ელგუჯა ჩხაიძე: “ჩვენი პარტია მხოლოდ ერთმა წევრმა დატოვა”

მან ადგილობრივი მედიისთვის გამართულ პრესკონფერენციაზე განაცხადა, რომ მისი პარტიის მხარდამჭერთა მიგრაცია ბურჯანაძის პარტიაში საკმაოდ მცირეა და ის ბურჯანაძეს არასოდეს დაუჭერს მხარს. თუმცა, ერთი მხარდამჭერის დაკარგვასაც კი არ მიესალმება.

ჩვენ შეგახსენებთ, რომ კოალიციის წევრები და მხარდამჭერები ბურჯანაძის შტაბს შეუერთდნენ, თუმცა, არ ვამტკიცებთ, რომ ყველაზე დიდი დანაკლისი “თავისუფალ დემოკრატებშია”. დანაკლისია ზოგადად კოალიციაში.

ამ დრომდე გავრცელებულ ინფორმაციას უკვე მეორედ მხოლოდ ” თავისუფალი დემოკრატები” გამოეხმაურნენ, “რესპუბლიკელების” და ” ქართული ოცნების” ხელმძღვანელობა, ჯერ-ჯერობით, დუმს.

ელგუჯა ჩხაიძე: “ლანჩხუთში ორი საარჩევნო შტაბია გახსნილი _ “ქართული ოცნების” და ქალბატონი ბურჯანაძის. გავრცელებული ინფორმაცია, თითქოს “თავისუფალი დემოკრატებიდან” არის მასიური მიგრაცია სხვა პარტიაში, არ არის სიმართლე. ის ადამიანები, რომლების დღეს ბურჯანაძის შტაბში არიან და ეწევიან საქმიანობას, მუშაობდნენ ჩვენთან გასული საპარლამენტო არჩევნების დროს და კოალიციაში ეკავათ სხვადასხვა თანამდებობები. ისინი დღეს-დღეობით საქმიანობას ეწევიან ბურჯანაძის შტაბში, თუმცა, არ არიან “თავისუფალი დემოკრატები” და პოლიტიკური ნიშნით დატვირთული ხალხი. რაც შეეხება გელა კვერენჩხილაძეს, ის იყო “სახალხო კრების” წევრი, მაგრამ პარტიის წევრი არ ყოფილა. ის არ არის განაწყენებული “თავისუფალ დემოკრატებზე”, არამედ კოალიციაზე. ჩვენი პარტიის სხვა წევრი იმ შტაბში არ მუშაობს. მე გავიკითხე და სახეზე რომ ვცნობ, ისეთები იყო 5-6 კაცი. “ეროვნულები” იყვნენ ძირითადად, თუმცა, “ეროვნულები” კოალიციის წევრები არ არიან. ბევრი მხარს უჭერს ბატონ ბიძინას, მაგრამ მაინც იქ არიან. პირადად ჩემთვის, ნინო ბურჯანაძის საპრეზიდენტო კანდიდატისადმი მხარდაჭერა მიუღებელია, თუნდაც იმიტომ, რომ მას ერთ ლარად მიყიდეს მილიონიანი ქონება. მე კარგად მახსოვს 2007 წელს გაყალბებული არჩევნები, რომელსაც ნინო ბურჯანაძე ხელმძღვანელობდა. ისიც მახსოვს, გაქცეულ ხალხს პარლამენტის კარი რომ არ გაუღო, თავი შეეფარებინათ.

კიდევ ერთხელ ვიმეორებ _ ჩემი პარტიიდან წევრების სხვაგან გადასვლა არ არის სიმართლე. თუ ასეა, დამისახელონ სახელი და გვარები. იქ არიან კიდევ დაქირავებული ხალხი, რომლებსაც პროფესიად აქვს გადაქცეული ხან ერთ შტაბში დაჯდომა და მუშაობა, ხან მეორეში ანაზღაურების ფასად,” _ განაცხადა ელგუჯა ჩხაიძემ.

ელიკო იმნაძე, პარტია “თავისუფალი დემოკრატების” წევრი: “ითქვა, რომ ჩვენგან წასული ადამიანები პარტიის წევრები იყვნენ, მაგრამ პარტიის წევრი და მხარდამჭერი განსხვავდება ერთმანეთისგან. თუნდაც ერთი მხარდამჭერის დაკარგვას არ მივესალმებით, მაგრამ ციფრები _ 50-90 კაცი – არ უნდა დასახელდეს. “თავისუფალი დემოკრატები” არის ძლიერი შეკრული ჯგუფი, რომელსაც დაშლის საფრთხე არ ემუქრება. რაც შეეხება ჩვენს მხარდამჭერს, გელა კვერენჩხილაძეს, ის მართლაც გამოცდილი კადრია და მის დაკარგვა ნამდვილად არავის არ მოეწონებოდა, მაგრამ ამ ადამიანს აქვს თავისი გამოკვეთილი პოზიცია და ამაში ჩვენ ხელს არ შევუშლით, მაგრამ ” თავისუფალი დემოკრატების” ერთი მხარდამჭერი არ არის “თავისუფალი დემოკრატების” პარტიის წევრთა უმრავლესობა.”