იმედი რომ მქონდეს, “გურია ნიუსში” სტატიის გამოქვეყნების შემდეგ რეაგირება იქნება, მაშინ ვერც ერთი ვერ უნდა მოვიდეს, ბაბუა, ხვალ სამსახურში, მაგრამ შენც არ მომიკვდე, ამას ვერ მივაღწევთ _ ვერ შენ და ვერც მე. რატომ? იმიტომ, რომ სათავეა ამღვრეული და არ გამოვა არაფერი, სანამ არ დაიწმინდება. ამას კი დრო უნდა. ძალიან ცუდი მდგომარეობა რომაა, ვხვდები, ხმას ვიღებ და ამიტომ დამიძახა გამგებელმა ინტრიგანი. დამიმტკიცოს! თუ ვარ მე ინტრიგანი, მოვუხდი ბოდიშს, თუ არა თვითონ მომიხადოს. არ ვაპატიებ შეურაცხყოფას! _ ამბობს 82 წლის ოზურგეთელი გივი დობორჯგინიძე.
_ ვმუშაობდი ანასეულის საცდელ მეურნეობაში აგრონომ-ბრიგადირად 37 წელი. 40 ჰექტარი ჩაის ნაკვეთი მქონდა, 30 ჰექტარი ციტრუსის, ფეიხოას და ხეხილის ბაღები. ახლა კი დავდევ “მათხოვარივით” ამ გაუმაძღარ კაპიტალისტებს. ყურადღების ღირსადაც არ გთვლიან. იქნებ, გაარკვიოთ ჟურნალისტებმა, როდის იწყება საჯარო მოხელეების და კონკრეტულად გამგებლის სამუშაო დღე.
ამას ილია ვაშაყმაძე არ მაკადრებდა _ ის ზრდილობით სავსე კაცი იყო, ბაბუა, სიტყვა-პასუხი უვარგოდა. რომც ვიყო ინტრიგანი, რა უფლება აქვს გამგებელს, დამიძახო იმდენ ხალხში და მის თანამშრომლებში, ინტრიგანიაო. დამიმტკიცოს, ვარ თუ არა ინტრიგანი. თუ არა, არ მოვეშვები. კი, ბაბუა, დაწერთ ამ წერილს, მარა რომ გადაიკიდებ ცას და ქვეყანას, მერე რას შობი?! მე ვარ ამ სიმართლეში პასუხისმგებელი, მაგრამ დარწმუნებული ვარ, არავინ არ ჩაგვთვლის არაფრად, _ ამბობს გივი დობორჯგინიძე და იმ პრობლემებზე საუბრობს, რამაც ძალიან შეაწუხა და დასახმარებლად “გურია ნიუსს” მიმართა.
_ შუქის გადასახადი მომივიდა უზარმაზარი _ 50 ლარი. შევწუხდი. “ენერგო-პრო ჯორჯიას” ოზურგეთის სერვისცენტრის უფროსად ისევ გია ნაკაიძე ზის, გაქანებული “ნაციონალი”. მაგის კაბინეტში შეშვება როგორ შეიძლება? დევიღუპეთ, ბაბუა, ხალხი მოტყუვდა _ ავირჩიეთ და გვიღალატეს… ნაკაიძემ ვიღაც ეკასთან გამაგზავნა, ეკამ მითხრა, მრიცხველი გაქვს გამოცვლილი 2012 წლის მარტშიო. წელიწადი და ოთხი თვე გავიდა იმის მერე და ახლა მახდევინებენ ამხელა თანხას? ასეთ უსამართლობას რამდენს დაინახავ და არაფერი, პასუხს ვერავინ ვერ გცემს.
