როგორ აღმოჩნდა ეროვნული ოლიმპიური კომიტეტის ყოფილი პრეზიდენტი, 2004 წლის მოწვევის საქართველოს პარლამენტის წევრი და კახეთის მხარის ყოფილი გუბერნატორი, სამედიცინო ბიზნესში?
რას პირდება გია ნაცვლიშვილი სახელმწიფოს, რატომ ჰქონდა მას გაფორმებული თავისი წილი არასრულწლოვან შვილებზე და რატომ აირჩია მან სამედიცინო ბიზნესი, ამ ყველაფერზე პასუხს ნაცვლიშვილის ვრცელი ინტერვიუდან შეიტყობთ, რომელიც “გურია ნიუსის” ვებგვერდზე დღესვე გამოქვეყნდება.
“მესაკუთრეს შეუძლია, კერძო საკუთრება ისე გაასხვისოს, რომ არავის ჰკითხოს. როგორც მედიამონიტორინგში ვნახე, მითვლიდა იაშვილის კლინიკის მფლობელი, რატომ უნდა ვკითხო რამე სერგეენკოსო. როგორც აქამდე არაერთგზის აღვნიშნე, არსებობს კანონი და არსებობს სამართალი. ეს არის შემთხვევა, როდესაც მონოპოლიური სტრუქტურა თითქმის მთლიანად მართავს ბავშვთა სერვისებს. მიუხედავად იმისა, რომ ბავშვთა საავადმყოფო ოფიციალურად არ შედის სახელმწიფოს მიერ დადგენილ კანონში “სტრატეგიული ობიექტების შესახებ”, სახელმწიფოს აქვს კანონი, რომელიც შეუძლია გამოიყენოს აბსოლუტურად ლეგალურად და მდგომარეობს შემდეგში: თუკი სახელმწიფოს ინტერესებს და მოსახლეობას ექმნება საფრთხე, სახელმწიფოს შეუძლია მოიქცეს ისე, რომ დაიცვას თავისი მოქალაქეები. ჯერჯერობით, ეს საჭირო არ გამხდარა.
ნამდვილად არ არის პრობლემა არანაირი ინვესტორის შემოსვლა. მთავარია, მათ როგორი რეპუტაცია აქვთ, როგორ ხედავენ დარგის განვითარების და რა დოზით აპირებენ თანამშრომლობას სახელმწიფოსთან. ეს არის განმსაზღვრელი კრიტერიუმები.” _ განაცხადა დავით სერგეენკომ “გურია ნიუსთან”.
2013 წელი. 13 აგვისტო. 5 ქართული კლინიკის გასხვისება…
2013 წლის 13 აგვისტოს საჯარო რეესტრის ეროვნულ სააგენტოში რეგისტრირებული N B13080113 ხელშეკრულება წილის გასხვისების შესახებ, რომლის თანახმადაც 2013 წლის 13 აგვისტოდან ,,AVANTE HOSPITAL MANAGMENT GROUP“ – ის, რომელიც წარმოადგენს შპს „მ.იაშვილის სახელობის ბავშვთა ცენტრალური საავადმყოფოს“ 66,7% წილის მესაკუთრეს, 50-50%-იანი წილის მფლობელები არიან აბდულა კურსად დარჩინი (თურქეთი) და აზმი ოფლუღლუ (თურქეთი). დირექტორია ივანე ყაჭიური.
აღნიშნული კომპანიის მფლობელები, რომლებმაც წილი თურქ ინვესტორებზე გაასხვისეს, გახლდათ გივი კაპანაძე და ყველასთვის კარგად ცნობილი გია ნაცვლიშვილი. დირექტორი კი ივანე ყაჭიური.
ხელშეკრულების მიხედვით, შპს AVANTE HOSPITAL MANAGMENT GROUP-ის 100% წილის ნასყიდობის ფასი შეადგენს 16 700 000 აშშ დოლარს.
სწორედ ამ ხელშეკრულებიდან ირკვევა, რომ შპს “AVANTE HOSPITAL MANAJMENTS GROUP” არა მხოლოდ იაშვილის, არამედ კიდევ ოთხი კლინიკის მესაკუთრე პარტნიორი იყო. შესაბამისად, გამოვიდა რომ 100%-იანი წილის გაყიდვის შემდეგ, თურქი ინვესტორების ხელში გადავიდა კიდევ 4 ქართული კლინიკა.
