როგორც კომიტეტის თავმჯდომარე, ეკა ბესელია აცხადებს – “ყველა ბავშვი ღირებულია, განუმეორებელია და საუკეთესოა. თანაბრად დაცულია კანონით და ჩვენ ყველას ერთნაირი სიყვარულით უნდა ვიღებდეთ. ბავშვთა უფლებების და მდგომარეობის კუთხით საქართველოში უმძიმესი მდგომარეობაა. 77 000 მეტი ბავშვი სიღარიბის ზღვარს მიღმაა, 200 000 ზე მეტი სიღარიბის ზღვარზე, გარდაცვალების ფაქტებით საქართველო ევროპაში მეორე ადგილზეა. ამ გარემოებების გამო ადამიანის უფლებათა დაცვის კომიტეტმა 2014 წელი ბავშვთა უფლებების დაცვის წლად გამოაცხადა. კონცეფცია 27 დეკემბერს დავამტკიცეთ”.
როგორ უნდა წარიმართოს ეს წელი და რა აუცილებელი ნაბიჯები უნდა გადაიდგას ბავშვთა უფლებების დასაცავად პირველ რიგში, ამ თემაზე სასაუბროდ ფონდ “მომავლის გზის” ხელმძღვანელ დავით კინწურაშვილს დავუკავშირდით, რომელიც უკვე წლებია ბავშვთა პრობლემებს შეისწავლის და ცდილობს მათი სამყაროს გალამაზებას.
“ყველა ბავშვს აქვს ოჯახური გარემოში ცხოვრების უფლება, გაეროს ბავშვთა უფლებების კონვენციის მიერ აღიარებული ეს უფლება, ბუნებრივია, მაგრამ ეს არ უნდა იყოს მხოლოდ საბუთზე დაწერილი, მისი შესრულების ვალდებულება უნდა აიღონ და განახორციელონ, ეს ვალდებულება საქართველომ 1994 წლიდან აიღო და შესაბამისად სახელმწიფო ცდილობს ამის შესრულებას, მაგრამ არის ძალიან ბევრი პრობლემა, მთავარი პრობლემა კი სიღარიბეა. აუცილებელია ბავშვზე ზრუნვის სისტემის ჯანსაღი რეფორმის გატარება, იმისათვის რომ თითოეულ ბავშვს ქონდეს შესაძლებლობა იცხოვროს და აღიზარდოს ოჯახურ გარემოში, გაძლიერდეს განსაკუთრებით ის ოჯახები, სადაც ცხოვრობენ მცირეწლოვანი ბავშვები. განსაკუთრებული ყურადღების ქვეშ უნდა მოექცეს ბავშვების ცხოვრების პირობები, დეტალურად უნდა იქნეს შესწავლილი და გამოკვეთილი, საჭიროებების მიხედვით უნდა განხორციელდეს ზრუნვა მათზე. პრიორიტეტად უნდა გამოცხადდეს ბავშვები და ყველაფერი გავაკეთოთ იმისათვის, რომ მათ აღარ იცხოვრონ სიღარიბეში, უსახლკაროდ, უახლოეს პერიოდში შიმშილის გამო აღარ უნდა გარდაიცვალოს არც ერთი ბავშვი.
წინა ხელისუფლებამ განახორციელა რეფორმა- დიდი ბავშვთა სახლების დახურვა და შენაცვლება მცირე საოჯახო ტიპის სახლებით, ეს ძალიან კარგია, როცა ოჯახურ გარემოებასთან მიახლოებული პირობებით ხდება იმ ბავშვების აღზრდა, რომელიც სახელმწიფო ზრუნვის პროგრამაშია, მაგრამ სამწუხაროდ, მე ცოტა ხისტად მომეჩვენა რეფორმის გატარება, რადგან სწრაფი ტემპით დაიხურა სახლები და ალტერნატიული გზები არ იყო კარგად მომზადებული, რამაც შქმნა სხვადასხვა სახის პრობლემები. აქ დაირღვა ბავშვების უფლება, ზოგი მათგანის ცხოვრების პირობები გაუარესდა, ამას იმიტომ ვამბობ, რომ ყველა პროექტი, რეფორმა, რომელიც ბავშვებს ეხება უფრო ლმობიერი და ჰუმანური უნდა იყოს, მე მომწონს ჯანდაცვის სამინისტროს ბოლო დროინდელი ყურადღება ასეთი ბავშვის მიმართ, მაგრამ ეს საკმარისი არ არის, ჯერ კიდევ არის ბევრი საკითხი, რომელიც ადვილად მოსაგვარებელია, მაგრამ მეტი ყურადღებაა საჭირო რომ მოგვარდეს, დღესაც არის ბიუროკრატიული საბუთობანა და დროში გაწელილი პროცესები, როცა საკითხი ბავშვებს ეხება და ბავშვის გადარჩენას, ამ შემთხვევაში ხელისუფლება უფრო ყურადღებით უნდა ეკიდებოდეს თითოეული ბავშვის საკითხს”, _ განაცხადა დავით კინწურაშვილმა.
ჩვენ ამავე კითხვით თბილისის 24-ე საჯარო სკოლის დირექტორ გია მურღულიას დავუკავშირდით, რომელმაც ჩამოგვითვალა ის საკითხები, რაზეც აუცილებლად უნდა გამახვილდეს მთავრობის მიერ ყურადღება.
_ 1. ობიექტური და მრავალმხრივი ინფორმაციის მიღების უფლება; 2. ხარისხიანი განათლების მიღების უფლება; 3. მავნე ზეგავლენისაგან დაცულობის უფლება.
_ უფრო კონკრეტულად ინფორმაციის მიღებაში რას გულისხმობთ და მავნე ზეგავლენისგან როგორ დავიცვათ ბავშვები? სამწუხაროდ ქუჩის მავნე ზეგავლენა რატომღაც ისევ “მოდური” გახდა მოზარდებში.
_ ბავშვები ხშირად ცალმხრივ ინფორმაციას იღებენ ამა თუ იმ საკითხზე (ლიტერატურა, ზნეობა, პოლიტიკა, საზოგადოება). ეს, არსებითად, ორი მიზეზით არის განპირობებული: 1. სათანადო ლიტერატურის ხელმიუწვდომლობა და 2. ინფორმაციის მიღება არაკომპეტენტური ან “დაშტამპული აზროვნების” მქონე ადამიანებისგან (მშობლები, მასწავლებლები). რაც შეეხება მავნე ზეგავლენას, ეს შეიძლება იყოს: 1. ქუჩური აზროვნება და მოქმედება, რომელიც მართლაც მოძლიერდა ამ ბოლო დროს, თუმცა სრულად მინავლებული არც არასდროს ყოფილა, მიუხედავად სერიოზული მცდელობებისა; 2. სათამაშო ბიზნესის აბსოლუტურად უკონტროლო მოქმედება, რაც უამრავ ბავშვს “ითრევს”; 3. გარყვნილების ინდუსტრიის სრული ხელმისაწვდომობა.
