დღესვე საქართველოს ფინანსთა სამინისტროში საქართველოს მთავრობასა და ჩინეთის სახალხო რესპუბლიკის მთავრობას შორის ხელი მოეწერა შეთანხმებას “ეკონომიკური და ტექნიკური თანამშრომლობის შესახებ.”
დოკუმენტს ხელი მოაწერეს საქართველოს მთავრობის სახელით, საქართველოს ფინანსთა მინისტრმა ნოდარ ხადურმა და ჩინეთის სახალხო რესპუბლიკის მთავრობის სახელით, ჩინეთის სახალხო რესპუბლიკის საგანგებო და სრულუფლებიანი ელჩმა საქართველოში იუე ბინმა.
შეთანხმების ფარგლებში ჩინეთის სახალხო რესპუბლიკის მთავრობის მიერ გრანტის სახით გამოიყოფა 30 მილიონი ჩინური იუანი (დაახლოებით 4.9 მლნ აშშ დოლარი).
“აღნიშნული გრანტით დაფინანსდება საქართველოსთვის პრიორიტეტული ეკონომიკური და ტექნიკური თანამშრომლობის პროექტები. ბოლო პერიოდის განმავლობაში საქართველომ ჩინეთის მთავრობისგან 220 მლნ იუანის ოდენობის დახმარება მიიღო, მათ შორის, მნიშვნელოვანი იყო მელიორაციისა და ირიგაციის სისტემებისთვის განკუთვნილი ტექნიკის გადმოცემა. დარწმუნებული ვარ, ორ ქვეყანას შორის თანამშრომლობა კვლავ გაგრძელდება,“ _ განაცხადა ფინანსთა მინისტრმა ნოდარ ხადურმა.
“ორმხრივი ურთიერთობების განვითარებისთვის დღევანდელ ღონისძიებას დიდი მნიშვნელობა აქვს. დიპლომატიური ურთიერთობების 21 წლის მანძილზე, ჩინეთ-საქართველოს ურთიერთობები სტაბილურად და ჯანსაღად ვითარდება. განსაკუთრებით დიდი წარმატებები გვაქვს ეკონომიკური თანამშრომლობის მხრივ. იმედი გვაქვს, ჩვენს წვლილს შევიტანთ საქართველოს ეკონომიკის განვითარებაში,” _ განაცხადა ჩინეთის სახალხო რესპუბლიკის საგანგებო და სრულუფლებიანი ელჩმა საქართველოში იუე ბინმა.
2005 წლიდან დღემდე ჩინეთის სახალხო რესპუბლიკის მთავრობის მიერ საქართველოსთვის გრანტების სახით უკვე გამოყოფილია 220 მლნ იუანი (დაახლოებით 36.2 მლნ აშშ დოლარი) და 30 მლნ იუანის (დაახლოებით 4.7 მლნ აშშ დოლარი) ოდენობის 20-წლიანი უპროცენტო სასაქონლო კრედიტი 10 წლიანი შეღავათიანი პერიოდით.
აღნიშნული ფინანსური მხარდაჭერით განხორციელდა და ამჟამადაც მიმდინარეობს ფინანსთა სამინისტროს შემოსავლების სამსახურის, ასევე საქართველოს სოფლის მეურნეობის მნიშვნელოვანი დარგების (ირიგაცია და სასათბურე მეურნეობა) აღჭურვა შესაბამისი ტექნიკითა და მოწყობილობებით.
