“მე მოვისმინე მათი ადვოკატების რადიოთი გაკეთებული მსგავსი განცხადებები, თითქოს ამ დაკითხვაზე მყოფთ აიძულებდნენ უგულავას წინააღმდეგ ჩვენების მიცემას. ვერავინ ვერავის ვერაფერს აიძულებს, სურვილიც რომ გქონდეს ცილი დასწამო ვინმეს და ცრუ ჩვენება მისცე, ხომ უნდა დაასაბუთო. ეს არის ადვოკატების ჩვეული განცხადეა. ახლა სასამართლო თავისუფალია პროკურატურის ზეწოლისგან, ძველი დრო ხომ არ არის, ერთი სატელეფონო ზარით პროკურატურას ნებისმიერი ჩვენების მოპოვება რომ შეეძლო. ახლა ნამდვილად არ არის ასეთი სიტუაცია”.
ვოლსკის განცხადებით, როცა ადამიანი თავს იმართლებს, ყველა საშუალებას იყენებს და აქვე აღნიშნავს – “მინდა დავარწმუნო ყველა, არანაირ ზეწოლას ადგილი არ აქვს”.
დღესვე მერიის ყოფილი მაღალჩინოსნების დაკავების თემას გამოეხმაურა უმრავლესობის წევრი ეკა ბესელია და განაცხადა, რომ უგულავას ისედაც ბევრი დანაშაული აქვს და არანაირი ზეწოლით არ არის საჭირო მის წინააღმდეგ ჩვენების მოპოვება.
“მინდა გამოვეხმაურო მერის მოადგილის იმ განცხადებას, სადაც მერიის მაღალჩინოსნებზე პროკურატურის მხრიდან ზეწოლაზე საუბრობს. უგულავას აქვს საკმაოდ მძიმე ბრალდება კორუფციული და სამოხელეო დანაშაულებების თაობაზე და პროკურატურას მოქმედი მერის წინააღმდეგ სამხილების მოძიება ნამდვილად არ უჭირს. აქედან გამომდინარე, მსგავს ზეწოლას ადგილი არ ექნებოდა”.
პარლამენტის ადამიანის უფლებათა და სამოქალაქო ინტეგრაციის კომიტეტის თავმჯდომარემ აქვე განაცხადა, უახლოეს პერიოდში ბევრი გახმაურებული საქმე გაიხსნება.
მკითხველს შევახსენებთ, რომ ქვემო ქართლის საგამოძიებო სამსახურში გუშინ მერიის მაღალჩინოსნები – დავით ალავიძე, დავით ავალიანი და ალექსი თაბუაშვილი მერიის განვითარების ფონდიდან წინასაარჩევნოდ გახარჯულ თანხების საკითხზე დაკითხეს. მერის მოადგილის ირაკლი აბესაძის განცხადებით კი, დაკითხვის ერთადერთი მიზეზი, გიგი უგულავას წინააღმდეგ ჩვენების მიცემა იყო.
