აშშ-ის შინაგანი დეპარტამენტის წარმომადგენლის პაატა შანშიაშვილის თქმით, შეხვედრის მიზანია, საქართველოს გააცნონ ის საუკეთესო გამოცდილება, რაც შეერთებულ შტატებში დაგროვდა.
“ეს გამოცდილება შეეხება თანამედროვე ხუროთმოძღვრების, არქიტექტურის შენობა-ნაგებობების ძალიან მგრძნობიარე, ბუნებრივ, ისტორიულ და კულტურულ გარემოში ჩართვას. არსებობს საფრთხე, რომ დაცულ ტერიტორიებში აგებული ინფრტასტრუქტურა შეუფერებელი იყოს გარემოსთვის. ამიტომ შემუშავდა თავისებური მიდგომა, რომელსაც მდგრად დიზაინს ეძახიან. იგი გარემოს მიმართ უკიდურესად მშვიდობიანია. ამიტომ ამის გაცნობა საქართველოსთვისაც კარგი იქნება”, _ ამბობს შანშიაშვილი.
შეხვედრაზე აშშ-ს შინაგანი დეპარტამენტის ინფრასტრუქტურული განვითარების ექსპერტმა ლერი ვოლინგმა დეტალურად მიმოიხილა დაცულ ტერიტორიებზე შენობების აგების პრინციპები.
ლერი ვოლინგის თქმით, ამერიკული ორგანიზაცია LEED (Leadership in Energy and Environmental Design), ენერგეტიკისა და გარემოს დაცვის დიზაინის ხელმძღვანელობა, ე.წ. “მწვანე მშენებლობებს” მოთხოვნებს უყენებს, რომელთა გათვალისწინება აუცილებელია დაცულ ტერიტორიებზე ინფრასტრუქტურული პროექტების განხორციელებისას.
ორგანიზაცია LEED შენობებს იმ შემთხვევაში ანიჭებს სერთიფიკატს, თუ ის 40-49 ქულას მოაგროვებს. 50-59 ქულა ვერცხლის დონეა, 60-79 ოქროსი და 79 ზევით, ყველაზე მაღალი, პლატინის დონეა. დაცულ ტერიტორიებზე შენობამ სერტიფიკატი რომ მოიპოვოს, ის ვერცხლის დონეს მაინც უნდა აკმაყოფილებდეს.
ახლა კი იმის შესახებ, როგორ აგროვებს შენობა ქულებს. ლევი ვოლინგის თქმით, ინფრასტრუქტურულ პროექტს ქულები ენიჭება: თუ განხორციელებისას დაბინძურების პრევენციას ახდენს; თუ უპირატესობას ადგილობრივ, ან მეორად მასალებს ანიჭებს (ანუ უკვე ადგილზე არსებული შენობების მასალებს და ამით მისგან ტერიტორიის გასუფთავების საჭიროება აღარ არსებობს, რაც თავისთავად თანხებს ამცირებს), ასევე მზის, წყლის, ქარის მიერ წარმოქმნილ ენერგიას და ლეგალურ ხე-ტყეს იყენებს. მნიშვნელობა ენიჭება შენობის დიზაინსაც. ქულები ემატება პროექტს, თუ შენობის ინტერიერში ისეთ მასალებს იყენებს, რაც მკვეთრ სუნს არ იწვევს. აკრძალულია თამბაქოს მოწევა, უპირატესობა ენიჭება დღის სინათლის გამოყენებას და ა.შ.
ლერი ვოლინგის განცხადებით, ამგვარი შენობების აგება ჩვეულებრივზე უფრო ძვირი ჯდება, მაგრამ, სამაგიეროდ, ის ეკოლოგიურად სუფთაა. მისი შენახვის და საქსპლოატაციო ხარჯები ნაკლებია, რაც სამომავლოდ უფრო მეტი დანაზოგის მიღების საშუალებას იძლევა. რაც ყველაზე მთავარია, ბუნებას ნაკლები ზიანი ადგება.
პაატა შანშიაშვილის თქმით, ამგვარ ღონისძიებას ერთჯერადი სახე არ ექნება. ამერიკის მთავრობა ინტელექტუალური ღონისძიებების სახით საქართველოს მთავრობის დახმარებას მომავალშიც გააგრძელებს.
