ოზურგეთის მუნიციპალიტეტის გამგეობის პრესსამსახურმა ამ შეხვედრასთან დაკავშირებით შემდეგი სახის ინფორმაცია გაავრცელა, რომელსაც უცვლელად გთავაზობთ.
“პრემიერ მინისტრი დაბა ურეკში იმყოფებოდა, სადაც იგი ოზურგეთის მუნიციპალიტეტის გამგებელს, კონსტანტინე შარაშენიძესა და ურეკის მოსახლეობას შეხვდა. გამგებელი პრემიერს დაბა ურეკში სტიქიის შედეგად გამოწვეულ პრობლემაზე, მისი მოგვარების გზებზე და ამ დროისათვის არსებულ მდგომარეობაზე ესაუბრა. ყველაზე რთული სიტუაცია დუმბაძის ქუჩაზეა, რის გამოც პრემიერმა ადგილობრივებს დახმარებას დაპირდა. დაბა ურეკში მყოფ ქვეყნის პრემიერ მინისტრს ოზურგეთის მუნიციპალიტეტის გამგებელმა, კონსტანტინე შარაშენიძემ 18 აგვისტოს მომხდარი სტიქიის შედეგებზე ესაუბრა და ამ დროისათვის არსებული ვითარება გააცნო. ყველაზე რთული მდგომარეობა დუმბაძის ქუჩის მცხოვრებლებს შეექმნათ, დაიტბორა სახლების პირველი სართულები, წერეთლის ქუჩაზე მეწყერი ჩამოწვა და სამანქანო გზა ჩახერგა. მუნიციპალიტეტის გამგებლის თხოვნით, მძიმე ტექნიკა, რომელიც ნატანები-ურეკის საკონცერტო დარბაზის მშენებლობას ემსახურება და საქველმოქმედო ასოციაცია ,,ატუს” ეკუთვნის, დროებით სტიქიის ზონაში იქნა მობილიზებული, რამაც წერეთლის ქუჩაზე მეწყრის შედეგად ჩახერგილი გზის მყისიერად გაწმენდა და მოძრაობის აღდგენა უზრუნველყო.
მუნიციპალიტეტის სამაშველო ბრიგადები მთელი დღის განმავლობაში ადგილზე იმყოფებოდნენ და დაზარალებულებს დახმარებას უწევდნენ, თუმცა წყლის ამოტუმბვითი სამუშაოები აქტიურ ფაზაში მაშინ შევა, როცა წვიმა გადაიღებს. ამ დრომდე დაბაში უამინდობაა.
კონსტანტინე შარაშენიძე სტიქიის ზონაში დილიდანვე იმყოფებოდა და მოსახლეობას ეხმარებოდა, მან დაზარალებულები მოინახულა და თითოეული ოჯახის პრობლემას ადგილზე გაეცნო.
საჯარო ინფრასტრუქტურის მოწესრიგება მხოლოდ ადგილობრივი ბიუჯეტით ვერ განხორციელდება. უახლოეს პერიოდში დაიწყება დაბა ურეკში წლების მანძილზე არსებული წყლისა და კანალიზაციის პრობლემის მოგვარება, რაც წყალდიდობის შემთხვევაში მსგავსი მასშტაბური შედეგების თავიდან აცილებას უზრუნველყოფს.”
ჩვენს მიერ მოპოვებული ინფორმაციით, პრემიერ-მინისტრი მისი ძმის სახლშიც იმყოფებოდა, რომელსაც რამდენიმე დღის წინ შვილიშვილი შეეძინა. ბიძინა ივანიშვილმა ძმას ეს ფაქტი მიულოცა.
