლანჩხუთის მუნიციპალიტეტის გამგებლის მოვალეობის შემსრულებლის მოადგილის, ვახტანგ ზენაიშვილის თქმით, გამგეობას მართლაც მიმართა ნაზიბროლა ჯაიანემ და მათი მხრიდან აუცილებლად მოხდება აღნიშნულ პრობლემაზე რეაგირება: “შუამდგომლობით მივმართავთ შესაბამის ორგანოებს, რათა კიდევ ერთხელ გადაიხედოს ლევან შაინიძის საქმე. რაც შეეხება ქალბატონ ნაზიბროლასა და მის შვილებს, აუცილებლად გაეწევათ ერთჯერადი დახმარება”, _ გვითხრა ზენაიშვილმა.
