როგორც ითქვა, გუბერნატორი გაეცნო კლუბში არსებულ ვითარებას და მოისმინა, თუ ვის როგორი ხედვა აქვს კლუბის მომავალთან დაკავშირებით.
ჩვენი წყაროს ინფორმაციით, გუბერნატორმა “გურიას” მესვეურებს შესთავაზა _ რადგან კლუბს ამჟამად მწვრთნელი არ ჰყავს და როცა გვყავს ადგილობრივი კადრი, შესაბამისი ლიცენზიისა და კვალიფიკაციის მქონე თემურ ლორია, კლუბი მას ჩავაბაროთო. მოკლედ, გუბერნატორი ყველა მხარისგან მოელის პროგრამის წარდგენას.
რა თქმა უნდა, შეხვედრაზე საუბარი იყო კლუბის ფინანსურ პრობლემებზე. ამ დღეებში მეტად ორიგინალური განცხადება გაავრცელა “ზესტაფონის” ფან-კლუბმა _ იწყება 23 მილიონის შეგროვება გულშემატკივრებში, რაც თითქმის შეუძლებელია, თუმცა, რეზონანსულია. ასეთი ორიგინალური გადაწყვეტილებით, ფანები ზვიად სიჭინავას ფეხბურთის ფედერაციის თავკაცის პოსტიდან გადადგომას მოელიან. სფფ-ის თავკაცმა “ზესტაფონის” მფლობელ ილია კოკაიას შეუთვალა _ 23 მილიონი ჩარიცხე კლუბების ანგარიშზე და თანამდებობას დავტოვებო! ეს განცხადება ზვიად სიჭინავამ მას შემდეგ გააკეთა, რაც “ლელოში” “გურიას” სპორტული დირექტორის, თემურ ალექსაიას სკანდალური ინტერვიუ გამოქვეყნდა:
“წინა შეხვედრები კარგად გაშუქდა. ამჯერად ჩვენი შეკრება მედიისთვის დახურული იყო და საზოგადოებამ მომხდარზე ინფორმაცია ვერ მიიღო. არადა, ჩემი აზრით, იქ ძალზე საყურადღებო მოვლენები მოხდა. სპორტისა და ახალგაზრდობის საქმეთა მინისტრს, ლევან ყიფიანს შევხვდით. იმ შეხვედრიდან და, საერთოდ, ბოლოდროინდელი მოვლენებიდან დამრჩა შთაბეჭდილება, რასაც ყველა ხვდება, მაგრამ არავინ ლაპარაკობს _ სანამ ზვიად სიჭინავა იქნება, მანამ სახელმწიფო ფეხბურთს არ დააფინანსებს. სიჭინავა ძველ ხელისუფლებასთანაა დაკავშირებული და, უბრალოდ, არ ენდობიან. სწორედ აქედან გამომდინარე ვთქვი ყიფიანთან შეხვედრისას _ ბატონო ლევან, თუ სიჭინავას გამო ფეხბურთს არ აფინანსებთ, მაშინ ჩავატაროთ ფედერაციის რიგგარეშე ყრილობა და ახალი პრეზიდენტი ავირჩიოთ,-მეთქი. სიჭინავას პიროვნულად არაფერს ვერჩი, მაგრამ თუ ყველაფერი მართლა მის გამო ხდება, მართლაც აჯობებს, ფეხბურთის ფედერაციის თავკაცი სხვა პიროვნება იყოს. შეხვედრაზე “ზესტაფონის” წარმომადგენელმა მიხეილ ხუციშვილმა თქვა, რომ ილია კოკაიასგან მნიშვნელოვანი გზავნილი ჰქონდა. დავინტერესდით, რა გზავნილზე იყო ლაპარაკი. კოკაია, თურმე, სიჭინავას მიმართავს _ თუ თქვენ გამო სახელმწიფო არ გვაფინანსებს, პირველ იანვრამდე 5 მილიონ ლარს თანაბრად ჩავურიცხავ უმაღლესი ლიგის ყველა კლუბს, შენ კი გადადექიო. სიჭინავამ იქვე უპასუხა, მხოლოდ იმ შემთხვევაში წავალ, თუ სამწლიანი პროგრამა და ამ პერიოდში ქართული ფეხბურთის დასაფინანსებლად გამზადებული 100 მილიონი ლარი დაიდებაო. ცუდი აზრი მართლაც არ არის, მაგრამ თავადაც იცის, რომ ეს არარეალურია”.
რამდენიმე დღის წინ, გავრცელდა ინფორმაცია, რომ “გურიას” დირექტორატი მოლაპარაკებას გუნდის ყოფილი მეკარესა და შემდგომში მთავარი მწვრთნელ გიგლა იმნაძესთან მართავდა: “არაფერი ვიცი, გეთანხმებით, წესით, ეს ყველაფერი პირველმა მე უნდა ვიცოდე, ალბათ, მაგრამ არაფერი ვიცი ნამდვილად!” _ ასე გვიპასუხა ამ მოლაპარაკებასთან დაკავშირებით “გურიას” ლეგენდარულმა კაპიტანმა, პარლამენტარმა თემურ ჩხაიძემ, რომელიც გიგლა იმნაძის უახლოესი მეგობარიცაა. თავად იმნაძემ კი ჩვენთან საუბარში აღნიშნა, რომ რაღაც მოლაპარაკება იყო, მაგრამ ვერ შეთანხმდნენ და ამ ეტაპზე საჩხერეში რჩება.