ამ კლინიკათა ჩამონათვალი ასეთია: შპს “ახალი სიცოცხლე” (100%); შპს “ბათუმის დედათა და ბავშვთა ჯანმრთელობის დაცვის რესპუბლიკური ცენტრი”(100 % წილის მესაკუთრე); შპს “პედიატრიის ინსტიტუტი. ალერგიისა და რევმატოლოგიის ცენტრი”(80 % წილის მესაკუთრე); შპს “ბავშვთა ახალი კლინიკა”(75 % წილის მესაკუთრე).
2013 წლის 12 აგვისტოს ივანე ყაჭიური განცხადებით მიმართავს საჯარო რეესტრის ეროვნულ სააგენტოს შპს “ჯიემსი”-ში ცვლილებების რეგისტრაციის მოთხოვნით. ამავე მოთხოვნაში შენიშვნის სახით აზუსტებს, რომ არ იხელმძღვანელონ 2013 წლის 8 აგვისტოს წარმოდგენილი წესდებით. ივანე ყაჭიური შპს “ჯი ემ სი” -ს დირექტორია.
შპს “ჯი-ემ- სი”-ს 66,7 % წილის მესაკუთრე პარტნიორი შპს “AVANTE HOSPITAL MANAJMENTS GROUP”-ია. ხოლო 33,3 % წლის მესაკუთრე კი შპს “ავერსი-ფარმაა” რომელსაც გენერალური დირექტორი ირაკლი ფურცელაძე წარმოადგენს.
“გურია ნიუსის” მიერ მოპოვებული ინფორმაციით, პარტნიორთა კრებაზე შემდეგი გადაწყვეტილება მიიღეს: “განხორციელდეს რეორგანიზაცია, კერძოდ შპს “მ. იაშვილის სახელობის ცენტრალური საავადმყოფო მიუერთდეს შპს ” ჯი ემ სი”-ს შერწყმის გზით. ასევე: “რეორგანიზაციის შემდეგ შპს “ჯი ემ სი”-ს სახელწოდებად განისაზღვროს შპს “მ.იაშვილის სახელობის ბავშვთა ცენტრალური საავადმყოფო. რეორგანიზაციის შემდეგ საზოგადოების საწესდებო კაპიტალი განისაზღვრა 12 615875, 90 ლარით. ამავე რეორგანიზაციის შედეგად იაშვილის სახელობის ბავშვთა ცენტრალური საავადმყოფოს დირექტორად დაინიშნა შოთა ჯოგლიძე. შეიქნა სამეთვალყურეო საბჭო 4 წლის ვადით შემდეგი შემადგენლობით: სამეთვალყურეო საბჭოს თავმჯდომარე – ივანე ყაჭიური; სამეთვალყურე საბჭოს წევრი, გიორგი ბერიშვილი; სამეთვალყურეო საბჭოს წევრი, კახაბერ გუგაშვილი.
ყველაფერი კი სწორედ შპს “ჯი-ემ-სი” დან დაიწყო, 2011 წელს…
გია ნაცვლიშვილი: “დიახ, მე და ჩემმა მეგობრებმა “ჯი-ემ -სი სწორედ მაგ აუქციონისთვის დავაფუძნეთ…”
“გურია ნიუსის” კითხვაზე _ ბატონო გია, თქვენი კომპანია, რომელმაც აუქციონზე გატანილი იაშვილის კლინიკა იყიდა, ამ აუქციონამდე სულ რაღაც ერთი კვირით ადრე დაარსდა, როგორ ფიქრობთ, ეს არ არის საეჭვო? კლინიკის ყოფილი მეწილე აცხადებს:
_დიახ, მე ვადასტურებ, რომ ეს კომპანია დაარსდა ერთი კვირით ადრე და პირდაპირ გეტყვით, სწორედ იმ მიზნით შეიქმნა, რომ ამ აუქციონში მიგვეღო მონაწილეობა… მე და ჩემმა მეგობარმა “ჯი-ემ -სი” დავაფუძნეთ სწორედ ამისთვის.