მე რომ სიმართლეს ვეძებ, ამაში უნდა დამიჭირო მხარი, ბაბუა, თქვენი სპეციალობით და საქმიანობით, მაგრამ ისეთი დრო შეიქმნა, რაც გინდა დაწერე, რეაგირება არაა. პირიქით, დაგცინებენ. სამი დღეა, მევიარე საკრებულო, გამგეობა, “ქართული ოცნების” შტაბი და ვერავინ უფროსი ვერ ვნახე, ვინც პასუხს გამცემს და მომისმენს. გუშინ მითხრეს, გომისმთაზე არიანო, დღეს მეუბნებიან, სტუმრები ჰყავთო. ახლა თქვენთან მოვედი, თქვენი იმედი მაქვს, მოსმენით ხომ მაინც მომისმენთ.
გამგებლის ნახვას რომ ვერ მოახერხებ საერთოდ, ან რომც ნახო, რამეში გარგია თუ რა?! ვიფიქრე, ბიძინა მოვა და რაც დაგვპირდა, იმას გაგვიკეთებს,-მეთქი, მაგრამ ყველაფერს რომ თავი დაანებო, კადრებს ხომ უნდა მიაქციოს ყურადღება? კადრები წყვეტს ყველაფერს. ორივე _ დარჩიაც და გამგებელიც მისი და მისი ძმის მეგობრებია. ხალხისთვის რომელიმე არის? 82 წლის ვარ, პენსია არ მყოფნის, ნახევარჯერ მშიერი ვარ, ამათი დაკმაყოფილება კი არაა. უცდის კარებთან ატუზული უბედური, მშიერი ხალხი, ზოგს რა უჭირს, ზოგს _ რა, მოვიდა მესამე ორშაბათი და მივედი. არ დამხვდა, რა თქმა უნდა, მეოთხეჯერ მივედი და მოვაო, მითხრეს. გავიდა საათები და მოვიდა, მაგრამ ჰიტლერი ხომ გაგიგონიათ, ისე შემოვარდა შიგ, მიიხედა, მოიხედა და გადის. შევაჩერე და ვუთხარი, ბატონო კოტე, მე თქვენთან ვარ,-მეთქი. ოც წუთში მოვალო, მითხრა. გავიდა ერთი საათი კიდევ. აღარ მოვიდა და წავედი სახლში ამ ხნის კაცი მოტყუებული. კიდევ მივედი მორიგ ორშაბათს და მის თანამშრომლებს ვუთხარი, რად გვინდა ასეთი გამგებელი, ორი თვის განმავლობაში რომ ვერ ნახავ,-მეთქი. ეგ ამბავი, რა თქმა უნდა, უთხრეს შარაშენიძეს. მივედი კიდევ ორშაბათს, ისევ არაა. შევედი მისაღებში და შემოირბინა კოტემ. როგორც კი დამინახა, იყვირა, ამას არ მოუსმინოთ ინტრიგანიაო. ეს გამგებლისთვის შესაფერი საქციელია? ვთქვი ნამდვილად, რომ არ მინდა ისეთი გამგებელი, ხალხი რომ ვერ ნახულობს,-მეთქი და ამის გამო ვარ ინტრიგანი? აბა, გაჭირვებულ მოსახლეობას არ უნდა შეხვდეს? მეც არ დავიხიე უკან და ვუპასუხე ინტრიგანიც და უარესიც ხარ, ყოჩაღ შენ, კარგი გამგებელი გამოგვიგზავნეს შენი სახით, კაცს რომ თავი გაუტეხე იარაღით და შეგრჩა, აწი უარეს იზამს,-მეთქი, _ ამბობს 82 წლის მოხუცი “გურია ნიუსთან”.
“გურია ნიუსთან” “ენერგო-პრო ჯორჯიას” ოზურგეთის სერვისცენტრის უფროსი გია ნაკაიძე კომენტარს არ აკეთებს და პრესსამსახურთან გვიმისამართებს.
_ მოდით ისე გავაკეთოთ, როგორც ხდება ხოლმე _ მაგაზე კომენტარს ჩვენი პიარი მოგცემთ.
