“დღეს თბილისში ჩატარდა გურიის რეგიონალური ფეხბურთის ფედერაციის საერთო კრება (ყრილობა), რომელსაც 7 სუბიექტიდან ხუთი ესწრებოდა. თუმცა წინა დღით ერთ–ერთი სუბიქეტის, შპს “გურია–2000″–ის დირექტორად დანიშნულმა ნუგზარ ცინცაძემ აღნიშნული შპს მიერ წარდგენილი დელეგატის მოხსნის მომართვა ყრილობის დღეს წარმოადგინა. იმის მიუხედავად, რომ სფფ–ის აღმასკომის გადაწყვეტილებით, ყრილობა 2013 წლის 21 მაისამდე არსებული მდგომარეობით ტარდებოდა (ცნობისთვის, 24 მაისის ყრილობა გარკვეული პირების მიერ ყოველგვარი სამართლებრივი საფუძვლის გარეშე ჩაიშალა), დელეგატს ყრილობაში მონაწილეობის უფლება ჰქონდა. თუმცა ყოველგვარი კითხვების ასაცილებლად, ხსნებულ დელეგატს კენჭისყრაში მონაწილეობა არ მიუღია.
გრფფ–ის მე–6 ყრილობაში 7–დან 4 დელეგატი მონაწილეობდა, რაც წესდების შესაბამისად საკმარისი იყო ყრილობის ჩასატარებლად. ოთხივე დელეგატმა ხმა მისცა კახაბერ ებრალიძეს, რომელიც კიდევ 4 წლით უხელმძღვანელებს ორგანიზაციას.
დღესვე “გურიის” პრესსამსახურის სახელით გავრცელდა განცხადება, თითქოს ლანჩხუთის “გურია” არ არის გრფფ–ის წევრი და ასევე მათ წარმომადგენლებს ყრილობაში მონაწილეობის უფლება არ მისცეს. განვმარტავთ, რომ ყრილობაში მონაწილეობის უფლება ჰქონდა სუბიექტების მიერ წარდგენილ დელეგატებს. მათ შორის გახლდათ შპს “გურია–2000’” დელეგატი, რომელიც, როგორც აღვნიშნეთ, წინადღით დანიშნულმა დირექტორმა გააუქმა.
რაც შეეხება გრფფ–ის წევრობას _ ლანჩხუთის “გურია” ნამდვილად არის რეგიონული ფედერაციის წევრი. განვმარტავთ, რომ შპს “გურია–2000” ეს არის ლანჩხუთის “გურია”. შპს–ს საგადასახადო დავალიანების გამო (რომელიც ამჟამად ჩამოწერილია), ამჟამად “გურია” ა(ა)იპ–ის სახით ასპარეზობს. უახლოეს პერიოდში გრფფ–ის გამგეობა გადაწყვეტს ამ ორ სუბიექტთან კონსულტაციის გავლის შემდეგ, თუ რომელი ლანჩხუთის “გურია” უნდა იყოს გრფფ–ის წევრი _ შპს თუ ა(ა)იპი, რამეთუ ორივეს წევრად შემოყვანა გამოიწვევს სუბიექტების გაორებას. ასევე გამგეობა პირველივე სხდომაზე მიიღებს მოქმედ სუბიექტებს წევრად და უფუნქციო სუბიექტების გაყვანის საკითხს დააყენებს.”
აღნიშნული განცხადება “გურია ნიუსში” ცოტა ხნის წინ გამოქვეყნებულ მასალას მოჰყვა.