“გურია ნიუსის” მიერ მოპოვებული მასალების თანახმად, საქართველოს ეკონომიკისა და მდგრადი განვითარების სამინისტროს 2011 წლის 11 მაისის ბრძანებით სს “მ.იაშვილის სახ. ბავშვთა ცენტრალური საავადმყოფოს” საკუთრებაში არსებული 1 ლარიანი ნომინალური ღირებულების 5 868 870 ცალი აქცია (სახელმწიფო წილი კაპიტალში – 100%), პრივატიზების მიზნით, გატანილი იქნა ელექტრონულ აუქციონზე. საწყისი საპრივატიზებო საფასური დადგინდა 6 000 000 ლარის ოდენობით.
ელექტრონულ აუქციონში მონაწილეობის მისაღებად, გადასახდელი უპირობო და გამოუხმობი საბანკო გარანტია/,,ბე“-ს ოდენობა დადგინდა 1 800 000 ლარის ოდენობით, სავაჭრო ბიჯი – 50 000 ლარი.
აუქციონი ჩატარდა 2011 წლის 25 მაისს და მასში მონაწილეობდა ორი იურიდიული პირი – შპს “ჯორჯიან მედი” (დაფუძნდა 2011 წლის 16 მაისს) და შპს “ჯი ემ სი”. საბოლოო გასაყიდი ფასი დაფიქსირდა 10 450 000 ლარის ოდენობით და გამარჯვებულად გამოვლინდა შპს “ჯი ემ სი”, რომელთანაც 2011 წლის 23 ივნისს გაფორმდა ნასყიდობის ხელშეკრულება.
აქციათა რეესტრის მონაცემებით 2011 წლის 2 მაისის ამონაწერის მიხედვით, სს ,”მ. იაშვილის სახ. ბავშვთა ცენტრალური საავადმყოფოს” პრივატიზების მომენტისათვის ბალანსზე ერიცხებოდა 13 768 071 ლარის აქტივები. ამავდროულად, ერიცხებოდა კრედიტორული დავალიანება – 1 168 506 ლარის ოდენობით, გაუნაწილებელი მოგება – 1 689 417 ლარი.
100 ლარიანი კომპანიის 10 მილიონიანი შენაძენი…
საჯარო რეესტრის ამონაწერით ირკვევა, რომ შპს “ჯი ემ სი” დაფუძნებულია 2011 წლის 3 მაისს (აუქციონის გამოცხადებამდე 1 კვირით ადრე) – საწესდებო კაპიტალში 100 ლარიანი შენატანით – მაია ბუსიშვილის (50%), ზაზა კაპანაძის (25%) და გია ნაცვლიშვილის (25%) მიერ.
შპს “ჯი ემ სი”-მ საქართველოს ეკონომიკისა და მდგრადი განვითარების სამინისტროს თანხმობით, სს “ბანკ რესპუბლიკაში” 2011 წლის 24 ივნისს იპოთეკით დატვირთა შესყიდული ქონება და გადაიხადა საპრივატიზებო საფასური.
ანუ, ეს ყველაფერი მოხდა ნასყიდობის ხელშეკრულების გაფორმების შემდეგ…
2012 წლის მარტის თვეში შპს “ნიუ ლაიფმა” (დირექტორი ივანე ყაჭიური, დამფუძნებლები – ზაზა კაპანაძე (75%), გია ნაცვლიშვილი (25%)) შეისყიდა მაია ბუსიშვილის – 33,3% (100 ლარი), ზაზა კაპანაძის და გია ნაცვლიშვილის – 16,7-16,7% (50-50 ლარი) და გახდა შპს “ჯი ემ სი”-ს საწესდებო კაპიტალის – 66,7%-იანი წილის მფლობელი, ხოლო 33,3%-იან წილს ფლობდა შოთა ბიწაძე.
2013 წლის 13 აგვისტოდან კი “AVANTE”-ს (იგივე ყოფილი შპს ,,ნიუ ლაიფი”) 50-50%-იანი წილის მფლობელები არიან აბდულა კურსად დარჩინი (თურქეთი) და აზმი ოფლუღლუ (თურქეთი), დირექტორი ივანე ყაჭიური.
