იურიდიულ საკითხთა კომიტეტის წევრებმა პირველი მოსმენისთვის განიხილეს კანონპროექტი “საქართველოს სისხლის სამართლის კოდექსში ცვლილებების შეტანის თაობაზე”. ცვლილებების თანახმად, ტერორიზმის შესახებ ცრუ შეტყობინებისთვის 3 წლამდე თავისუფლების აღკვეთის ნაცვლად სანქცია 2-დამ 5-წლამდე იზრდება, ხოლო იმ შემთხვევავში, როდესაც იგივე ქმედება ჩადენილია დამამძიმებელ გარემოებებში (წინასწარი შეთანხმებით ჯგუფის მიერ, არაერთგზის ან რამაც მნიშვნელოვანი ზიანი გამოიწვია) 3-დან 5 წლამდე თავისუფლების აღკვეთის ნაცვლად სანქცია 5-დან 7 წლამდე იზრდება.
საგანგებო (ექსტრემალური) სამსახურების გამოძახების ერთიანი სამნიშნა ნომერი _ “112”-ის განზრახ არამიზნობრივი გამოყენების შემთხვევებისთვის ადმინისტრაციული პასუხისმგებლობის ზომა დგინდება. იურიდიულ საკითხთა კომიტეტმა პირველი მოსმენისთვის განიხილა “ადმინისტრაციულ სამართალდარღვევათა კოდექსში” შესატანი შესაბამისი ცვლილებები. კანონპროექტით, “112”-ის გამოყენება შეტყობინების მიმღები პირისთვის შეურაცხყოფის მიყენების მიზნით ან სხვა შეურაცხმყოფელი განცხადებების გასაკეთებლად, ასევე, აღნიშნული ნომრის არამიზნობრივი სისტემატური გამოყენება გადაუდებელი დახმარების აუცილებლობის ერთსა და იმავე მოვლენასთან დაკავშირებით გამოიწვევს გაფრთხილებას ან დაჯარიმებას 300 ლარის ოდენობით. აღნიშნული სამართალდარღვევის განმეორებით ჩადენა გამოიწვევს დაჯარიმებას 400 ლარის ოდენობით. ცვლილებების თანახმად, თუ “112”-ის გამოყენება მოხდა გადაუდებელი დახმარების მოთხოვნის მიზნით ცრუ შეტყობინების განსახორციელებლად, რომელსაც შედეგად მოჰყვა შესაბამისი საგანგებო სამსახურის შემთხვევის ადგილზე გასვლა, პირი დაჯარიმდება 500 ლარის ოდენობით. იგივე სამართალდარღვევის განმეორებით ჩადენა გამოიწვევს დაჯარიმებას 1000 ლარის ოდენობით ან ადმინისტაციულ პატიმრობას 15 დღე-ღამემდე ვადით. კანონპროექტში მითითებული სისტემატური გამოყენება გულისხმობს ერთი და იმავე პირის მიერ აღნინულ ნომერზე ნებისმიერი უწყვეტი ერთი საათის განმავლობაში 3 ან მეტი შეტყობინების განხორციელებას, გარდა იმ შემთხვევისა, როდესაც შეტყობინების ინიციატორი აზუსტებს, ავსებს ან აკონკრეტებს გადაუდებელი დახმარების საჭიროებასთან დაკავშირებულ ფაქტობრივ გარემოებებს.
იურიდიულ საკითხთა კომიტეტმა პირველი მოსმენისთვის განიხილა “კონტრდაზვერვითი საქმიანობის შესახებ” კანონში შესატანი ცვლილებები. კანონპროექტის თანახმად, ქვეყანაში ერთიანი კონტრდაზვერვითი საქმიანობის ორგანიზაციისა და სპეციალური სამსახურების საქმიანობის კოორდინაციის წესს საქართველოს პრეზიდენტის ნაცვლად საქართველოს მთავრობა განსაზღვრავს. ცვლილებებით, კანონის დებულებები შესაბამისობაში მოდის 2013 წლის ოქტომბრის მორიგი საპრეზიდენტო არჩევნების შედეგად არჩეული პრეზიდენტის მიერ ფიცის დადების მომენტიდან ასამოქმედებელი კონსტიტუციის მთელ რიგ ნორმებთან. პროექტის მიხედვით, კონტრდაზვერვითი საქმიანობის კოორდიანციის განმახორციელებელი სამსახურის ხელმძღვანელი ვალდებულია არანაკლებ წელიწადში ერთხელ ანგარიში წარუდგინოს როგორც საქართველოს პრეზიდენტს, ასევე საქართველოს პრემიერ-მინისტრს.
კომიტეტის წევრებმა პირველი მოსმენისთვის განიხილეს “საჯარო სამსახურის შესახებ” კანონში შესატანი ცვლილებები. კანონპროექტის მიხედვით, პრეზიდენტის გარკვეული უფლებამოსილებები მთავრობის კომპეტენციაში გადადის. პროექტის შემუშავება განაპირობა იმ საკონსტიტუციო ცვლილებებმა, რომელიც 2013 წლის ოქტომბრის მორიგი საპრეზიდენტო არჩევნების შედეგად არჩეული პრეზიდენტის მიერ ფიცის დადების მომენტიდან ამოქმედდება.
ახალი საკონსტიტუციო ნორმების ამოქმედებას უკავშირდება “საქართველოს პარლამენტის წევრის სტატუსის შესახებ” კანონში ცვლილებების შესატანის შესახებ” კანონპროექტიც, რომელიც იურიდიულ საკითხთა კომიტეტმა ასევე პირველი მოსმენისთვის განიხილა. პროექტის თანახმად, პარლამენტის წევრისა და მისი ოჯახის წევრების უსაფრთხოების უზრუნველყოფის გადაწყვეტილებას საქართველოს პრეზიდენტის ნაცვლად პრემიერ-მინისტრი მიიღებს.
იურიდიულ საკითხთა კომიტეტმა მხარი დაუჭირა განხილული კანონპროექტების პლენარულ სხდომაზე გატანას.
