მალევე, კომპანია “ეკო-ფუდის” თითქმის ყველა ნაწარმზე გაჩნდა სტიკერი წარწერით “გახდი ქველმოქმედი”, რამაც მომხმარებლის დაბნევა გამოიწვია.
კონკრეტულად, “გურია ნიუსის” მცირე კვლევამ, რომელიც მარკეტებში ჩავატარეთ და “ეკო-ფუდის” ნაწარმის მყიდველის გამოკითხვას ეხებოდა, აჩვენა რომ მომხმარებელი, მაგალითად კომპანიის არაჟანზე არჩევანს აკეთებს იმიტომ, რომ ჰგონია ხდება ქველმოქმედი, რადგან პროდუქტს ახლავს სტიკერი წარწერით “გახდი ქველმოქმედი”.
3 დღის განმავლობაში “ეკო-ფუდის” პროდუქციის 60 მომხმარებლიდან, ჩვენთან საუბარში ყველამ ხაზი გასუვა, რომ სწორედ საქველმოქმედო აქციის გამო აჩერებდნენ აღნიშნული კომპანიის პროდუქტზე არჩევანს და 60 გამოკითხული ადამიანიდან მხოლოდ 7-მა იცოდა, რომ აქცია რძის შეძენის შემთხვევაში ვრცელდებოდა.
“ეკო-ფუდის” სარეკლამო მენეჯერი დადუ ბლიაძე “გურია ნიუსთან” საუბრისას აღნიშნავს, რომ ისინი მომხმარებლის სიცრუეში შეყვანას არ ცდილობენ, რძის გრდა სხვა პროდუქტებზე, რომელთაც სტიკერი ახლავს თან წარწერით “გახდი ქველმოქმედი” მითითებულია რძის შეფუთვის ფოტოც.
“მომხმარებელი სიცრუეში არ შეგვყავს, ვინაიდან იქ სრული ტექსტია მოცემული იმის, რაზეც არის აქცია. დევს სტიკერი, სადაც ტექსტის ქვემოთ რძის ფოტოცაა. თუ ჩვენ მომხმარებლის სიცრუეში შეყვანას ვცდილობთ, მაშინ ეს ფოტო არ იქნებოდა. ჩვენ არ გვსურს ვინმე მოვატყუოთ”, _ უთხრა “გურია ნიუსს” ბლიაძემ.
თუმცა, საზოგადოებრივი კომუნიკაცების სპეციალისტი არჩილ გამზარდია მიიჩნევს, რომ საქმე გვაქვს არა კორპორატიულ სოციალურ პასუხისმგებლობასთან, რასაც ესა თუ ის კომპანია ხშირად მიმართავს, არამედ მომხმარებლის ჩვეულებრივ გასულელებასთან, ასე ვთქვათ, აფიორასთან.
“როგორც ჩანს, “ეკო-ფუდის” ამ აქციაში მიამიტი მომხმარებლის გასულელებაზე არის აქცენტი გაკეთებული. უნდა აღინიშნოს, რომ კორპორატიული სოციალური პასუხისმგებლობა თანამედროვე საზოგადოებრივი ურთიერთობების ერთ-ერთ წამყვან შესაძლებლობად იქცა. ამ კუთხით, აქცენტი კეთდება იმაზე, რომ ესა თუ ის კომპანია საკუთარ თავზე იღებს ვალდებულებას სოციალური შედეგების წინწაწევაში მიიღოს თანამონაწილეობა; ის (ორგანიზაცია) ასევე შეიძლება გამოვიდეს ინიციატივით, რა დროსაც მომხმარებლებს მოუწოდებს თანამონაწილეობა მიიღოს ამგვარ პროცესებში. მიღწეული სოციალური შედეგების, კომპანიის მხრიდან თვითვალდებულებისა და ა.შ. ფაქტორების გათვალისწინებით, მომხმარებელი მეტად ლოიალური ხდება ამგვარი ორგანიზაციების მიმართ, რაც მათ ბიზნესზეც აისახება. ეს არის მთავარი 
წყარო კორპორატიული სოციალური პასუხისმგებლობისა. “ეკო-ფუდის” შემთხვევაში კი, როგორც ჩანს, საქმე გვაქვს არა კორპორატიულ სოციალურ პასუხისმგებლობასთან, არამედ მომხმარებლის ჩვეულებრივ გასულელებასთან, ასე ვთქვათ, აფიორასთან. ამის ნათელი მტკიცებულებაა მისი მხრიდან ფაქტობრივი მოცემულობა, რომლის მიხედვითაც სოციალური პასუხისმგებლობა მხოლოდ ერთ პროდუქტზე ვრცელდება, მაგრამ ეს პროდუქტი “ეკო-ფუდისათვის” წარმოადგენს ხერხს სხვა პროდუქტის რეალიზაციისა. ფორმალურად, შესაძლოა ვერც შევედავოთ ეკო-ფუდს, რამდენადაც მათ ნახევრად შეფარულად რეალური ინფორმაცია გამოხატული აქვს. თუმცა, ამავდროულად ის სარგებლობს მომხმარებლის ნაკლებინფორმირებულობით და ასევე იყენებს პროპაგანდისტულ მეთოდს, რომელიც ერთი პროდუქტის პირობას სხვა პროდუქტსაც გადასცემს მომხმარებლის თვალში”, _ უთხრა “გურია ნიუსს” გამზარდიამ.
მისივე თქმით, ასეთი საქციელით კომპანია ბიზნესისთვის პირდაპირი სარგებლის მიღებას ცდილობს.
“მე ამას შეფარულ აფიორასა და მდაბიო საქციელს დავარქმევდი, რამდენადაც ხდება ე.წ. სოციალური ობიექტით ბიზნესისთვის პირდაპირი სარგებლის მიღება, ანუ ლეიკემიით დაავადებული ბავშვები გამოყენებელია სარეკლამო საშუალებად, რომელთა მიმართ სენსიტიური საზოგადოება უზრუნველყოფს ეკო-ფუდის გაყიდვების პირდაპირ ზრდას ყველა პროდუქტიდან.
თუ “ეკო-ფუდს” არ აქვს სურვილი, რომ ამგვარად შეფასდეს მისი საზოგადოებრივი კამპანია, მაშინ მან ან ყველა პროდუქტიდან უნდა გადარიცხოს წილი შესაბამის ფონდში და შემდგომ მუდმივად ანგარიში აბაროს საზოგადოებას მიღებული სოციალური შედეგის მიმართ, ან უნდა ამოიღოს ისეთი ტიპის მინაწერები სხვა პროდუქტებიდან, რომელიც მომხმარებელს დააბნევს და მცდარი ქცევისგან დაიცავს.
იურიდიული თვალსაზრისით, შესაძლოა ეკო-ფუდის საქციელი შეუდავებელიც იყოს, ის ამორალურად მოჩანს საზოგადოებრივი ურთიერთობების ეთიკური საზომის კუთხით”, _ განმარტავს გამზარდია.
(შენიშვნა: პირველ ფოტოზე (სტიკერზე) გამოსახულია რძის ფლაკონი, რომლის შეძენის შემთხვევაშიც ხდები ქველმოქმედი. ხოლო, მეორე ფოტოზე ნაჩვენებია კომპანიის მიერ წარმოებული არაჟანი, რომელსაც ასევე ახლავს იგივე საკრელამო სტიკერი, თუმცა მისი შეძენის შემთხვევაში, ღირებულების 10% ფონდში არ ირიცხება)
