ოკაცეს კანიონზე მიმდინარე მშენებლობის პროექტის პრეზენტაციაზე არ იმყოფებოდა ორგანიზაცია “მწვანე ალტერნატივას” წარმომადგენელი ირაკლი მაჭარაშვილი. მისი თქმით, შეხვედრის შესახებ დროულად არ გააფრთხილეს. თუმცა, მაჭარაშვილიც აღნიშნავს, რომ ბუნების ამ ძეგლზე მიმდინარე მშენებლობები სააგენტოს მხრიდან მეტ სიფრთხილეს მოითხოვს.
“ოკაცეს კანიონის მშენებლობაზე წარმოდგენილი პროექტი, ჩემი აზრით, არაფრით არ შეესაბამება მდგრადი განვითარების, გარემოს დაცვის პრინციპებს და ზოგადად, დაცული ტერიტორიების არსისგან ძალიან შორს არის. მთავარი პრობლემა აქ კი ისაა, რომ გადაწყვეტილება თავის დროზე ძალიან გაუმჭვირვალედ, ნაჩქარევად იქნა მიღებული. თვითონ სააგენტოს ხელმძღვანელობაც ლაპარაკობს იმაზე, რომ ადგილი ჰქონდა უკანონო გარიგებას, იგივე ადეიშვილის სურვილისამებრ გადაწყდა ტენდერის საკითხი. ბოდიში, მაგრამ ეს არის სისხლის სამართლის დანაშაული და თუ სააგენტო ამას არ მიყვება, ეს არის დანაშაულის შეუტყობინებლობა. ეს უნდა გაჩერდეს და დაიწყოს გამოძიება. ის, რომ ერთი შეხვედრა მოეწყო, არაფერში არ ჯდება. საჯარო განხილვა იმას ნიშნავს, რომ უნდა გამოქვეყნდეს პროექტი და მოეწყოს მასზე განხილვები. “ფეისბუქით” ამის შესახებ ინფორმაციის გავრცელება არ არის საკმარისი”, _ ამბობს ის.
გარემოს დაცვისა და ბუნებრივი რესურსების სამინისტროში 10 ივლისს გამართულ ოკაცეს კანიონის მშენებლობის პროექტის პრეზენტაციაზე, დაცული ტერიტორიების სააგენტოს თავმჯდომარე რატი ჯაფარიძემ აღნიშნა, რომ მათ უწყებას უკვე დაგეგმილი პროექტი გადაეცა და მის მიხედვით მშენებლობას განაგრძობენ. ხოლო პროექტის თავიდან შეფასება და იმ მოთხოვნების გათვალისწინება, რაც აქვთ სპეციალისტებს დიდ დროს და გაცილებით მეტ თანხებს მოითხოვს, რაც, მისი ვარაუდით, საერთოდ, მშენებლობის გაჩერებას გამოიწვევს და ბუნების ამ შესანიშნავ ძეგლს ვიზიტორები ვერ ნახავენ.
ირაკლი მაჭარაშვილი რატი ჯაფარიძის ამ განცხადებას ასე პასუხობს: “არგუმენტი იმაზე, რომ თუ ამ მოთხოვნებს შეასრულებს სააგენტო, გაცილებით მეტი თანხა დასჭირდება პროექტს და ამის გამო შეიძლება საერთოდ გაჩერდეს მშენებლობა და ტურისტებმა ვეღარასდროს ნახონ ოკაცეს ულამაზესი კანიონი, არ არის საკმარისი. თუ პროექტი გაუმართავია და ამაში ფული ტყუილად იხარჯება, ჯობია სულ არ აშენდეს. გაფუჭებულის გამოსწორებაზე უფრო არავინ გაიმეტებს ფულს, ვიდრე გამართული პროექტის დაფინანსების მომატებაზე”, _ აცხადებს მაჭარაშვილი.