ინვესტორი და ნასყიდობა “გაყინული ფულით”
პირველი ეჭვი თურქული კომპანიის შესახებ მაშინ გაჩნდა, როდესაც ტექინ ატიკმა “გურია ნიუსს” ექსკლუზიურად განუცხადა, რომ საავადმყოფოებში ფული არ ჰქონდათ გადახდილი.
ჩვენს კითხვაზე, _ საავადმყოფო რამდენად შეიძინეთ და გადახდილი გაქვთ თუ არა თანხა, ტექინ ატიკმა განაცხადა: “მე ქართული არ ვიცი. ჩემმა მეგობარმა დამირეკა და ტელევიზიით ვიგებ, “ავანტი”-ს ამ საავადმყოფოების მფლობელს. “ჰოსპიტალ გრუპს” რომელიც საავადმყოფოს ქსელია, როლის ხელმძღვანელია გია ნაცვლიშვილი და ზაზა კაპანაძე, როლისგანაც ჩვენ ვიყიდეთ, პრობლემები აქვთ სამართალდამცავებთანო. ჩვენი ადვოკატები გავუშვით, რათა გაგვერკვია რა ხდებოდა. გვითხრეს, რომ ეს არ ეხებოდა საავადმყოფოებს. ეს ეხებოდა სამშენებლო კომპანია “არტესს”. გამომდინარე იქედან, რომ ეს თემა გახდა სადავო, რომ არ გაგრძელებულიყო ზედმეტი დავა სხვადასხვა მხრიდან, ჩვენ გადასახდელი თანხა ანგარიშზე გავყინეთ. 6 თვეა ველოდებით სასამართლოს გადაწყვეტილებას. სასამართლოს გადაწყვეტილების შემდეგ მივიღებთ გადაწყვეტილებას, გადავუხადოთ თუ არა თანხა.
_ რა რა რაოდენობის თანხა გაქვთ გაყინული ანგარიშზე?
_ საუბარია 20 მილიონზე…
“არტესი,” “ჯი-ემ-სი” და დირექტორი ყაჭიური _ ბერმუდის სამკუთხედი…
შპს “ჯი ემ სი” – ს ერთერთი დამფუძნებელი ზაზა კაპანაძე წარმოადგენდა შპს “არტესის” დამფუძნებელს. საუბარია იმ კომპანიაზე, რომელიც ფინანსთა სამინისტროს საგამოძიებო სამსახურის გამოძიების საგანია და რომლის გამოც კაპანაძე და ნაცვლიშვილი დაკითხვაზე იყვნენ დაბარებულები.
მართალია გია ნაცვლიშვილი ჩვენთან საუბრისას აცხადებს, რომ არტესს არანაირი კავშირი არ აქვს კლინიკებთან, მაგრამ “გურია ნიუსის” მიერ მოპოვებული მასალებით ირკვევა, რომ არც მთლად უამისობაა…
2010-2012 წლებში სამედიცინო დაწესებულებათა რეაბილიტაციისა და აღჭურვის სახელმწიფო პროგრამის ფარგლებში განხორციელდა რიგი სამედიცინო დაწესებულებების სამშენებლო-სარეაბილიტაციო სამუშაოები. ამ პროცესზე ზედამხედველობა ევალებოდა საქართველოს შრომის, ჯანმრთელობისა და სოციალური დაცვის სამინისტროსა და სამინისტროს კონტროლს დაქვემდებარებული სსიპ-საქართველოს ჯანმრთელობისა და სოციალური დაცვის პროექტების განმახორციელებელი ცენტრს, რომლის დირექტორი რეორგანიზაციამდე სწორედ ივანე ყაჭიური გახლდათ.
შპს “არტესთან” სამინისტროს 2012 წელს გაფორმებული აქვს 6 ხელშეკრულება საერთო ღირებულებით 5 766 973 ლარი. ხელშეკრულებების საგანს წარმოადგენს საქართველოს ეროვნული სამედიცინო ტრენინგცენტრის სამშენებლო სამუშაოები.
