ამის შესახებ მინისტრმა დავით ნარმანიამ დღეს გამართულ ბრიფინგზე განაცხადა.
ნარმანიას თქმით, სამუშაოების შემოწმების მიზნით, წინასწარ შერჩეულ ხუთ სხვადასხვა გზის მონაკვეთზე დაგებული საფარი ამოიჭრა და ექსპერტიზისთვის ლევან სამხარაულის სახელობის სასამართლო ექსპერტიზის ეროვნულ ბიუროში გადაიგზავნა.
ექსპერტიზის შედეგად დადგინდა, რომ ხუთი გზიდან ორზე ასფალტის საფარი სახელმწიფო სტანდარტს და ტენდერით გათვალისწინებულ მოთხოვნებს ვერ აკმაყოფილებს.
რეგიონული განვითარების და ინფრასტრუქტურის მინისტრი დავით ნარმანია: “დარღვევები გამოვლინდა ქუთაისი-ტყიბული-ამბროლაურის საავტომობილო გზის მე-14 – 22-ეკმ (ორპირი-ხრესილი) მონაკვეთსა და თბილისი-სენაკი-ლესელიძის საავტომობილო გზის (ავტომაგისტრალის)152,159 – 161, 163 -_ 164 და 166 კმ მონაკვეთებზე. ექსპერტიზამ დაადგენა, რომ ქუთაისი – ტყიბული – ამბროლაურის საავტომობილო გზის შესაბამის მონაკვეთზე ასფალტ-ბეტონის ქვედა ფენის სისქე, ნაცვლად 6 სმ-ისა, 5,2 სმ-ია, ხოლო ზედა ფენის სისქე, ნაცვლად 4 სმ-სა, 3,2 სმ-ია. ქვედა ფენაში ბიტუმის პროცენტის შემცველობა ზოგიერთ მონაკვეთზე 3,1%-ია, მაშინ, როცა დასაშვები ნორმა 4,5 – 6,0%-ია. ასევე, ასფალტო-ბეტონის ზედა და ქვედა ფენებში ფორიანობის საშუალო პროცენტი 2-3 ჯერ მაღალია დასაშვებ ნორმასთან შედარებით, რაც გამოწვეულია მინერალური მასალების დაკლებით. აღნიშნული გზის მონაკვეთზე სამუშაოებს აწარმოებს ს.ს. „ერღოკატმაკედონია ა.ტ.ე.ვ.ე.” (Ergokat Makedonias S.A.).
თბილისი – სენაკი – ლესელიძის საავტომობილო გზისშესაბამის მონაკვეთზე დაგებული ასფალტ-ბეტონის საფარის ზედა და ქვედა ფენებში მინერალური მასალის გრანულო-მეტრიულობის შემცველობა პროცენტულად დასაშვებ ზღვარზე 2-4-ჯერ ნაკლებია. ასევე, ასფალტ-ბეტონის ნარევში ბიტუმის შემცველობა, ნორმასთან შედარებით, საშუალოდ, 2-4%-ით ნაკლებია. რაც შეეხება ასფალტ-ბეტონის სისქეს, ზოგიერთ მონაკვეთში 1,33 სმ-ით ნაკლებია პროექტით გათვალისწინებულ სისქესთან შედარებით. ასევე, ბიტუმის რაოდენობა, ზოგიერთ მონაკვეთში, 0.5-0.7 %-ით ნაკლებია დასაშვებ ნორმასთან შედარებით. აღნიშნული გზის მონაკვეთზე სამუშაოებს აწარმოებს შპს „მოდერნ სერვისის” საქართველოს ფილიალი”.
ექსპერტიზით გამოვლენილ დარღვევებს საქართველოს შინაგან საქმეთა სამინისტროს სახელმწიფო უსაფრთხოების სააგენტო სწავლობს, სადაც გადაიგზავნა დარღვევების შესახებ სრული დოკუმენტაცია.
მინისტრის თქმით, მისი უწყება ამიერიდან მონიტორინგს ზედამხედველობის სამსახურის მუშაობაზეც განახორციელებს, ვინაიდან აღნიშნული სამსახური სამინისტროს გზების მშენებლობაზე ზუსტ ინფორმაციას არ აწვდიდა.
დავით ნარმანია აქცენტს შესრულებული სამუშაოების ხარისხზე აკეთებს და კონტრაქტორ კომპანიებს კატეგორიულად აფრთხილებს, დაიცვან კონტრაქტით ნაკისრი ვალდებულებები და სახელმწიფოს მიერ დადგენილი სტანდარტები.
მინისტრის განცხადებით, წინააღმდეგ შემთხვევებში სამინისტრო გამოვლენილ დარღვევებზე შესაბამის სტურქტურებთან ერთად, უმკაცრეს რეაგირებას მოახდენს.
