დღეს, პრემიერ-მინისტრის რიგით მეცხრე შეხვედრაზე მედიასთან “გურია ნიუსის” კითხვა სწორედ სადაზღვევო კომპანიებსა და გაურკვეველ ვითარებაში გასხვისებულ კლინიკებს შეეხებოდა.
_ ბატონო ბიძინა, ბოლო პერიოდში ჯანდაცვის სფეროში საკმაოდ მნიშვნელოვანი მოვლენები ხდება. პირველი _ მხედველობაში მაქვს სადაზღვევო კომპანიების პროტესტი სახელმწიფოს მხრიდან განხორციელებულ კანონიერ ქმედებებზე, რომელიც თუ არ ვცდები, პირველად ტარდება ამ ცხრა წლის განმავლობაში და მეორე _ და სახელმწიფოსთან შეუთანხმებლად გაყიდული კლინიკები. მაგალითად, იაშვილის სახელობის ბავშვთა კლინიკა, ჟვანიას სახელობის და ბათუმის დედათა და ბავშვთა ჯანმრთელობის დაცვის კლინიკა ისე გაიყიდა, რომ არც ძველ და არც ახალ მეპატრონეს სახელმწიფო საქმის კურსში არც კი ჩაუყენებიათ.
სადაზღვევოები კი აპელირებენ იმაზე, რომ ისინი წარმოადგენენ კერძო კომპანიებს და მათ საქმიანობაში სახელმწიფო ერევა. რამდენადაც ჩემთვის ცნობილია, ერთ-ერთი ასეთი კომპანიის “არქიმედეს” წარმომადგენლობამ, წარმოშობით ებრაელმა აქციონერებმა თქვენ საპროტესტო წერილითაც მოგმართეს.
როგორია ამასთან დაკავშირებით თქვენი და სახელმწიფოს პოზიცია. როგორი იქნება სახელმწიფოს პოლიტიკა ამ ძალიან მნიშვნელოვან საკითხთან დაკავშირებით?
_ ეს საკმაოდ რთული საკითხია. დავით სერგეენკო ცდილობს მოაგვაროს და მეც კონსულტაციებს ვაძლევ, როგორც ეს შეიძლება. ჩვენ ძალიან რთული მემკვიდრეობა მივიღეთ ამ სფეროში. სადაზღვევო კომპანიების და საავადმყოფოების დაფინანსება ძირითადად მხოლოდ ერთ ჯგუფისთვის ხდებოდა.
ვცდილობ, აქაც შევინარჩუნო მაქსიმალურად ნეიტრალურობა და არ მინდა კრიტიკული პოზიცია გამოვხატო, მაგრამ ავიღოთ თუნდაც ის ფაქტი, რომ სადაზღვევო კომპანიებმა ააშენეს საავადმყოფოები. გასაგებია ის ხელისუფლება რასაც აკეთებდა, ან ის ერთი კაცი, რომელიც მათ რეკომენდაციას უწევდა და ამიტომაც მოხდა ძალიან ბევრი გაუგებრობა. აღარ ჩამოვთვლი ამ ფაქტებს, ძალიან ბევრი ვისაუბრე ამაზე. დღეს ჩვენ ვდგავართ ძალიან რთული პროცესების წინაშე. აი, თქვენ დაასახელეთ რამდენიმე კლინიკა, მე შემიძლია დავამატო ჭიათურა, საჩხერის საავადმყოფოში ვეღარ შეხვალ. ის საავადმყოფო, რაც ააშენეს, პრაქტიკულად აღარ ფუნქციონირებს. დანარჩენები კი დახურეს.
რაც მთავარია, დღეს სადაზღვევოებს არ აქვთ ფინანსური საშუალება შეინახონ ის კლინიკები, რაც მათ საკუთრებაშია. საოცრებები ხდება. სახელმწიფომ დააზღვია, ფულს უხდის მოქალაქეებს, მათ უნდა მიიღონ მკურნალობა და საავადმყოფოები ამას ვერ ახერხებენ.
მე და სერგეენკომ ბევრი ვიფიქრეთ და შევქმენით სპეციალური სააგენტო, რათა სადაზღვევოებისთვის მაქსიმალურად მიგვეცა საშუალება კანონთან შესატყვისობაში მოეყვანათ ყველაფერი, მოემართათ, ან უარი ეთქვათ. ყველა გზას ვეძებდით, ამ მდგომარეობიდან გამოსასვლელად. რთულია, მაგრამ გადაწყვეტადია. ვიცი, რომ იქნება გაუგებრობები, განაწყენებაც, მაგრამ მათ აქვთ საკუთრება, რომელსაც ვერ მართავენ. ამ საკუთრებაზე კი ჩვენ, სახელმწიფო გავცემთ ფულს, ოღონდ, ამას ვაკეთებთ იმისთვის, რომ მოქალაქემ მაქსიმალური მომსახურება მიიღოს.
_ თუმცა, ხშირ შემთხვევაში, მოქალაქეები ვერ იღებენ იმ მომსახურებას, რაც მათ რეალურად ესაჭიროებათ.
_ დიახ და ეს არის სწორედ პრობლემა. როდესაც მათ მიუთითებენ იმაზე, _ თუ არ შეგიძლიათ, მაშინ დათმეთ და აგერ არის ამის გადაცემის მექანიზმიო, ეს არ მოსწონთ. არ უნდათ, რომ რეალური ღირებულებით დათმონ. მათ უნდათ, ზოგიერთ შემთხვევაში, მთელი ვალები ჩამოაწერონ, რომელიც 3- 4-ჯერ ძვირია, ვიდრე ის საავადმყოფო, რომელსაც ეს ვალები გააჩნია. ჩვენ გვინდა მხოლოდ კონკრეტული შენობა, კონკრეტული საავადმყოფო, რომელიც უნდა მოემსახუროს ხალხს და ის თანხები დააფიქსიროს, რაც საჭიროა. ბევრი გაუგებრობა და ბევრი პრობლემაა, მაგრამ, გადაწყვეტადია ეს საკითხი. ორივე მხრიდან უნდა იყოს დათმობა. რაღაც დათმობებზე უნდა წამოვიდნენ, რეალობას უნდა გაუწიონ ანგარიში. ხალხს უნდა მკურნალობა, ისინი ამას ვერ ასრულებენ და ამავდროულად მეპატრონეები არიან. აქაც არის პრობლემა და რა თქმა უნდა, არის კითხვები. გადაიჭრება ნელ-ნელა, ნაბიჯ-ნაბიჯ ეს პრობლემები.
