საინტერესოა, რა ხდება პარტია “ერთიანი ნაციონალური მოძრაობის” მხარდამჭერებში, როდის აპირებენ ისინი გააქტიურებას და ჩაერთვება თუ არა გუბერნია წინასაარჩევნო პროცესებში. ამასთან დაკავშირებით გუბერნატორის მოადგილეს, პაატა მანჯგალაძეს ვესაუბრეთ.
_ ბატონო პაატა, არჩევნები ახლოვდება, თუმცა, “ნაცმოძრაობა” ჯერ არ აქტიურობს. საზაფხულო სეზონს დავაბრალოთ თქვენი პასიურობა?
_ მართალია, ზაფხულია და ამ პერიოდს ადამიანები ძირითადად დასვენებისთვის იყენებენ. მაგრამ პოლიტიკურ ცხოვრებაში, მოახლოებული საპრეზიდენტო არჩევნებიდან გამომდინარე, აქტიურად შესვლა ახლა იწყება. რაც შეეხება გუბერნიის საქმიანობას, ჩვენ პოლიტიკური სპეკულაციებით არასდროს ვიყავით დაკავებული. როგორც წლების მანძილზე ვმუშაობდით, იგივე ტემპით და შემართებით ვმუშაობთ იმ განსხვავებით, რომ ამის აფიშირება და რეკლამირება არ ხდება საზოგადოებისთვის. აი, შეიკრიბა გუბერნატორის ადმინისტრაციის სათათბირო ორგანო _ რეგიონული განვითარების საბჭო, რომელსაც ესწრებოდნენ სამივე მუნიციპალიტეტის ხელმძღვანელი პირები, რეგიონული განვითარებისა და ინფრასტრუქტურის სამინისტროსა და არასამთავრობო ორგანიზაციების წარმომადგენლები. განვიხილეთ რეგიონის განვითარების სტრატეგია, რომელიც ერთხმად იქნა დამტკიცებული.
_ ვისაუბროთ მოახლოებულ არჩევნებზე. როგორც ცნობილია, თქვენ საარჩევნო საკითხებში გარკვეული გამოცდილება გაქვთ. თქვენი აზრით, რით არის გამორჩეული მოახლოებული საპრეზიდენტო არჩევნები?
_ პირდაპირი შეფასებებისგან და ამა თუ იმ კანდიდატის ჩემი სიმპათია-ანტიპათიის დაფიქსირებისგან ამ ეტაპზე თავს შევიკავებ. ზოგადად, განსაკუთრებულობას რაც შეეხება, სიახლეა ის, რომ გაურკვეველ მდგომარეობაში გადადგა ცენტრალური საარჩევნო კომისიის თავმჯდომარე. მაქვს ინფორმაცია, რომ სხვადასხვა რაიონებში მიმდინარეობს ზეწოლა თვითმმართველობის ორგანოს იმ ხელმძღვანელებზე, რომლებიც “ნაციონალურ მოძრაობას” წარმოადგენენ, ასევე არასამთავრობო ორგანიზაციები საუბრობენ ადმინისტრაციული რესურსის გამოყენებაზე, გვაქვს ინფორმაცია, რომ გამარჯვებული პარტია წინასწარ ხვდება და აგროვებს უბნის კომისიებში კონკურსის გზით ასარჩევ კანდიდატებს, რაც გარკვეულ კითხვის ნიშნებს ბადებს.
_ მოახლოებული საპრეზიდენტო არჩევნები ახსენეთ. გუბერნია რა ფორმით იქნება წარმოდგენილი და ჩართული საარჩევნო კამპანიაში? ჩვენ გვახსოვს შარშანდელი პერიოდიც, როცა გუბერნიის მთელი რიგი თანამდებობის პირები შვებულებაში იყვნენ და ამავე დროს ჩართულები იყვნენ საარჩევნო პროცესში.
_ 2012 წლის საპარლამენტო არჩევნებთან დაკავშირებით შემიძლია გითხრათ, რომ ჩემი ინფორმაციით, გუბერნიაში მომუშავე არც ერთ თანამშრომელს კანონი არ დაურღვევია. რაც შეეხება წლევანდელ არჩევნებს, გეტყვით, რომ დღეს მოქმედი კანონმდებლობით, თეორიულადაც კი გამორიცხულია მოქმედი საჯარო მოხელის საარჩევნო კამპანიაში მონაწილეობა. ამდენად, ზოგიერთის შიში იმის თაობაზე, რომ ჩვენ მიერ ადმინისტრაციული რესურსი იქნება გამოყენებული, უსაფუძვლოა.
_ თქვენ ამბობთ იმას, რომ არც გუბერნატორი, არც თქვენ, არც სხვა საჯარო მოხელეები საარჩევნო კამპანიაში ჩართული არ იქნებით?
_ დიახ, კიდევ ერთხელ გიდასტურებთ, რომ გუბერნიის არც ერთი მოქმედი თანამშრომელი საარჩევნო კამპანიაში არანაირი ფორმით ჩართული არ იქნება, რაც შეეხება თვითმმართველობის საჯარო მოხელეებს, ამაზე ვერაფერს გიპასუხებთ. თუმცა, აქვე გამოვთქვამ ვარაუდს, რომ მათი მხრიდან იგივე ზომები არ იქნება მიღებული.
_ ვრცელდება ინფორმაცია, რომ ან გუბერნატორი, ან თქვენ იქნებით დავით ბაქრაძის საარჩევნო შტაბის ხელმძღვანელი…
_ გასაგებია თქვენი ინტერესი, მაგრამ მოვლენებს წინ ნუ გავუსწრებთ. საარჩევნო კამპანიის წარმოებისას ყველაფერს თავისი დრო და წესი აქვს. მათ შორის, პრეზიდენტობის კანდიდატის საარჩევნო შტაბის ხელმძღვანელის და რეგიონების და რაიონების შტაბების ხელმძღვანელის დასახელებასაც.
_ 2012 წლის საპარლამენტო არჩევნების შემდეგ, როგორ ფიქრობთ, საპრეზიდენტო არჩევნებში გამარჯვების რა შანსი აქვს დავით ბაქრაძეს?
_ ათმა თვემ, მე მგონი, ყველას ნათლად დაანახა, რომ მარტო დაპირებებით ქვეყანა ვერ აშენდება. სამწუხაროა, ჩემი დღევანდელი სტატუსიდან გამომდინარე, არ შემიძლია. დავაფიქსირო ჩემი განწყობა.
