უდმურტეთში, 95 წლის ასაკში გარდაიცვალა ლეგენდარული ავტომატების კონსტრუქტორი, მიხაილ კალაშნიკოვი.
მან 1947 წელს შექმნა იარაღი, რომელიც მისი უბრალოების და სანდოობის გამო, ყველაზე გავრცელებული იარაღია მსოფლიოში. მისი 66 წლის არსებობის განმავლობაში “კალაშნიკოვის” ავტომატის 70 მილიონი ეკზემპლარი დამზადდა. მიხაილ ტიმოფეის ძე კალაშნიკოვი დაიბადა 1919 წლის 10 ნოემბერს, კურია-ალტაისკის გუბერნიის ერთ-ერთ სოფელში და ის ოჯახის მეჩვიდმეტე შვილი იყო.
1938 წელს კალაშნიკოვი გამოიძახეს წითელ არმიაში. იარაღის მომავალი ოსტატი საბჭოთა არმიის მეთორმეტე სატანკო დივიზიას მიაწერეს.
1941 წელს ის ბრიანსკთან მძიმედ დაიჭრა. ამიტომ სამუდამოდ ჩამოაშორეს ფრონტს და საავადმყოფოში მოათავსეს.
შემდეგ მიხაილი გააგზავნეს მატაიში, სადაც მან მკურნალობა დაასრულა. საავადმყოფოში ყოფნის დროს მან შექმნა ავტომატ-პისტოლეტის ნახაზები და საბოლოოდ გამოჯანმრთელების შემდეგ ააწყო მისი პირველი იარაღი. თუმცა, ეს იარაღი სამხედრო ექსპერტებმა დაიწუნეს რთული კონსტრუქციის გამო.
კალაშნიკოვი ამაზე არ შეჩერებულა და ავტომატური შაშხანების შექმნას პროფესიულად მიუდგა. 1947 წელს მან გამოუშვა პირველი, საკუთარი, სერიული იარაღი, რომელიც საბჭოთა კავშირის არმიის შეიარაღებაში შევიდა _ ეს იყო AK-47 (Автомат Калашникова).
ამის შემდეგ დაიწყო ამ ლეგენდარული იარაღის გამოყენება სსრკ-ს არმიის შეიარაღებაში, შემდეგ კი მთელ მსოფლიოში გავრცელდა და დღესაც ერთ-ერთ საიმედო და მაღალხარისხოვან ავტომატად მიიჩნევა, მისი გაუმჯობესება დღესაც გრძელდება.
