აქედან სარესტორნო მომსახურების ღირებულება 3 677 ლარია, ხოლო 850 ლარი მუსიკით მომსახურებაშია გადახდილი.
ფინანსთა სამინისტროს პრესსამსახურმა შეკითხვის გაგზავნა წერილობით მოგვთხოვა. ჩვენი შეკითხვა ასეთი იყო: “2013 წლის სექტემბერში, ფინანსთა სამინისტრომ 4 527 ლარი გადაიხადა რესტორან “წისქვილში”. ხელშეკრულებაში მითითებულია, რომ ვახშამი ოფიციალური მიღებისთვის მოეწყო. გთხოვთ, მოგვწერეთ რომელი ოფიციალური მიღება გაიმართა, რომლისთვისაც აღნიშნული თანხა რესტორანში დაიხარჯა, სად გაშუქდა ეს ღონისძიება (იქნებ, მიგვითითოთ შესაბამისი ლინკი) და ასევე განგვიმარტოთ, რა სახის და ვის მიერ გაწეული მუსიკალური მომსახურებისთვის იქნა გადახდილი ამავე დღეს 850 ლარი.”
აღნიშნულს შეკითხვაზე ფინანსთა სამინისტროს საგამოძიებო სამსახურმა ასეთი პასუხი გაგვცა:
_ საქართველოში, ფინანსთა სამინისტროს საგამოძიებო სამსახურში, სამუშაო ვიზიტით იმყოფებოდნენ პოლონეთის ფინანსთა სამინისტროს სახაზინო დაზვერვის დეპარტამენტის მაღალი თანამდებობის პირები. აღნიშნული ვიზიტი წარმოადგენდა პოლონურ-ქართული პროექტის ნაწილს, რომელიც გათვლილია 2013-2014 წლებზე და დაფინანსებულია პოლონეთის საგარეო საქმეთა სამინისტროს მიერ. პროექტის მიზანია, რეგიონალურ დონეზე კორუფციის პრევენციის, გამოვლენისა და მის წინააღმდეგ ბრძოლის მეთოდების შესახებ გამოცდილების გაზიარება. აღნიშნულ ორ უწყებას თანამშრომლობის სამწლიანი ისტორია აქვს, 2013 წელს კი ურთიერთთანამშრომლობას ოფიციალური სახე მიეცა და მოხდა მისი დაფინანსება. ბათუმში, სასტუმრო “რედისონში” გაიმართა სამუშაო შეხვედრა, ხოლო რაც შეეხება უშუალოდ რესტორანში დახარჯულ თანხას, ეს იყო ოფიციალური მიღება, ვახშამი რომელზეც ქართულმა მხარემ მიიწვია პოლონეთის დელეგაცია და სწორედ ამ მიღებისთვის იქნა გამოყოფილი თანხა.”
მიუხედავად თხოვნისა, უწყებას არ მოუწოდებია ლინკი, სადაც პასუხში აღნიშნულ ვიზიტზეა საუბარი და არც ის დაუკონკრეტებიათ, რა სახის და ვის მიერ გაწეულ მუსიკალურ მომსახურებაში იქნა გადახდილი საქართველოს ბიუჯეტიდან 850 ლარი.
საქართველოს სახელმწიფო ელექტრო სისტემამ, რომელიც სახელმწიფოს საკუთრებაში მყოფი სააქციო საზოგადოება, 2013 წლის 10 ივლისს რესტორან “ძველი სახლის” სარესტორნო მომსახურებაში 1645 ლარი და 47 თეთრი გადაიხადა.
_ თანხები ოფიციალური ვიზიტების დროს იხარჯება. “ძველ სახლში” “აზერენერჯის” დელეგაცია გვყავდა. მოკლედ რომ აგიხსნათ, ჩვენი კომპანია პარალელურ რეჟიმში მუშაობს აზერბაიჯანთან, სომხეთთან და რუსეთთან. შესაბამისად, ჩვენთან ხშირია კომპანიების ვიზიტები. ასეთ დროს აუცილებლად ვაკეთებთ წარმომადგენლობით ვახშმებს და სუვენირებს. “აზერენერჯის” ვიზიტისას კომერციული და ტრანზიტული საკითხების განხილვა მოხდა, _ აღნიშნა ჩვენთან საუბრისას საქართველოს სახელმწიფო ელექტრო სისტემის პრესსამსახურის ხელმძღვანელმა ნინო ჯარანაშვილმა.
თბილისის საკრებულოს ბიუჯეტიდან, თბილისობის დღესასწაულთან დაკავშირებით, საკრებულოს თავმჯდომარის მიერ საპატიო თბილისელებისთვის საკრებულოს სახელით ორგანიზებული ვახშმის მოწყობაზე 8 861 ლარი და 10 თეთრი დაიხარჯა. 2013 წლის 4 ოქტომბრით დათარიღებულ ხელშეკრულებაში მითითებულია, რომ რესტორან “წისქვილში” სუფრა 85 კაცზე იყო გაშლილი. თანდართული ანგარიშფაქტურის მიხედვით კი 8171 ლარი სარესტორნო მომსახურების თანხაა, 690 ლარი კი _ მუსიკალური პროგრამის. აღსანიშნავია, რომ თბილისის საკრებულომ სიგარეტები _ “კენტი და “მალბოროც” კი ბიუჯეტის ფულით შეიძინა.
ქალაქ თბილისის მერიამ, თბილისობის დღესასწაულზე ადმინისტრაციისთვის (260 კაცი) 31 980 ლარი დახარჯა რესტორან “ფუნიკულიორზე.” ხელშეკრულებაში აღნიშნულია, რომ თითო კაცზე 123 ლარი დაიხარჯა.
