_ აცხადებს “გურია ნიუსთან” სასჯელაღსრულების, პრობაციისა და იურიდიული დახმარების საკითხთა მინისტრი სოზარ სუბარი, რუსთავის № 6 სასჯელაღსრულების დაწესებულების სამუდამო პატიმრობა მისჯილ გ. კ. დედის მ. კ.-ს ბრალდებაზე.
ქალბატონი “გურია ნიუსთან” აცხადებს, რომ დაწესებულის თანამშრომლებმა მისი პატიმარი შვილი თოკზე ჩამოკიდეს და მოკვლა სცადეს, რის გამოც პატიმარი ამ წუთებშიც საავადმყოფოში იმყოფება და სავარძელს არის მიჯაჭვული. მ. კ.-ს განცხადებით, პატიმარი მძიმედ არის ავად, რის გამოც ციხის ადმინისტრაციის თანამშრომლების მიერ მიყენებული ტრავმა, შესაძლოა, ვერ გადაიტანოს და დაიღუპოს.
სოზარ სუბარის განცხადებით, პატიმარი გ. კ. მძიმე მდგომარეობით ნამდვილად იმყოფება ციხის საავადმყოფოში და პატიმრის დედისგან განსხვავებით, ავადმყოფობის სხვა მიზეზს ასახელებს: “სამი დღის განმავლობაში, 10-დან 15 ივლისამდე 6-ჯერ გავიყვანეთ ქალაქის საავადმყოფოებში ოპერაციების გასაკეთებლად, რადგან, თვითდაზიანება მიიყენა _ ნახევარი კაცია დარჩენილი. იგი ხან რომელ ორგანოს იჭრის და ხან _ რომელს. ვერაფერს ვერ ვუხერხებთ. რა ვქნათ, ხელებზე და ფეხებზე ბორკილები რომ დავადოთ, კანონით ამის უფლებას არ გვაძლევს. გვაქვს უფლება 24 საათით დავადოთ, მაგრამ 24 საათის შემდეგ ხომ უნდა ავხსნათ? ორი დღის წინ, ისევ მიიყენა თვითდაზიანება და საავადმყოფოშია გადაყვანილი. იგი ურეკავს მშობელს, დეიდას და ეუბნება: ახლა წახვალ და ამ განცხადებას გააკეთებ, ახლა წახვალ და ბენზინის ბოთლით ვიღაცას დააშანტაჟებ!!! ისინიც ასრულებენ ამ დავალებებს.
მას სამუდამო პატიმრობა აქვს მისჯილი. არ მაქვს უფლება, განვაცხადო მისი ავადმყოფობის შესახებ _ ამით დავარღვევ პაციენტის უფლებებს. მაგრამ, არის საკმაოდ მძიმე ავადმყოფი. მას აქვს გარკვეული მოთხოვნები, რომელსაც ჩვენ ვერ შევასრულებთ. ციხე იმისთვის არის, რომ გარკვეული შეზღუდვები არსებობს _ ყველას ყველაფრის უფლებას ვერ მივცემთ. იძულებული ვართ, პერიოდულად ერთი ციხიდან მეორეში გადავიყვანოთ, რადგან დიდხანს ვერც ციხეში ჩერდება. მერე ციხის მთელი ადმინისტრაცია წერს განცხადებას, რომ ახლა ყველანი მივდივართ თანამდებობიდან, თუ ეს პატიმარი აქ კიდევ დარჩებაო და გადაგვყავს სხვაგან.
იმ ქცევების საწინააღმდეგოდ, რასაც გ. კ. ჩადის, არსებობს ერთი გამოსავალი _ დაადო ბორკილები, შებოჭო და სადღაც იყოს გამოკეტილი ისე, რომ მისი ხმა არავის ესმოდეს. მაგრამ ამას არ ვაკეთებ და ამით ის სარგებლობს.”
მინისტრი სუბარი ეჭვობს, რომ პატიმარი გ. კ. იმდენად მძიმედ არის ავად, შესაძლოა, ამდენი თვითდაზიანება ვერც გადაიტანოს.
