გამონაკლისი არც თელავის ნაგავსაყრელია. სოფელ გულგულასთან მდებარე 2 ჰექტარი მოცულობის ნაგავსაყრელი, სპეციალისტების შეფასებით, არ შეესაბამება გარემოს დაცვით მოთხოვნებს.
“ეს ნაგავსაყრელი წლიდან წლამდე უფრო და უფრო დიდდება. გადავსებულია. რაიონში ყველა ქალაქიდან და სოფლიდან აქ მიდის ნაგავი. იქვე ბაღები, ვენახებია და როცა ქარია, მთელ ტერიტორიას ეფინება ნაგავსაყრელიდან ამოსული ბოლი. თან ის მდებარეობს მდინარე თურდოს ნაპირზე, მართალია ეს მდინარე სეზონურია, მაგრამ როდესაც ის წყლით ივსება, დიდდება და თან მიაქვს ნაგავი”, _ ამბობს ეთუნა ფანგანი, პროექტ “ნარჩენების მდგრადი მართვა ჯანსაღი მომავლისთვის”, რომელიც “ნიდერლანდების ინსტიტუტი მრავლპარტიული დემოკრატიისთვის” (NIMD) ფინანსური მხარდაჭერით ხორციელდება, კოორდინატორი კახეთის რეგიონში.
“მოსახლეობა ხელმოწერების შეგროვებას იწყებდა ნაგავსაყრელის მოწესრიგების მოთხოვნით, მაგრამ შემდეგ მითხრეს, რომ შეუწყვიტავთ, რადგან სამუშაოები დაიწყეს და შეწყდა აალება. რაზეც უშუალო გავლენა აქვს ამ ნამწვს, ეს არის სასუნთქი სისტემის დაავადებები. ეს ნაგავსაყრელი საბჭოთა კავშირიდან მოყოლებული არსებობს. როგორც ადგილობრივები ამბობენ, ნამწვავი ბოლი თელავამდეც აღწევს”, _ აცხადებს ეთუნა ფანგანი.
ქვეყანაში არსებულ ნაგავსაყრელებზე მდგომარეობის მოწესრიგების და ნარჩენების მართვის სამომავლო სტრატეგიის განსაზღვრის მიზნით საქართველოს რეგიონული განვითარების და ინფრასტრუქტურის სამინისტროში 2012 წელს შპს “საქართველოს მყარი ნარჩენების მართვის კომპანია” შეიქმნა. კომპანიის მართვაში ქვეყნის მასშტაბით არსებული 56 ნაგასაყრელია, მათ შორის რვის მოწესრიგება პრიორიტეტულად დასახელდა. ესენია თელავის, მცხეთის (ქსანი), გორის, ახალციხის, ქუთაისის, ამბროლაურის, ზუგდიდის, ოზურგეთის (მერია) ნაგავსაყრელები.
“მყარი ნარჩენების მართვის კომპანიის” ტექნიკური სამსახურის უფროსის უჩა აბზიანიძის თქმით, ნაგავსაყრელების პროექტები როგორც კი დასრულდა, გამოცხადდა ტენდერი და გამარჯვებული კომპანია უკვე რვავე ნაგავსაყრელზე ახორციელებს სამუშაოებს.
რაც შეეხება თელავის ნაგავსაყრელს მისი მოსაწესრიგებელი სამუშაოები ნოემბრის პირველ რიცხვებში დაიწყო და წლის ბოლოს დამთავრდება. (“მყარი ნარჩენების მართვის კომპანიის” ცნობით, საქართველოს ნაგავსაყრელების მოსაწესრიგებლად, მთლიანად გამოყოფილია 3 600 000 ლარი. კონკრეტულად თელავის ნაგავსაყრელისთვის (9.11.2013.) 60 დღის შესრულებით, 470,000 ლარი).
“თელავის ნაგავსაყრელის მოწესრიგება ორთვიანი პროექტია. სამუშაოების 65% უკვე შესრულებლია. შედეგად გვექნება ის, რომ რეალურად ნაგავი აღარ გამოჩნდება, დაიფარება. შემოიღობება. დაიდგმება სენდვიჩის ტიპის ოფისი მომსახურე პერსონალისათვის, 40 ტ სასწორი, გაბიონი მდინარე თურდოსთან მიმდებარედ. ევროსტანდარტს ვერ მიუახლოვდება, იმ მხრივ, რომ უკვე არსებულის მოწესრიგება დავიწყეთ, მაგრამ ძველზე ბევრად უკეთესი იქნება”, _ ამბობს უჩა აბზიანიძე.
