“დამეხმარეთ, თორემ შეიძლება ორივე ფეხი მოსაჭრელი გამიხდეს”

_ძალიან გთხოვთ, იქნებ, თქვენ  გვითხრათ, გვირჩიოთ რამე, ვის შეიძლება, მივმართოთ და  დაგვეხმაროს?  ერთი ოპერაცია ისე გავიკეთე, არავინ  შემიწუხებია,  ჩემი ხარჯებით გავიკეთე, მეწველი ძროხა დავკალი და გავყიდე,  მცირეწლოვან შვილიშვილს ლუკმა გამოვართვი პირიდან. განგრენა მაქვს ცალ ფეხზე და გადამდის მეორეზე, 10 თვეა, ასეთ მდგომარეობაში ვარ.  მივედი გამგეობაში, ცოტა დამაფინანსეთ, დამეხმარეთ- მეთქი, რომ სასწრაფო ოპერაცია გამეკეთებინა, მაგრამ  არავინ დამეხმარა.  აწი ფეხსაც მომჭრიან, 15 დღეა, კედლებზე გავდივარ ტკივილებისგან. არ მიჩერებს არაფერი, ვერც ლოგინზე ვწვები, ვერც ვიძინებ, საშინელ დღეში ვარ, იქნებ დამეხმაროთ… შუქი და გაზი გათიშული მაქვს გადაუხდელობის გამო.  ორჯერ მივედი ოზურგეთის მუნიციპალიტეტის გამგებლის მოვალეობის შემსრულებელთან კოტე შარაშენიძესთან, დაგეხმარებიო, დამპირდა  და  არაფრით არ დამხმარებია.  ჩემისთანა გაჭირვებულს რომ არ დაეხმარებიან, ვის აძლევენ ამ დახმარებებს?   ადრე ვმუშაობდი ფიზიკურად, არ მიჭირდა, ახლა ფიზიკურად გავხდი უუნარო, თორემ ამდენ ხანს არავისთვის არაფერი  მითხოვია. უშუქოდ და უგაზოდ რომ იქნები ახლა, აგი ცხოვრებაა? _ ამბობს იოსებ ტუღუში და  მაინც რჩება მცირე იმედი, რომ დაეხმარებიან და ფეხს შეინარჩუნებს.

“გურია ნიუსი” დაუკავშირდა ოზურგეთის მუნიციპალიტეტის გამგებლის მოადგილეს  ირაკლი სირაძეს, რომელიც იოსებ ტუღუშის გაჭირვების შესახებ ინფორმაციას ფლობდა და განგვიცხადა, რომ  დახმარებას აუცილებლად გაუწევდა.

_ კი ბატონო დავეხმარებით აუცილებლად, – გვითხრა ირაკლი სირაძემ

რამდენიმე წუთში ის თავად დაგვიკავშირდა და გვითხრა, რომ  იოსებ ტუღუშის დახმარებაზე მოხსენებითი ბარათი უკვე დაიწერა და გამგეობას მას 200 ლარით დაეხმარება.