“ეს ეხება კონკრეტულად ციტრუსის თემას, რომლის გასაღებასთან დაკავშირებით ოზურგეთის რაიონში მთელი რიგი პრობლემებია. გვაქვს ინფორმაციები, რომლებიც იძლევა იმის საფუძველს, რომ კონკრეტული პირების მხრიდან, ეს ეხება ადგილობრივი ხელისუფლების წარმომადგენლებს, იკვეთება ხელის შეშლის ფაქტები. ამ ინფორმაციებს უფრო დავაზუსტებთ და აუცილებლად ვრცლად და დასაბუთებულად გესუბრებით. თუმცა, არის საფუძვლიანი ეჭვი იმისა, რომ სპეციალურად ხდება ციტრუსის დაბალ ფასებში მიღება. ოზურგეთის მუნიციპალიტეტის სოფელ ლიხაურის ცენტრში გაიხსნა ციტრუსის მიმღები პუნქტი, სადაც ჩვეულებრივ სტანდარტულ მანდარინში 30 თეთრს იხდიან, ხოლო ე.წ. “ენესს” საერთოდ არ იღებენ. სტანდარტულ მანდარინს აჭარაში 50 თეთრში იბარებენ, ჩვენთან რატომ უნდა ხდებოდეს ასე? ჩვენ ვიცით, რომ ადგილობრივ ხელისუფლებასთან ერთად ამ საქმეს ლიხაურის მაჟორიტარი დეპუტატი თამაზ სალუქვაძე კურირებს. თქვენ შეგიძლიათ ჟურნალისტებს ძალიან ბევრი ფაქტისა თუ საქმის გამოკვლევა და იქნებ დაეხმაროთ მოსახლეობას ამასთან დაკავშირებით. სხვა სოფლებში საერთოდ არ ხდება ჩაბარება. ეს არ უნდა აკონტროლოს ხელისუფლებამ?”, _ განაცხადა ადვოკატმა გოჩა ძიმისტარაშვილმა.
ავთანდილ ხინთიბიძე, სოფელ მელექედურის მაჟორიტარი დეპუტატი:
“მე პირადად საკრებულოს თავმჯდომარემ განმიცხადა, რომ ციტრუსის საქმეს ოზურგეთში კურირებს ნატანებელი დავით სიხარულიძეო, ეს კაცი უზის ამ საქმე თავშიო, ის კურირებს მანდარინის ჩამბარებელ პუნქტებსო, აი ასეთი პასუხი მივიღე და ძალიან გთხოვთ გადაამოწმეთ და დაეხმარეთ მოსახლეობას ამ საქმეში.”
ჩვენ დავუკავშირდით ქართული სუბტროპიკული ხილის კომპანიის დირექტორს დავით სიხარულიძეს: _ ჯერ არ დაგვიმთავრებია მშენებლობა, არ დასრულებულა პროექტი, რომელსაც აქვს ვადები, ეს დაიწყო სამი თვის წინ, რომელსაც 10 წელია არ ხედავდა არავინ, და მე როგორ შევუშლი რამეს ხელს? ეს არის კერძო ბიზნესი, არავითარი სახელმწიფო პროექტი ეს არ არის, ჩვენ გვაქვს კრედიტი აღებული და ვალდებული ვართ ეს კრედიტი დავფაროთ, არანაირი ვალდებულება ჩვენ არ გვაქვს ვინმეს მიმართ, ერთი მერცხალი გაზაფხულს ვერ მოიყვანს და, ოზურგეთში, რომ ციტრუსს ეპატრონო ამას უნდა მინიმუმ 7-8 წელი და ერთი როგორ შეძლებს ამას? დაინტერესებულ პირებს შეუძლიათ, მოვიდნენ და ნახონ, რას ვაკეთებთ, ჯერ არ დამთავრებულა და როგორ ვიზამთ ან კარგს ან ცუდს? ამიტომ მე ნაკლებად მაინტერესებს ვინ რას ამბობს, ჩემთვის ამომავალი წერტილია, რომ საწარმო იყოს გამართული და წაადგეს ოზურგეთელებს.
ოზურგეთის მუნიციპალიტეტის გამგებლის მოვალეობის შემსრულებელი კოტე შარაშენიძე: ამასთან დაკავშირებით ხელისუფლება არაფერ შუაში არ არის. არასტანდარტულ მანდარინთან დაკავშირებით ასეთი რამ ხდება, ქარხანა იღებს 10 თეთრში, 10 თეთრს აძლევს სახელმწიფო, ხდება სუბსიდირება, ეს ეხება ე.წ. “ენესს“, პირიქით ვეხმარებით გლეხს, ფერმერს ფასის გაზრდაში. საექსპორტო მანდარინთან დაკავშირებით კი რა სახის სუბსიდირება კეთდება, მაგაზე ნამდვილად ვერ გეტყვით. თუ ვინმეს რაიმე ფაქტები ქვს იმასთან დაკავშირებით, რომ ადგილობრივი ხელისუფლება უშლის ხელს ხელოვნურად მანდარინის გასაღებას, ეს არის აბსურდი.
თამაზ სალუქვაძე, ოზურგეთის მუნიციპალიტეტის სოფელ ლიხაურის მაჟორიტარი დეპუტატი: არავინ არ კურირებს მაგ საქმეს, პირიქით ხელს ვუწყობთ მოსახლეობას ციტრუსის ჩაბარებაში, რა შუასია ხელოვნურად ფასის გაზრდა თუ მატება? თავდაპირველად ლიხაურის პუნქტშიც იხდიდნენ 50-40 თეთრს, მერე დაიწია ფასმა აჭარაშიც და აქაც მოხდა დაკლება, ესაა სულ, -მეტი არაფერი.
ოზურგეთის მუნიციპალიტეტის საკრებულოს თავმჯდომარე ავთანდილ სურგულაძე “გურია ნიუსთან” აცხადებს, რომ ციტრუსის თემასთან დაკავშირებით არავისთან არანაირი საუბარი არ ჰქონია. მით უმეტეს, ავთანდილ ხინთიბიძესთან და ტყუილს უწოდებს სოფელ მელექედურის მაჟორიტარი დეპუტატის მიერ გავრცელებულ განცხადებას.
