2 აგვისტოს, მთავარმა პროკურატურამ კორტავას მკვლელობის საქმე გახსნილად გამოაცხადა და ციხის რამდენიმე თანამშრომელი პასუხისგებაში მისცა, თუმცა, ბრალდებულთა შორის არ მოხვდა ციხის დირექტორი, რომელსაც აღნიშნული ინციდენტის შემდეგ მხოლოდ სამსახურის დატოვება მოუწია.
ვინ არის მალხაზ სინაურიძე და რატომ არ დადგა მისი პასუხიმგებლობის საკითხი იმ დროს, როდესაც გეგუთის ციხეში ე.წ. “მაყურებლის” ინსტიტუტის არსებობა თავად პროკურატურამ დაადასტურა?
მალხაზ სინაურიძე ძველი კადრია _ წლების განმავლობაში, ის სხვადასხვა ციხეების დირექტორის თანამდებობას იკავებდა. ახალი ხელისუფლების პირობებში დაწინაურებას მის მიერ 2006 წელს მომხდარი ციხის ბუნტის საქმეზე მიცემულ ჩვენებას უკავშირებენ. სინაურიძემ თავდაპირველად ჩვენება პატიმრების წინააღმდეგ მისცა, საპარლამენტო არჩევნების შემდეგ კი ჩვენება თავდაცვის და შინაგან საქმეთა ყოფილი მინისტრის ბაჩო ახალაიას წინააღმდეგ შეცვალა _ მან ციხის ბუნტის ორგანიზატორად ბაჩო ახალაია დაასახელა და გავრცელებული ინფორმაციის თანახმად, ჩვენების შეცვლიდან დაახლოებით ერთ კვირაში გეგუთის ციხის უფროსადაც დაინიშნა.
საპარლამენტო არჩევნების შემდეგ, სინაურიძე ციხის ბუნტის დროს პატიმრების გადამრჩენადაც კი გამოცხადდა, თუმცა, პროკურატურის მიერ გავრცელებულ ინფორმაციაში მისი თავგანწირვის შესახებ არაფერია ნათქვამი.
“ყოველ ღამე შემოდიოდნენ ბაჩო ახალაია, მეგის ქარდავა, კახა ბუცხრიკიძე, შეიარაღებულები და მცემდნენ. ორთაჭალის ბუნტის დროს მიცვალებულები და დაჭრილები ვახტაზე შემოყარეს. ჩემი ხელით დავბანე მიცვალებულები. ბინტი, ბამბა, ერთჯერადი ნემსები – ყველაფერი გაუთავდათ ექიმებს, ვერ აუდიოდნენ დაჭრილებს…. ორთაჭალის N5 დაწესებულებაში შევიდნენ და პირდაპირ ჩაცხრილეს ხალხი. მე პასუხისმგებელი ვარ ამ სიტყვებზე. მალხაზ სინაურიძე გადაეფარა სპეცნაზს ვახტაზე _ “ჯერ მე მომკალით და მერე შედით, არ მოგაკვლევინებთ ამ ავადმყოფ და ინვალიდ ხალხს!” მაგან გადაგვარჩინა,” _ ყვება პატიმარი ნუგზარ თაბაგარი ერთ-ერთ მედია საშუალებასთან.
პროკურატურის რელიზში ციხის ბუნტთან დაკავშირებით მალხაზ სინაურიძე ბაჩო ახალაიას გეგმის ხელშემწყობად მოიაზრება. როდესაც ახალაიამ ე.წ. “ქურდების ფლიგელში” ფარული ჩაწერისითვის ვიდეო კამერები დაამონტაჟა, ეს, რა თქმა უნდა, ციხის დირექტორ სინაურიძესთან იყო შეთანხმებული.
“ბ. ახალაიას მიერ შემუშავებული გეგმის მიხედვით, პატიმრების, მათ შორის პ. მამარდაშვილის პალატაში დაბრუნების შემდეგ, დაწესებულების დირექტორის მ. სინაურიძის განკარგულებით, პ. მამარდაშვილის საკანში შეიყვანეს პატიმარი ზურაბ ვიბლიანი, რომელმაც არ იცოდა მისი იქ მიყვანის მიზეზი, თუმცა, მამარდაშვილმა ახალაიას დავალება არ შეასრულა და კამერის წინ არაფერი თქვა,” _ ნათქვამია პროკურატურის მიერ გავრცელებულ განცხადებაში ციხის ბუნტის საქმის გახსნილად გამოცხადების შესახებ.
გეგუთის ციხეში პატიმარ კორტავას სასიკვდილოდ ცემის შემდეგ 2 დღეც არ იყო გასული, რომ ციხის უფროსი კიდევ ერთ სკანდალში გაეხვა _ საინფორმაცი სააგენტო primerinfo.ge-ს ინფორმაციით, 15 მაისს, გამთენიისას, სინაურიძის სამსახურეობრივი მანქანა ავტოსაგზაო შემთხვევის დროს დაზიანდა. გავრცელებული ინფორმაციით, მანქანას სინაურიძის მძღოლი გაგა გვეტაძე მართავდა. თუმცა, “პრაიმერს” თვითმხილველმა აცნობა, რომ ავარიის დროს საჭესთან სინაურიძე იჯდა, რომელმაც შემთხვევის ადგილი ტაქსით დატოვა, მანქანასთან კი ცოლის ძმა გაგა გვეტაძე დატოვა.
პატიმარ კორტავას გარდაცვალება თავდაპირველად კიბიდან დაგორებას დაბრალდა, თუმცა, მოგვიანებით სასჯელაღსრულების სამინისტრომ მცდარი ვერსიის მიწოდებაში გეგუთის ციხის ადმინისტრაცია დაადანაშაულა. პროკურატურის მიერ გავრცელებული განცხადების მიხედვით, ციხის რამდენიმე თანამშრომელმა ისე მოახდინა მტკიცებულებების ფალსიფიცირება, რომ დირექტორმა ამის შესახებ არაფერი იცოდა.
“ნებისმიერი მსგავსი შემთხვევის გამოვლენისას, სახელმწიფოს მიერ გახორციელებული რეაგირება უნდა იყოს ადეკვატური და დადგინდეს საკუთარი მოქმედებითა თუ უმოქმედობით, რამდენად მონაწილეობდნენ ხსენებული დანაშაულის ჩადენაში სასჯელაღსრულების დაწესებულების მაღალი თანამდებობის პირები. მიგვაჩნია, რომ ნაკლებად სავარაუდოა, ციხის ხელმძღვანელობას აღნიშნული მმართველობის მეთოდების შესახებ არაფერი ცოდნოდა,” _ ნათქვამია განცხადებაში, რომელიც ექვსმა არასამთავრობო ორგანიზაციამ გაავრცელა. ამასთან დაკავშირებით, სასჯელაღსრულების სამინისტროს და პროკურატურას განმარტება არ გაუკეთებიათ, სამაგიეროდ პროკურატურის მუშაობა იუსტიციის მინისტრმა შეაფასა დადებითად: “კორტავას საქმის გამოძიება საკმაოდ ეფექტიანად მიდის და დადგინდება ყველა ოფიციალური პირის, თანასაკნელის, თუ თანაპატიმრის პასუხისმგებლობა ამ საკითხზე. გამოძიებამ უნდა დაადგინოს, იყო თუ არა ამ საქმეში ე.წ. “კანონიერი ქურდების” როლი,” _ განაცხადა თეა წულუკიანმა.
