ჩოხატაურის მუნიციპალიტეტის გამგებლის მოვალეობის შემსრულებლის, თამაზ ჯინჭარაძის ინფორმაციით, სტიქიისგან მიყენებული ზარალი ჩოხატაურში მილიონ ლარს აღწევს:
_ ყველაზე დიდი მასშტაბის სტიქია აგვისტოს ბოლოს იყო _ მხოლოდ იმ დღეებში 750 000 ლარის ზარალი მოგვადგა. დაზიანდა გზები, ჯებირები, სახლები. მთავრობის დადგენილება უკვე მზადაა და ამ დღეებში თანხაც ჩამოირიცხება, _ გვითხრა ჯინჭარაძემ.
ამავე პერიოდში მიადგა ყველაზე დიდი ზარალი ლანჩხუთს. გამგებლის მოვალეობის შემსრულებლის, ზაზა ურუშაძის ინფორმაციით, ზაფხულის ბოლო დღეებმა ლანჩხუთი მილიონ რვაასი ათასი ლარით აზარალა:
_ პირველი იანვრიდან დღემდე მოყენებული ზარალის ოდენობა სამ მილიონს აღწევს. განსაკუთრებით დიდი ზარალი კი აგვისტოს ბოლოს მოგვადგა _ დაიტბორა ათეულობით სახლი, განადგურდა ნათესები, გზები, ხიდები, _ აღნიშნა ჩვენთან საუბრისას ურუშაძემ.
უამინდობამ ყველაზე მეტად ოზურგეთი დააზარალა. გამგებლის მოვალეობის შემსრულებლის, კონსტანტინე შარაშენიძის თქმით, ბოლო რვა თვის განმავლობაში მიყენებული ზარალის ოდენობა 5 მილიონს აღწევს:
_ ყველაზე დიდი მასშტაბის სტიქია 18 აგვისტოს იყო. თუმცა, აგვისტოს სხვა დღეებშიც მიადგა მუნიციპალიტეტს ზარალი. გზები, მილხიდები თუ ხიდები წაღებულია. დაზარალებულია ათეულობით ოჯახი, _ გვითხრა შარაშენიძემ.
გამგებლები ამბობენ, რომ დაზარალებულების დასახმარებლად ყველაფერი გაკეთდება და დაზიანებული ინფრასტრუქტურა უმოკლეს ხანში მოწესრიგდება.
რეგიონული განვითარებისა და ინფრასტრუქტურის სამინისტროს ინფორმაციით, 2013 წლის განმავლობაში მუნიციპალიტეტებს სტიქიების სალიკვიდაციოდ, საქართველოს მთავრობის გადაწყვეტილებით, ეტაპობრივად გამოეყო 34 მილიონ ლარზე მეტი.
ჯერჯერობით, უცნობია ზუსტად რა ზარალია მიადგა მუნიციპალიტეტებს 3-4 სექტემბერს, როდესაც გადაუღებელი წვიმების შედეგად ათეულობით ოჯახი დაზარალდა და ინფრასტრუქტურა განადგურდა.
გარემოს დაცვის სამინისტროს ინფორმაციით, ყველაზე მაღალი ნალექიანობით 3-4 სექტემბერს ქობულეთი, ქედა და ჩოხატაური გამოირჩეოდა.
ამ დღეებში, ოზურგეთში, ქუჩების უმეტესობა დაიტბორა და წყალსატუმბი სამუშაოების ჩატარება გახდა საჭირო. ლანჩხუთის მუნიციპალიტეტის სოფელ მამათში ჩამოწოლილმა მეწყერმა საავტომობილო გზა რამდენიმე საათით ჩაკეტა.
ჩოხატაურში, სოფელ თავპანტაში (ნაბეღლავის თემი), 3 სექტემბერს წამოსულმა უხვმა ნალექმა მოსახლეობა კვლავ დააზარალა. შეგახსენებთ, რომ ზუსტად ამ ადგილზე, 26 აგვისტოს მოვარდნილმა ნიაღვარმა 6 ოჯახი დააზარალა და 35 ოჯახი გარესამყაროს მოწყვიტა. გადაუღებელმა წვიმამ სოფელ ერკეთში სასოფლო გზები ჩამორეცხა. პრობლემები იყო ზოტსა და სურებში.
გურიის სამივე მუნიციპალიტეტში დაიტბორა ყანები და სასოფლო გზები.
განსაკუთრებული ზიანი ზღვისპირეთს მიადგა _ შეკვეთილსა და ურეკში ათეულობით სასტუმრო და საცხოვრებელი სახლი დაიტბორა.
რეგიონული განვითარების და ინფრასტრუქტურის სამინისტროს განცხადებით, 2013 წელი სტიქიებთან დაკავშირებით განსაკუთრებულია, რადგან თითქმის ყოველკვირეულად ფიქსირდება მცირე თუ საშუალო ზომის სტიქია, რაც ზაფხულის პერიოდში უხვი ნალექით არის გამოწვეული. ასევე, ძირითად მიზეზს წარმოადგენს წლების განმავლობაში მუნიციპალიტეტებში შექმნილი მძიმე მდგომარეობა (ძირითადად, გაუწმენდავი სანიაღვრე არხები, რომლებიც ვერ უზრუნველყოფენ უხვი ნალექის გატარებას). სამინისტროს ინიციატივით, ყველა მუნიციპალიტეტს ეთხოვა სანიაღვრე არხებთან დაკავშირებული ინფორმაციის წარმოდგენა, რათა ერთიანი ძალებით მოხდეს ამ პრობლემის ძირითადი ნაწილის მომდევნო წლებში მოგვარება.
