აჭარის დღე გვიან ღამით ნიაზ დიასამიძემ და ჯგუფმა “33ა” დაასრულა. გუშინვე მოეწყო საბრძოლო ხელოვნების ფედერაცია “შავფაროსნების” საჩვენებელი გამოსვლა და მათ მიერ ორგანიზებული შეჯიბრი ქალაქურ კრივში და ლელო-ბურთში.
14 ივლისიდან მოყოლებული, ფესტივალმა თბილისის ეთნოგრაფიულ მუზეუმში დაიდო ბინა. დილიდან ეწყობოდა გამოფენები. შეიძლება ითქვას, ფოლკლორის ნაწილიც, ვინაიდან, რეგიონებიდან ჩამოსული მონაწილეები სცენისთვის მოსამზადებლად მუდმივ რეპეტიციას გადიოდნენ და მათი მოსმენა მთელი დღის განმავლობაში შეიძლებოდა.
საქართველოს რეგიონების გარდა, ფესტივალში მონაწილეობა მიიღეს არამარტო უცხოეთში წასულმა ქართველებმა, არამედ თავად უცხოელებმაც. ეთნოგრაფიული მუზეუმის ეზოში ისეთებსაც შეხვდებოდით, რომელთაც ყოველდღე აქ დაედოთ ბინა. ფესტივალის ორგანიზატორის, თამარ მელიქიშვილის თქმით, მათი დიდი ნაწილი ქართულადაც ლაპარაკობს, შეყვარებულია ქართულ კულტურაზე და აღარ უნდა არსად წასვლა.
მონაწილეობის მისაღებად ყოველწლიურად საქართველოში სპეციალურად “არტ გენისთვის” ჩამოდიან ინგლისიდან, ამერიკიდან, გერმანიიდან, შოტლანდიიდან, ისრაელიდან, საფრანგეთიდან.
“რაც შეეხება რეგიონულ კონცერტებს, მონაწილეები წლის განმავლობაში გვიკავშირდებიან, შემდეგ უკვე მოსმენით, ვისაც არ ვიცნობთ, დგება გარკვეული სია. თუმცა ყველა მსურველს აქვს გამოსვლის საშუალება. პირველ ეზოში არის მათთვის სცენა მოწყობილი. რა თქმა უნდა, ისეც არ არის, რომ არაფერი არ გაგვიგია მათ შესახებ. მონაწილეობენ ხალხისთვის უცნობი პოეტები, მაგალითად, ისეთები, ვისაც სახლში ეწერებათ და წერენ”, _ ამბობს თამარ მელიქიშვილი.
ხალხური რეწვის, ფოლკლორის, ქორეოგრაფისა და ზეპირისტყვიერების ფესტივალი წელს 10 წლის გახდა. წინა წლებისგან განსხვავებით პროგრამაც განსხვავებულია.
“იუბილესთან დაკავშირებით ფესტივალი თუკი მხოლოდ იღებდა საზღვარგარეთიდან შემსრულებლებს, საერთაშორისო ფორმატიდან გამომდინარე, წელს მთავარი თემა გვქონდა მრავალხმიანობა და პოლიფონია და სარდინიიდან, სამხრეთ იტალიიდან გვესტუმრა ორი თაობისგან შემდგარი ჯგუფი Tenores Di Bitti . ეს არის სრულიად ფანტასტიური ჯგუფი, იქ არის ისეთი პოლიფონია, გეგონება, ხმელთაშუა ზღვის დიდი ნიჟარა გიდევს ყურთან. საოცრება იყო ის, რომ მათ ჩვენებიც შეუერთდნენ და ერთად გაშალეს ეს მრავალხმიანობა”, _ ამბობს ფესტივალის ორგანიზატორი.
“არტგ გენს” წელს სასიამოვნო სიახლეც აქვს. ფესტივალის სახელით გურული ანსამბლი “იადონი” ინგლისში, პიტერ გაბრიელის სახელობის ფესტივალზე მიემგზავრება. ანსამბლი „არტ გენის” საპატიო წევრია. თბილისის პირველი დღე გურიას მიეძღვნა და „იადონმაც” მაშინ მიიღო მონაწილეობა.
“არგტ გენი” 2013 4 ივლისს, თელავში, ნადიკვარის პარკში გაიხსნა, 7 ივლისს კი მარტვილში, სოფელ სალხინოში, დადიანების საზაფხულო რეზიდენციაში გაგრძელდა. ფესტივალის მხარდამჭერები არიან საქართველოს ძეგლთა დაცვის სამინისტრო და ქალაქ თბილისის მერია, ხოლო გენერალური სპონსორი ბანკი “კონსტანტაა”.
