“თუ საკუთრება არ იქნება დაცული, ეკონომიკა და ბიზნესი ვერ განვითარდება”

შეხვედრაზე, რომელსაც თეა წულუკიანი ხელმძღვანელობდა და 70-მდე კერძო საამზომველო კომპანიის წარმომადგენელი ესწრებოდა, საჯარო რეესტრის თანამშრომლებმა საკადასტრო ინფორმაციის შექმნის ახალ ასპექტებთან დაკავშირებით პრეზენტაციები წარადგინეს.

“საქართველოში რამდენიმე ასეული კერძო საამზომველო კომპანია არსებობს, ხოლო მონაცემები, რომლებიც მათ საჯარო რეესტრში შემოაქვთ, ხშირ შემთხვევაში, პრობლემურია როგორც ხარისხის, ისე სიზუსტის კუთხით. დღეს ჩვენ საჯარო რეესტრის ინიციატივით ამ კომპანიების დიდ ნაწილს ვხდებით, ერთიანი საკადასტრო სტანდარტის დასამკვიდრებლად გვსურს გადავდგათ პირველი ნაბიჯი. აღსანიშნავია, რომ საბოლოოდ უნდა აღიკვეთოს ერთი მავნე ჩვევა: ზოგიერთი კომპანია ადგილზე საერთოდ არ გადის და თავის კაბინეტში ზომავს მიწებს, რაც კერძო საკუთრების ხელყოფას იწვევს. თუ საკუთრება არ იქნება დაცული, ეკონომიკა და ბიზნესი ვერ განვითარდება,” _ აღნიშნა შეხვედრაზე თეა წულუკიანმა.

საჯარო რეესტრის ეროვნულ სააგენტოში უძრავი ქონების რეგისტრაციისთვის წარმოდგენილი საკადასტრო აზომვითი ნახაზი, რომელსაც კერძო კომპანია ასრულებს, ხშირად არ შეესაბამება ხარისხისა და სიზუსტის დღევანდელ მოთხოვნებს, არასაკმარისი და უხარისხო გრაფიკული მონაცემების გამო კი უძრავ ქონებაზე საკუთრების უფლების რეგისტრაციის პროცესი ფერხდება, მიწის ნაკვეთების გადაფარვის ალბათობა და, შესაბამისად, სამეზობლო დავების რაოდენობა იზრდება.

სწორედ ამ პრობლემის გამოსწორების მიზნით, საჯარო რეესტრში სულ რამდენიმე თვის წინ შეიქმნა საკადასტრო სტანდარტებზე მომუშავე მუდმივმოქმედი კომისია, რომელმაც საამზომველო კომპანიების მიერ წარმოსადგენი მონაცემების შესახებ ცვლილებების პროექტი მოამზადა.

ცვლილებების პროექტის თანახმად, საჯარო რეესტრი კომპანიებს სთავაზობს ისეთი სახის აზომვითი ნახაზის სავალდებულო ფორმას, რომელიც უზრუნველყოფს მათ მიერ მოწოდებული ინფორმაციის ერთგვაროვნებასა და სიზუსტეს. ამით ქვეყანა სანდო და ხარისხიან საკადასტრო მონაცემს მიიღებს.

გარდა ამისა, საჯარო რეესტრის მიერ შემუშავებული ცვლილებების პროექტის თანახმად, პასუხისმგებლობა დაინტერესებულ პირსა და ამზომველს შორის ნაწილდება, რაც ორივე მხარეს აიძულებს, მეტი ყურადღებითა და პასუხისმგებლობით მოეკიდონ, ერთი მხრივ, მიწის ნაკვეთის ადგილმდებარეობისა და საზღვრის ზუსტ მითითებას, ხოლო მეორე მხრივ, მითითებული საზღვრის მაღალი სიზუსტით აზომვას.

კერძო საამზომველო კომპანიებთან თანამშრომლობის საბოლოო მიზანია უძრავი ქონების რეგისტრაციისა და საკადასტრო სფეროში არსებული პრობლემების გამოსწორება და მოგვარება.