ასევე მეტად საინტერესო ინფორმაცია გაჟღერდა, რომ “გურიამ” შეკრება შესაძლოა მეზობელ თურქეთში, კურორტ ანტალიაში გაიაროს, თუმცა, გუბერნატორმა წერილის დასაწყისში ნახსენებ შეხვედრაზე თანხების ეკონომიის აუცილებლობაზე ისაუბრა და თქვა _ ანტალიის ნაცვლად, ჯობს გურიის ზღვისპირეთში მოვემზადოთ და მაგ თანხით ბაზა მოვაწყოთო.
კლუბის მწვრთნელმა, დავით მახარაძემ www.worldsport.ge-სთან საუბარში სკანდალური განცხადებები გააკეთა: “მწვრთნელი როცა ხარ, ამ დროისთვის უკვე უნდა იცოდე, როდის იწყებ ვარჯიშს, რათა დაგეგმო მოსამზადებელი ეტაპი. მე არც არავინ დამკავშირებია და პრესიდან ვიგებ, რომ გიგლა იმნაძეს ნიშნავენ მწვრთნელად. მგონი, ადამიანური წესია, რომ უნდა გამაგებინონ. თუმცა, რამდენიმე დღეა, ვურეკავ კლუბის დირექტორ კობა მირზაშვილს და ვერ ვუკავშირდები. დეკემბრის ბოლოს “სამტრედიამ” შემომთავაზა მწვრთნელობა და უარი ვუთხარი. მითხრეს, არ წახვიდე, “გურიაში” სიტუაცია გამოსწორდებაო. უკვე სისტემატური ხასიათი მიეცა უმადურობას. რომან პოკორა მოიყვანეს ჩემს ნაცვლად იმ დროს, როცა უხელფასო გუნდს მშვენიერი შედეგი გვქონდა. მაშინ სპონსორს დაუკავშირეს პოკორას მოყვანა. შემდეგ თქვეს, ფიზიკურად კარგად ვერაა მზად გუნდი, ქუთაისში ამის გამო წავაგეთ და პოკორა გამოასწორებსო. არავითარი ანალიზი არ გაკეთებულა, თუ რატომ არ იყო ფიზიკურად გუნდი მზად. როგორ იქნებოდა ბოლომდე ფიზიკურად მზად შეკრებაგაუვლელი გუნდი ყველა მატჩში? ამას თავი დავანებოთ. პოკორასგან ბევრი ვისწავლე, კარგი მწვრთნელი და ადამიანია. საწყენია, რომ სწორედ პოკორას დააბრალეს ბოლო 5 მატჩში 4 წაგება. როგორ იკრიბებოდა გუნდი იმ მატჩებში და რა საცოდავ დღეში იყო, ეს ვითომც არაფერი. თბილისში “დინამოსთან” მატჩზე თბილისში მცხოვრები ფეხბურთელები ცალკე მოვიდნენ, სხვები ცალკე და ასე თამაშის წინ შეიკრიბა გუნდი. პოკორა ამბობდა, ასეთი რამ უკრაინაში რომ მოვყვე, მეზღაპრეობას დამაბრალებენო. თანაც, უმაღლესი ლიგის გუნდზეა ლაპარაკი. საბოლოოდ, პოკორას დაბრალდა წაგებები. ჩვენთან ხომ ასეა: მოიგებდა “გურია”? ყველა თავის თავს უკავშირებდა წარმატებას. წააგებდა _ მწვრთნელის ბრალია,” _ აცხადებს მახარაძე.
“მისაღებია 5 თვის ხელფასი. სამი თამაშის პრემიაც არ გვაქვს აღებული. 15 იანვრამდე დარიგდებაო. ბიუჯეტიც გაიწერა. დიდი თანხა არაა, 665 000 ლარი ყოფილა წლიური. 6 თვეა, “გურიაში” ვარ და მსგავსი რამ არსად მინახავს: ვინაა უფროსი, ვერ გავიგე. წარმოიდგინეთ, ექიმები და გუნდის კიდევ რამდენიმე პერსონალი მე მირეკავდა ხელფასებზე. მე რა შუაში ვარ?! რა ვქნათ, სხვა არავინ პასუხობს ტელეფონსო. აი, ასეა საქმე. ორპირ ხალხთან მუშაობას არ ვაპირებ. როგორც სხვას ვექცევი, იგივეს ვითხოვ სხვებისგან. და ეს ხალხი თუ დარჩა კლუბის ირგვლივ (ყველას არ ვგულისხმობ), აუცილებლად წავალ. თავმოყვარეობა მაქვს და ასეთ იგნორირებას ვერ ავიტან. ისედაც ბევრი ავიტანე. აქ უკვე ხელფას-პრემიაზე არაა ლაპარაკი. ადამიანურ ურთიერთობაზეა საუბარი. არადა, “გურიას” მართლაც მაგარი გულშემატკივრები ჰყავს. მინდა ვისარგებლო და თბილი სიტყვებით მადლობა გადავუხადო მათ თავდადებისთვის. ყველა მატჩში აქტიურად გვიჭერდნენ მხარს. რა თქმა უნდა, მადლობა ფეხბურთელებსაც,” _ დასძენს მახარაძე.
9 იანვარს, კლუბის დირექტორატმა მიიღო გადაწყვეტილება, რომ “გურიას” მთავარ მწვრთნელად დავით მახარაძეს დარჩება. ჩვენ მას დავუკავშირდით, ასეთი განცხადებების შემდეგ, თანახმაა თუ არა “გურიაში” დარჩენაზე: “დიახ, დღეს ვიყავი ლანჩხუთში და შევთანხმდით, რომ მე და გიალო ჩხაიძე გავაგრძელებთ მუშაობას,” _ გვითხრა მან.
