რომლის თანახმად, “პარლამენტი ვალდებულია საკუთარი კონსტიტუციით მინიჭებული უფლებამოსილებები განახორციელოს ქალაქ ქუთაისში” და ძველი პარლამენტის შენობის რემონტისთვის, სახელმწიფო ბიუჯეტიდან გამოყოფილი 5 მილიონი ლარის დახარჯვა ნაადრევი გადაწყვეტილებაა, საპარლამენტო უმრავლესობის წევრი, თინა ხიდაშელი ეხმაურება:
_ რომელ კანონს არღვევს ეს რემონტი იქნებ განგვიმარტოთ. კონსტიტუციით შესაძლებლობა იმის, რომ სხვაგან გაიმართოს სხდომა დაშვებულია, უფრო მეტიც, ეს შენობა პარლენტის ბალანსზეა და შესაბამისად, სრული უფლება აქვს პარლამენტს საკუთარი შენობა გამოსაყენებლად ვარგისი იყოს. კანონს რაც შეეხება, სინამდვილეში უკანონობაში ახლა ვართ იმიტომ, რომ შენობა რომელშიც ვმუშაობთ ჩვენი არ არის. არც ქირას ვიხდით და არც პატრონი ჰყავს. რეალობა უფრო მძიმეა და საინტერესო იქნება ამ ქუთაისი შენობის საკუთრებით ვინმე დაინტერესდეს, _ აღნიშნავს ხიდაშელი.
შეგახსენებთ, რომ “საერთაშორისო გამჭირვალობა _ საქართველოს” ინფორმაციით, საქართველოს მოქმედი კონსტიტუციის 481 მუხლის თანახმად, საქართველოს პარლამენტის ადგილსამყოფელია ქალაქი ქუთაისი. ხოლო, საქართველოს პარლამენტის ადგილსამყოფლის დროებით შეცვლა სხდომის ან სესიის მოწვევის მიზნით დასაშვებია მხოლოდ საგანგებო და საომარი მდგომარეობის დროს. შესაბამისად, პარლამენტი ვალდებულია საკუთარი კონსტიტუციით მინიჭებული უფლებამოსილებები განახორციელოს ქალაქ ქუთაისში.
2012 წლის დეკემბერში პარლამენტის წევრთა მიერ მოხდა საკონსტიტუციო ცვლილების ინიცირება, რომელიც ითვალისწინებს კონსტიტუციითან 481 მუხლის ამოღებას, რითიც მოიხსნება პარლამენტის საქმიანობის ქუთაისში განხორციელების ვალდებულება. თუმცა აღნიშნული ცვლილება პარლამენტს ჯერ არ მიუღია და როგორც 20 თებერვალს პარლამენტის თავმჯდომარემ განაცხადა, საგაზაფხულო სესიის ბოლომდე არც მოხდება მისი კენჭისყრაზე გატანა. იმის გამო, რომ დღეს მოქმედი კანონმდებლობით პარლამენტის ადგილსამყოფელი ქუთაისშია, დასაფიქრებელია, რამდენად კანონიერი და მიზანშეწონილია სხვა ქალაქში პარლამენტის შენობის გარემონტებისთვის სახელმწიფოს ბიუჯეტიდან თანხის გამოყოფა.
ასევე საინტერესოა, როგორ მოხდება გაწეული ხარჯების გამართლება იმ შემთხვევაში, თუკი პარლამენტის მიერ აღნიშნული ცვლილებები არ იქნება მიღებული. ცნობისათვის, დაგეგმილია სწორედ პლენარული და საკომიტეტო დარბაზების გარემონტება, რომელთა გამოყენებაც სხვა მიზნით ალბათ ვერც მოხერხდება. საკონსტიტუციო ცვლილების არ მიღება კი საკმაოდ რეალური სცენარია, რადგანაც როგორც ცნობილია, საპარლამენტო უმრავლესობას არ გააჩნია საკონსტიტუციო უმრავლესობა, რაც 21 მარტს გამართულმა სარეიტინგო კენჭისყრამაც დაადასტურა. საკონსტიტუციო ცვლილების დამტკიცებისთვის საჭიროა 100 ხმა, მმართველ გუნდს კი ამ ეტაპზე მხოლოდ 93 ხმა აქვს (აღნიშნულში მოიაზრება ”უპარტიო, დამოუკიდებელი მაჟორიტარების” ფრაქციაც). 27 აპრილის შუალედურმა არჩევნებმა უმრავლესობას შეიძლება შემატოს დამატებით 3 ხმაც, თუმცა ვერც ამ უკანასკნელით მოახდენს ის საკონსტიტუციო უმრავლესობის მოპოვებას. საპარლამენტო ოპოზიციამ კი არაერთხელ დააფიქსირა, რომ ისინი ამ ცვლილებას მხარს არ დაუჭერენ.
“საერთაშორისო გამჭვირვალობა – საქართველო” თვლის, რომ ერთის მხრივ ქუთაისში პარლამენტის გადატანით და მეორეს მხრივ აღმასრულებელი ხელისუფლების ორგანოების დედაქალაქში არსებობამ, საქართველოს პარლამენტის ყოველდღიურ საქმიანობაში დაინტერესებული ორგანიზაციებისა თუ ჯგუფების ჩართულობას გარკვეულწილად აფერხებს. თუმცა ვფიქრობთ, რომ კონსტიტუციაში შესაბამისი ცვლილების შეტანამდე სახელმწიფო ბიუჯეტიდან 5 მილიონი ლარის დანახარჯის გაწევა პარლამენტის თბილისში გადატანასთან დაკავშირებით, ნაადრევი გადაწყვეტილებაა და არ მოდის შესაბამისობაში კანონთან.
“გურია ნიუსი” ამ თემაზე მუშაობას აგრძელებს და დამატებით ინფორმაციას, როგორც ზემოთ აღნიშნულ საკითხებზე, ასევე, ქუთაისის პარლამენტის შენობის მესაკუთრის შესახებ, უახლოეს ხანში მოგაწვდით.