_ ბატონო გია, თქვენს პრესსამსახურს სანამ დავუკავშირდებოდეთ, იქნებ, გვითხრათ ორიოდე სიტყვით, რა ხდება…
_ მესმის თქვენი, მაგრამ არ მეთვლება ეგ სწორად. მაგის გულისთვის შეიძლება საყვედურიც მივიღო. თანხის კანონიერად გადახდა ყველას ეხება, თქვენც, მეც და გივი დობორჯგინიძესაც.
_ ბატონო გია, ადრე თქვენ აკეთებდით კომენტარს და ახლა წესები შეიცვალა?
_ მე თვითონ დავუკავშირდები და კომენტარს გაგიკეთებენ.
ეკა ორაგველიძე, “ენერგო-პრო ჯორჯიას” ოზურგეთის სერვისცენტრის აბონენტთა მომსახურების სპეციალისტი: _ ამ აბონენტს 2012 წლის 11 აპრილს გამოუცვალეს მრიცხველი. მრიცხველი შენელებულად მუშაობდა და არ აღრიცხავდა მის მიერ მოხმარებულ ელექტროენერგიას სრულად. დარღვევა იყო ასეთი: 2012 წლის 30 მარტს დაიწერა აღრიცხვის კვანძის მიღების აქტი #466806. შემოწმებისას აღმოჩნდა, რომ მრიცხველს იმპულსი ჰქონდა, მაგრამ მთვლელი მექანიზმი დაზიანებული იყო. ამის შემდეგ ხდება გადაანგარიშება, რამდენით იყო მრიცხველი შენელებული. აბონენტს დაერიცხა 25 ლარი და 87 თეთრი, რომელიც არის მრიცხველის შენელების და აუცილებლად უნდა გადაიხადოს. მე წაგიკითხეთ ოფიციალური დადგენილება ამის შესახებ.
ჩვენ შევეცადეთ დავკავშირებოდით ოზურგეთის მუნიციპალიტეტის გამგებლის მოვალეობის შემსრულებელს კოტე შარაშენიძეს, თუმცა, მიუხედავად ჩვენი არაერთგზის მცდელობისა, მან სატელეფონო ზარებს არ უპასუხა. შემდეგ რამდენიმე შეტყობინებაც გავუგზავნეთ და ავუხსენით, რის შესახებ გვინდოდა კომენტარი, თუმცა, პასუხი არ მიგვიღია.
“გურია ნიუსი” გამგებლის პრესსამსახურის უფროსს ნინო სალუქვაძეს დაუკავშირდა და საქმის კურსში ჩააყენა, ვთხოვეთ, რომ იქნებ თავად დაკავშირებოდა კოტე შარაშენიძეს და კომენტარიც მიგვეღო. რაზედაც თავდაპირველად ნინო სალუქვაძემ გაგვიცხადა:
_ ამ შემთხვევაში თქვენ რა გინდათ, თქვენ რას მოითხოვთ?!
_ ჩვენ გვინდა კომენტარი გივი დობორჯგინიძის მონაყოლის შესახებ.
_ ჟანა, შენ ეგ დაინახე? ვერ ვხვდები, რა გინდა ამ კონკრეტული კითხვებით. რას ითხოვ, ფორმა რა არის… _ გვითხრა სალუქვაძემ და ტელეფონი გაგვითიშა.
რამდენიმე წუთში ნინო სალუქვაძე თავად დაგვიკავშირდა: _ გამეთიშა ტელეფონი და ახლავე გეტყვით _ ეს პიროვნება რას ითხოვს ახლა, ბოდიშის მოხდას? მე ვიცი, რომ გამგებელს არავისთვის შეურაცხყოფა არ მიუყენებია და არავისთვის არ უთქვამს, ინტრიგანი ხარო. ეგ ნამდვილად ვიცი, რომ ასეა. ეს არის ტყუილი და ვიღაცისგან მოგონილი. გამგებელმა ვის უნდა მოუხადოს ბოდიში, როცა არავისთვის არანაირი შეურაცხყოფა არ მიუყენებია?! _ გვითხრა ნინო სალუქვაძემ.
