ფარცხალაძის პროფესიული გამოცდილების შესახებ ბევრი არაფერია ცნობილი. საგამოძიებო სამსახურის უფროსობამდე ის ფინანსთა სამინისტრო საგამოძიებო სამსახურის საგამოძიებო დეპარტამენტის შიდა ქართლის სამმართველოს უფროსის პოსტს იკავებდა. ოთარ ფარცხალაძის სახელი რამდენიმე გახმაურებულ ინცინდენტს უკავშირდება: თბილისის მერიის მაღალჩინოოსნების დაკავება ნატოს მაღალი რანგის დელეგაციის ვიზიტის დროს და მინარეთის დემონტაჟი სოფელ ჭელაში.
მერიის მაღალჩინოსნების დაკავების შემდეგ ფინანსთა სამინისტროს საგამოძიებო სამსახურმა ურთიერთგამომრიცხავი ინფორმაცია გაავრცელა: თავდაპირველად ითქვა, რომ მერიისა და საკრებულოს 30-მდე თანამშრომელი მოწმის სტატუსით დაიბარეს. თუმცა, ვერავინ ახსნა რატომ დაადეს მათ ხელბორკილი და აღუკვეთეს თავისუფლება.
მეორე ინცინდენტი კი სოფელ ჭელაში მინარეთის დემონტაჟს უკავშირდება, რამაც ქვეყანას რელიგიური დაპისრისპირების რეალური საფრთხე შეუქმნა. ოპერაციისას, რომლის დროსაც მძიმე და საჰაერო ტექნიკაც კი გამოიყენეს, არაერთი ადამიანი დაშავდა.
იყო თუ არა ფინანსთა სამინისტროს საგამოძიებო სამსახურის უფროსი ოთარ ფარცხალაძე ეფექტური ხელმძღვანელი?
საპარლამენტო არჩევნების შემდეგ საგამოძიებო სამსახურს არაერთმა ბიზნესმენმა მიმართა, რომლებსაც წინა ხელისუფლების დროს ბიუჯეტში იძულებით და მუქარით გადაახდევინეს მილიონობით ლარის ჯარიმა. ისინი სამართლიანობის აღდგენას ელიან. თუმცა, როგორც რამდენიმე მათგანმა გვითხრა, განცხადების შეტანის შემდეგ არავინ დაკავშირებიათ.
დღემდე არ დაუკითხავთ კოკა-კოლას პრეზიდენტი თემურ ჭყონია, რომელსაც უცხოელი პარტნიორები თანხების მითვისებაში ადანაშაულებენ. დღემდე გამოუძიებელია შპს “გოლეთიანის“ საქმე რომლის ხელმძღვანელ ჭიჭიკო გოლეთიანს ბიუჯეტში მუქარით გადაახდევინეს მილიონზე მეტი. ასეთი საქმეები უამრავია და ისევე როგორც პროკურატურას, არც ფინანსთა სამინისტროს საგამოძიებო სამსახური გამოუჩენია თავი მათი გახსნის მაჩვენებლით.
იურისტთა ერთი ნაწილი იმასაც ამბობს, რომ საგამოძიებო სამსახურის მიერ გამოძიებულ რამდენიმე რეზონანსული საქმეს მტკიცებულებების თვალსაზრისით სერიოზული ხარვეზები ჰქონდა, რაც სასამართლოში ბრალდების მხარის მარცხით დასრულდება.