შპს “არტესისათვის” დღეის მდგომარეობით ანაზღაურებულია 5 233 880 ლარი, საიდანაც ავანსად გადახდილ 1 843 679 ლარზე სამინისტროს მიღება-ჩაბარების აქტი არ გაუფორმებია იმის გამო, რომ მომწოდებლის მიერ არასრულად ან/და არაჯეროვნად არის შესრულებული სამუშაოები.
2010-2011 წლებში ამავე პროგრამის ფარგლებში შპს “არტესმა” განახორციელა “რკინიგზის ცენტრალური კლინიკური საავადმყოფოსა” და შპს “თსსუ გივი ჟვანიას სახელობის პედიატრიული კლინიკის” რეაბილიტაცია. პროგრამის განმახორციელებელი (დამკვეთი) იყო სსიპ-საქართველოს ჯანმრთელობისა და სოციალური დაცვის პროექტების განმახორციელებელი ცენტრი, რომლის დირექტორის თანამდებობაზე მუშაობდა ივანე ყაჭიური.
აღნიშნული 2 სამედიცინო დაწესებულების რეაბილიტაციისათვის შპს “არტესმა” ცენტრისაგან მიიღო 46 973,0 ათასი ლარი.
გია ნაცვლიშვილი “გურია ნიუთან” აცხადებს, რომ ეს ყველაფერი მთავრობის გადაწყვეტილებით ხდებოდა…
რატომ ხდებოდა ხელშეკრულებების გაფორმება მაინცდამაინც “არტესთან” და რა როლს თამაშობდა ამ ყველაფერში ივანე ყაჭიური? მასთან დაკავშირება ვერ მოვახერხეთ. სავარაუდოდ, ამ კავშირებს ფინანსთა სამინისტროს საგამოძიებო სამსახური დაადგენს.
საქართველოს ფინანსთა სამინისტროს საგამოძიებო სამსახურის თანამშრომლებმა, 24 აგვისტოს, დიდი ოდენობით საბიუჯეტო თანხების თაღლითურად მისაკუთრებისა და უკანონო შემოსავლის ლეგალიზაციის ფაქტებზე, ეროვნული ოლიმპიური კომიტეტის ყოფილი პრეზიდენტი გია ნაცვლიშვილი, შპს “არტესისა” და AVANTE HOSPITAL MANAGMENT GROUP-ის დამფუძნებელი ზაზა კაპანაძე, პასუხისგებაში მისცეს.
ფინანსთა სამინისტროს მიერ გავრცელებულ ოფიციალურ ინფორმაციაში ვკითხულობთ: “გია ნაცვლიშვილმა და ზაზა კაპანაძემ, დანაშაულებრივი გზით მიღებული ფულადი თანხების ლეგალიზების მიზნით, შპს “არტესიდან”, დივიდენდის სახით, გაიტანეს თანხა, რაც მათ მიერვე დაფუძნებულ, შპს AVANTE HOSPITAL MANAGMENT GROUP-ში ჩარიცხეს. აღნიშნული თანხით კი საქართველოს ეკონომიკის სამინისტროსა და აჭარის ავტონომიური რესპუბლიკის ფინანსთა და ეკონომიკის სამინისტროებისგან, თბილისში ორი სამშობიარო სახლი, ბათუმის დედათა და ბავშვთა ჯანმრთელობის დაცვის რესპუბლიკური ცენტრი და ბათუმის სამშობიარო სახლი, ასევე პედიატრიის ინსტიტუტის ალერგიისა და რევმატოლოგიის ცენტრი, გ. ჟვანიას სახელობის პედიატრიული კლინიკა და მ. იაშვილის სახელობის ბავშვთა ცენტრალური საავადმყოფოები შეიძინეს, რითაც უკანონოდ მიღებული შემოსავლის ლეგალიზება განახორციელეს.”
გია ნაცვლიშვილი, ბრალდებას აბსურდულს უწოდებს და მის წინააღმდეგ წაყენებულ ბრალს არ აღიარებს.
მის არგუმენტებს და პოზიციას მოგვიანებით “გურია ნიუსზე” შემოგთავაზებთ.
